Ezekel 8
8
Sḭḭm watɗa zok ge Dok ne zi
1Del myanaŋgal go̰r ge paal ne go, dam anuwa̰y ge saba ge myanaŋgal ne go, mbi ne katɗa mbi diŋ, naa ga̰l ge Yuda ne ma ne katɗa mbi ndwara se me, pool ge Bageyal Bage ɗiŋnedin ne wan mbi.
2Mbi ndil swaga, ndi, mbi kwa dir a̰me dimma ne ndu go. Ne na swaga pe go mbo se, na duur ka dimma ne ol go, ne go mbo digi, ka kaal kekeŋ dimma ne ol ne zon walam go. 3Tyare kaŋ dimma ne tok go, wan mbi pala susu. O̰yom her mbi digi, mbo ne mbi Ursalima ya, ge zok wak ge zi ge wak go, na ge ne saŋge ndwara le kuu pe, ge swaga ge a ne é sḭḭm ge yil ne kḭḭm ne go, na ge ne e Dok ke yil. 4Hormo ge Dok ge Israyela ne ka swaga be go dimma ne daalam ge mbi ne kwa na baal pul se go#3:22-23.. 5Jan mbi go: «Mo ndu dasana, zwá mo pala digi, ndi swaga le kuu.» Mbi zwal mbi pala digi, mbi ndil swaga le kuu, mbi kwa kḭḭm ge sḭḭm ge yil ne zok wak le ge kuu ge go, na ge ne zut mbo twal tuwaleya ta. 6Jan mbi go: «Mo ndu dasana, mo kwa kaŋ ge a ne ke ya go’a? Mo kwa kaŋ ge seŋgre kakatak ge ɓaŋlaŋ ge Israyela vya ma ne ke ne go go, ge ne é mbi abe tene ne zok ge mbi ne ge mbegeya zi uzi ya go’a? Mo ma̰ gwan kwa kaŋ ge seŋgre kakatak ge ɓaŋlaŋ ge waɗeya ma.»
7Mbo ne mbi ya viya̰ wak zum, ndi, mbi kwa gulum swaga a̰me zutɗa. 8Jan mbi go: «Mo ndu dasana, zú gulum.» Mbi zut gulum, mbi ya̰ gulum ndwala. 9Jan mbi go: «Wá zi, ndi kaŋ ge seŋgre kakatak ge sone ge a ne ke nama ne go go.» 10Mbi wat zi, mbi kwa kavaar ge ne sar ne bama pul ge daage, ne kavaar ge baŋ yak ma, ne kaŋ sḭḭm ge Israyela vya ma ne ma pet ɗebceya gulum ta koŋleya se. 11Ga̰l ge Israyela vya ma ne ma naa wara ɓyalar a ka mḛya kḭḭm mbe ma ndwara zḛ. Yazaniya ge Chafan vya ka nama buwal zi me. Ndu ge daage ne hṵli ɗusi dukan na tok go. Ol swama ge dukan ne ka ndugi digi. 12Jan mbi go: «Mo ndu dasana, mo kwa kaŋ ge ga̰l ge Israyela vya ma ne ne ke ne tṵ zi, ge bama zok ge a ne ɗebce kḭḭm ma ne nama ta ma ya go’a? A jan go: ‹Bage ɗiŋnedin kwa i ne go to, ne jo̰ saŋge suwal ya na go̰r.›» 13Jan mbi go uwale: «Mo ma̰ gwan kwa kaŋ ge seŋgre kakatak ge ɓaŋlaŋ ma ge a ne ke ne go.»
14Mbo ne mbi ya zok ge Bage ɗiŋnedin ne wak go, na ge ne le ge kuu ge go. Mbi kwa naa zaab ma ne katɗa fyal sḭḭm Tammuz#8:14 Tammuz: A sḭḭm ge Babilon ma ne ne, maana ma jan go na su watuwak ba mbo tan somor wak go. Ne nama ta, a sḭḭm ge kaŋ kyarga ma ne ne.. 15Jan mbi go uwale: «Mo ndu dasana, mo kwa ya go’a? Mo ma̰ gwan kwa kaŋ ge seŋgre kakatak ge ɓaŋlaŋ ge waɗe ge no mbe ma.»
16Mbo ne mbi zok ge Bage ɗiŋnedin ne yapul diŋ ya. Zok ge Bage ɗiŋnedin wak go, ge twal tuwaleya ma ne zok wak buwal zi, mbi kwa naa wara azi para anuwa̰y, a saŋge bama go̰r hon zok ge Bage ɗiŋnedin ne, nama ndwara ma saŋgeya le ge ham ge go, a ka gur bama koo se ndwara le ham, uware gyala. 17Uwale, gwan jan mbi go: «Mo ndu dasana, mo kwa ya go’a? Kaŋ ge seŋgre kakatak ge Yuda ma ne ke ne go go mbe ma no, a ndil nama go nama cecḛ ɗaa? A wi suwal ya ne fare kerra ge pool ma, a ka e mbi laar hotɗa. Ndi a gwan her uwara ɗiŋ mbo bama vo̰r digi. 18Mbi mbo gwan ne nama potɗa pore juliliya ge mbi ne zi. Mbi ndwara mbo bar to, mbi mbo kwa nama a̰se to bat. A mbo á ta fyalla mbi ndwara se, amma mbi mbo za̰ nama to bat.»
Currently Selected:
Ezekel 8: FGN2013
Highlight
Copy
Compare
Share
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
