Ezekel 30
30
Bage ɗiŋnedin mbo ke ho̰l ne suwal Masar
1Bage ɗiŋnedin jan mbi go: 2«Mo ndu dasana, waage fare, jya̰ go, Bageyal, Bage ɗiŋnedin jan go:
sṵ me ta: Hat, a ma dam ne go ɗaa!
3Ago, dam mbe gá gwa,
dam ge Bage ɗiŋnedin ne gá gwa,
a dam ge pḭr herra ŋgiŋgil ne,
a dam mḛreya ge pehir ge ɗogle ma ne ya̰ ya ne.
4Pore mbo mbo ya suwal Masar go,
naa ge suwal Kuch ma mbo abe ndatɗa rarag.
Siya ma mbo gá kanna suwal Masar go njinjik,
a mbo pál nama kaŋ gan ma,
a mbo burmi nama suwal uzi.
5Kuch ma, ne Put ma, ne Lud ma,
poseya ne naa ge pe dew ma pet, ne Libiya ma,
ne naa ge a ne ke wak tuli ne nama suwal,
ɓanna ne nama pet, pore mbo zam nama.
6Bage ɗiŋnedin jan go:
Ne suwal Migdol kuu ya
ɗiŋ mbo suwal Syen mbii ya,
naa ge mbarra ge suwal Masar ne ma mbo det,
pool ge na ne ge waɗeya mbo cwage ya se,
ka̰l ge Bageyal Bage ɗiŋnedin ne.»
7Ne suwal ge ne burmi uzi ma buwal zi, suwal Masar mbo burmi uzi waɗeya, na suwal ma mbo gá joo pala baŋ. 8Swaga ge mbi ne mbo e ol ya suwal Masar ta, mbi burmi na naa ge mbarra ma uzi, a mbo kwa go mbi Bage ɗiŋnedin ne. 9Dam mbe go, mbi mbo teme naa ge temeya ma ne fak ga̰l mbo ndace Kuch ma, nama ge ne ndil ta go bama ka swaga halas ma. Dam mḛreya ge suwal Masar ne go, vo ge ɓaŋlaŋ mbo wan nama. Ndi, dam mbe mbo ya go.
10Bageyal Bage ɗiŋnedin jan go: «Mbi mbo e Nebukadnezar gan ge Babilon ne, pur ɓase ge Masar ma ne pe uzi. 11Na sḛ ɓanna ne na ɓase ma, nama ge ne ke fare pool gḛ ma, a mbo mbo ya burmi suwal uzi. A mbo mbal suwal Masar pore, a mbo kan siya ma suwal diŋ njinjik. 12Mbi mbo fya̰ maŋgaɗam Nil digi, mbi mbo hon suwal naa ge sone ma tok go, mbi mbo e naa ge pe baŋ ma burmi suwal uzi poseya ne kaŋ ge ne na pul zi ma pet, a mbi Bage ɗiŋnedin jya̰ ne.»
13Bageyal Bage ɗiŋnedin jan go: «Mbi mbo burmi kaŋ sḭḭm, mbi mbo á kaŋ ge baŋ yak ma pe ne suwal Memfis go, ga̰l ma mbo gwan kat suwal Masar go to bat. Mbi mbo kan vo suwal Masar go. 14Mbi mbo burmi suwal Patros uzi, mbi mbo e ol suwal Sowan ta, mbi mbo kun sarya suwal Tebes pal. 15Mbi mbo kan pore juliliya ge mbi ne suwal Sin pal, na ge gulum ga̰l ge suwal Masar ne. Mbi mbo burmi ɓase ge suwal Tebes ne ma uzi. 16Mbi mbo e ol suwal Masar ta, naa ge suwal Sin ne ma dulwak mbo kun ɓat. A mbo zut suwal Tebes gulum ga̰l swaga ma, a mbo det suwal Memfis gyala pala ɗar. 17Suwal On ma ne suwal Pi-Beset bool ma pore mbo zam nama, naa ge ne gá ma a mbo pál nama mbo mo̰r zi. 18Swaga ge mbi ne mbo hál suwal Masar pool ya, pala ga̰l ge na ne ge waɗeya mbo á, gyala mbo sebe tṵ suwal Tapenes pal. Pḭr sebeya mbo kulbi suwal pal, a mbo pál na naa mbo mo̰r zi. 19A go no ge mbi mbo kun sarya suwal Masar pal, a mbo kwa go mbi Bage ɗiŋnedin ne.»
Gan ge Babilon ne kaŋ temel ge Bage ɗiŋnedin ne ne
20Del wol pala ɗu go̰r ge paal ne go, dam ɓyalar ge saba ge zḛ ge ne go, Bage ɗiŋnedin jan mbi go: 21«Mo ndu dasana, ndi, mbi hal Faraon, gan ge suwal Masar ne biyal#30:21 Ne wak ibriniya zi, biyal a pool ge ndu dasana ne ne, hal na a ndwara go, ame pool ge na ne, ko pool ge na ne be gwan gá to. Eze 31:17, Irm 48:25, Luk 1:51 ya go. Ndu a̰me ge twar na tok mbe, ko ge ke na jam, ko ge wan na tok mbe ndwara twar na ɗo, ba gwan ɓol pool ge gwan wan kasagar mbo kat to bat. 22Ne no pe, Bageyal Bage ɗiŋnedin jan go: Ndi, mbi mbo ɗage ho̰l ne Faraon, gan ge suwal Masar ne, mbi mbo hal na biyal ma jwak, na tok ge pool ge ne gá, ma ne na tok ge ne há mbe me, kasagar mbo fage ne na tok zi se. 23Mbi mbo ɓarse Masar ma se sasar pehir ge ɗogle ma buwal zi, a mbo dasare se suwar pal. 24Mbi mbo hon gan ge Babilon ne pool, mbi mbo hon na mbi kasagar na tok zi. Mbi mbo hal Faraon biyal, mbo gá uwarra dimma ne ndu ge ne ɓó jwaŋ ga̰l go. 25Mbi mbo hon gan ge Babilon ne pool, amma pool ge Faraon ne mbo á. Swaga ge mbi ne mbo hon gan ge Babilon ne mbi kasagar ya na tok zi, ɗage ho̰l ne suwal Masar, a mbo kwa go mbi Bage ɗiŋnedin ne. 26Mbi mbo ɓarse Masar ma pehir ge ɗogle ma buwal zi, a mbo dasare se suwar pal, go no a mbo kwa go mbi Bage ɗiŋnedin ne.»
Currently Selected:
Ezekel 30: FGN2013
Highlight
Copy
Compare
Share
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
