Ezekel 29
29
Mḛreya ge suwal Masar ne
1Del wol go̰r ge paal ne go, dam wol para azi ge saba ge wol ne go, Bage ɗiŋnedin jan mbi go: 2«Mo ndu dasana, saŋge mo ndwara Faraon, gan ge suwal Masar ne pal, waage fare na pal, ne Masar ma pal pet. 3Jya̰ go: Bageyal Bage ɗiŋnedin jan go:
Ndi, mbi ɗage ho̰l ya ne mo Faraon, gan ge Masar ne,
so̰y ga̰l ge ne fí ne maŋgaɗam Nil se,
ge ne jya̰ go: ‹Maŋgaɗam Nil mbi ne ne,
a mbi ke na ne.›
4Mbi mbo san mo wak ne kuwa,
mbi mbo vwal sii ge ne maŋgaɗam Nil se ma
ge mo kukursu ma go,
mbi mbo min aŋ ne sii ge ne vwa ne mo kukursu go ma
ne mo maŋgaɗam mbe se ya digi.
5Mbi mbo kan aŋ ne mo sii mbe ma pet ful pul zi.
Mo mbo su ful zi ya,
ndu a̰me ge kote mo,
ko ge mbul mo mbo kat to bat,
mbi mbo hon mo duur kavaar ma ne njoole ma zamma.
6Go no, naa ge ne suwal Masar go ma pet
a mbo kwa go mbi Bage ɗiŋnedin ne.
Mbyaleya ge nama ne
ge a ne mbyale Israyela vya ma
a dimma ne teer ne mbyale kaŋ go baŋ.
7Swaga ge a ne wa̰ mo bama tok zi,
Mo tyabe tene se,
mo syaɗe nama ge nama ganwak ma pala go.
Swaga ge a ne deŋge ta mo ta,
mo há tene se,
mo ya̰ nama detɗa ne bama baŋgay.#29:7 Ne wak ibriniya zi go, mo há nama goŋ.
8Ne no pe, Bageyal, Bage ɗiŋnedin jan go: Mbi mbo gene pore ya mo pal, mbi mbo pur naa dasana ma ne kavaar ma pe ne mo suwal go. 9Suwal Masar mbo burmi uzi, mbo gá joo pala baŋ, go no, a mbo kwa go mbi Bage ɗiŋnedin ne. Ne da pe, na sḛ jya̰ go: ‹Maŋgaɗam Nil mbi ne ne, a mbi sḛ ke na ne.›
10Ne no pe, mbi mbo ɗage ho̰l ne aŋ ne mo maŋgaɗam Nil me, mbi mbo burmi suwal Masar uzi, mbo gá joo pala baŋ, ne suwal Migdol kuu ya ɗiŋ mbo suwal Syen mbii ya, ge warbe ge suwal Etyopiya ne ya. 11Naa dasana ma, ko kavaar ma a mbo kale na go to bat, kaŋ a̰me mbo kat na go to ɗiŋ del wara anda. 12Mbi mbo burmi suwal Masar uzi waɗe suwal ge ne burmi ma pet, na suwal ma mbo burmi se waɗe suwal ge ne burmi se ma pet ɗiŋ del wara anda. Mbi mbo ɓarse Masar ma pehir ge ɗogle ma buwal zi, a mbo ɓarse se sasar suwal ma go. 13Ago, Bageyal Bage ɗiŋnedin jan ne: Swaga ge del wara anda mbe ma ne mbo mbyatɗa, mbi mbo kote Masar ma ne pehir ma buwal zi ya digi, ne swaga ge a ne ɓarse ma ya. 14Mbi mbo gwan ne suwal Masar naa ge paal ma ya, mbi mbo gwan ne nama ya suwal Patros go, nama bá ma suwal go, a mbo ɗur muluk vya a̰me. 15Mbo kat jyale cecḛ muluk ge ɗogle ma buwal zi, mbo gwan her na pala digi pehir ge ɗogle ma pal to. Mbi mbo gwan ne na pala se, ne da pe, na gwan ke muluk pehir ge ɗogle ma pal to. 16Mbo gwan kat kaŋ a̰me ge mbarra ne Israyela vya ma pe to. A mbo gwan ke ya̰l mbe no ge gwan deŋge ta Masar ma ta to bat. Go no, a mbo kwa go, mbi Bageyal Bage ɗiŋnedin ne.»
17Del wara azi para ɓyalar go̰r ge paal ne go, dam ge zḛ ge ge saba ge zḛ ge ne go, Bage ɗiŋnedin jan mbi go: 18«Mo ndu dasana, Nebukadnezar gan ge Babilon ne e temel ge dṵṵl na asagar ma pal ne hal suwal Tir pe. Nama pala ma tu uzi, nama ganwak pala ma loose se, go no puy ɗe, ko na sḛ, ko na asagar ma, a be ɓol kaŋ mam a̰me ne temel dṵṵl ge a ne ke ne suwal Tir pe to. 19Ne no pe, Bageyal Bage ɗiŋnedin jan go: Ndi, mbi mbo ɓyan suwal Masar Nebukadnezar gan ge Babilon ne tok go, mbo abe na kaŋ gan ma, mbo pál na kaŋ paal ma kakaɗak, mbo pot na asagar ma ne nama. 20Ne na temel ge ne ke ma pe, mbi pot na vaswa suwal Masar, ago na asagar ma ke mbi temel, ka̰l ge Bageyal Bage ɗiŋnedin ne.»
21Dam mbe go, mbi mbo gwan pate pehir ge Israyela ne. Amma ne mo ɗe, mbi mbo hage mo wak jan fare nama buwal zi, go no, a mbo kwa go, mbi Bage ɗiŋnedin ne.
Currently Selected:
Ezekel 29: FGN2013
Highlight
Copy
Compare
Share
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
