Ezekel 14
14
Dok ho̰l ne naa ge ke sḭḭm ma
1Naa ga̰l ge Israyela ne ma mbut a mbo ya mbi ndwara se. 2Bage ɗiŋnedin jan mbi go: 3«Mo ndu dasana, naa mbe ma é bama dulwak ya bama kaŋ sḭḭm ma pal, a e ne bama ndwara zḛ kaŋ syal koo ge ne e nama wat ya̰l zi. Ne no pe, mbi da ne pool ya̰ tene a ɓyare mbi pe ɗaa? 4Ne no pe, jya̰ nama go, Bageyal Bage ɗiŋnedin jan go: Ndu ge daage pet ge ne Israyela vya ma buwal zi ge ne e na dulwak na kaŋ sḭḭm pal, ge ne e na ndwara zḛ kaŋ syal koo ge ne é na wat ya̰l zi, ka gwan gwan’a anabi ma ta, a mbi sḛ, mbi mbo gwan ne na fare janna ne. Swaga ge ne mbo ja, mbi mbo gwan ne na fare janna ɓase ge na kaŋ sḭḭm ma ne pal. 5Go mbe no, mbi mbo til Israyela vya ma dulwak, ne nama ne abe ta uzi ya ne mbi ta ne bama kaŋ sḭḭm mbe ma pe. 6Ne no pe, jya̰ Israyela vya ma go, Bageyal Bage ɗiŋnedin jan go: Gwa̰ me ya, abe me ta uzi ne aŋ kaŋ sḭḭm mbe ma ta, cigi me aŋ ndwara uzi ne aŋ kaŋ ge seŋgre kakatak mbe ma ta.
7Kadɗa ndu a̰me ne Israyela vya ma buwal zi, ko vya gwasal ge ne ka ne suwal Israyela go, abe tene ya uzi ne mbi ta, gá é na dulwak na kaŋ sḭḭm pal, hé na ndwara zḛ na kaŋ syal koo ge ne é na wat ya̰l zi, ka gwan mbo anabi ta, ago a mbi sḛ, mbi mbo gwan ne na fare janna ne. 8Mbi mbo saŋge mbi ndwara ya ndu mbe pal, mbi mbo saŋge na kaŋ cotɗa, mbi mbo ban na ne mbi ɓase ma buwal zi uzi. Go no, aŋ mbo kwa go, mbi Bage ɗiŋnedin ne.
9Kadɗa anabi a̰me ya̰ tene ya laseya, gá sot fare ma se janna, ago a mbi Bage ɗiŋnedin mbi lase anabi mbe ne. Mbi mbo ŋgay na mbi pool, mbi mbo ban na ne mbi ɓase Israyela vya ma buwal zi uzi. 10Anabi mbe sḛ poseya ne ndu ge ne mbo ele fare pe na ta, nama sḛ ma jwak a mbo in dṵṵl ge bama ya̰l ne. 11Ne da pe, na kaage Israyela vya ma ya̰me uzi ya kaal ne mbi ta to, nama gwan hat ta seŋgre ne nama kaŋ kerra ge sone ma to, nama gá mbi ɓase ma, mbi me, mbi gá nama Dok. Ka̰l ge Bageyal Bage ɗiŋnedin ne.»
A̰me ge tele sarya ge Dok ne to
12Bage ɗiŋnedin jan mbi go: 13«Mo ndu dasana, kadɗa suwal a̰me ke sone ya mbi ndwara se, ke kaŋ ge sone kakatak, mbi mbo ŋgay na mbi pool, mbi mbo burmi na kaŋzam ma uzi, mbi mbo kan kyamal ya na ta, mbi mbo hun naa dasana ma ne kavaar ma uzi. 14Ko naa ge ataa mbe ma, ndwara Nuhu, Danel#14:14 Danel: Maktub ge may ma zwagre na Danyel, amma a be Danyel ge ne njaŋge maktub ne to. A ndu ge ne ka zaman ge Nuhu ma ne Ayuba ma ne zi ya ne, maktub ge zum ge ma ŋgay go na ndu ge dosol ne zwama gḛ ge be to. Ndi 28:3., ne Ayuba, nama ka nama buwal zi puy ɗe, nama sḛ ma ɗeŋgo, a mbo má ta ne dosol ge bama ne pe. Ka̰l ge Bageyal Bage ɗiŋnedin ne#Eze 14:20, 28:3..
15Ko mbi kan kavaar ga̰l ma ya suwal mbe go. A mbo hun naa ge ne suwal mbe diŋ ma uzi kakaɗak, suwal mbe mbo gá pṵṵl. Ndu mbo gwan kale na go to ne kavaar mbe ma pe. 16Ko naa ge ataa mbe ma ka nama buwal zi puy, a mbo má ta ɗeŋgo. Ne jo̰ mbi da ne ndwara, ka̰l ge Bageyal Bage ɗiŋnedin ne, ko nama vya ge sonmo ma ne ge gwale a mbo má nama to, suwal mbo gá pṵṵl.
17Ko kadɗa mbi mbo e pore ja suwal mbe pal, mbi hon wak go pore za naa dasana ma ne kavaar ma ne suwal mbe diŋ uzi, 18ko naa ge ataa mbe ma ka nama buwal zi puy, a mbo má ta ɗeŋgo. Ne jo̰ mbi da ne ndwara, ka̰l ge Bageyal Bage ɗiŋnedin ne, ko nama vya ge sonmo ma ne ge gwale ma a mbo má nama to bat.
19Ko kadɗa mbi mbo tene mbogom ja suwal mbe pal, ko mbi sot mbi pore juliliya nama pal, ndwara pur naa dasana ma ne kavaar ma pe uzi, 20ko Nuhu, Danel ma ne Ayuba ma ka nama buwal zi puy ɗe, dosol ge nama ne mbo má nama ɗeŋgo. Ne jo̰ mbi da ne ndwara, ka̰l ge Bageyal Bage ɗiŋnedin ne, ko nama vya ge sonmo ma ne ge gwale ma a mbo má nama to bat.»
21Bageyal Bage ɗiŋnedin jan go: «Ko kadɗa mbi teme mbi mḛreya ge anda ge sone ma ya Ursalima pal, ndwara go pore, ne kyamal, ne kavaar ga̰l ma, ne mbogom ma ya ndwara hun naa dasana ma ne kavaar ma uzi, 22go no puy ɗe, naa a̰me ma mbut a mbo ɓur zum ne naa sonmo ma ne naa zaab ma buwal zi, a mbo mbo ya ɓol aŋ. Aŋ mbo kwa nama mborra ne nama kaŋ kerra ma. Aŋ laar mbo iyal ne sone ge mbi ne gene na ya Ursalima pal pe, ne kaŋ ge daage pet ge mbi ne zwá na ya na pal pe. 23A mbo iyal aŋ laar, ago aŋ mbo kwa nama mborra ma, ne nama kaŋ kerra ma. Go no, aŋ mbo kwa go, kaŋ ge daage pet ge mbi ne ke na ge suwal mbe go na baŋ yak to. Ka̰l ge Bageyal Bage ɗiŋnedin ne.»
Currently Selected:
Ezekel 14: FGN2013
Highlight
Copy
Compare
Share
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
