Wat zum 3
3
Dyanna ge Dok ne dya̰ tene Musa ta
(Tkm 7:30-34)
1Musa ka koy na tisi Yetro, bage tuwaleya ge suwal Madiyan ne gii ma. Mbo ne gii ma babur pul le may ya, ge njal Horeb, na ge a ne tol na njal ge Dok ne pe ya. 2Maleka ge Bage ɗiŋnedin ne dyan tene na ta ge ol ɗaabeya ge uwara vya ge kḭso dadab ne zi. Musa kwar uwara ka ɗaabe ol, amma uwara mbe til to. 3Musa jan tene go: «Ya̰ mbi saŋge tene ne le may ya ndil kaŋ ajab mbe no gale. Kyaɗa uwara mbe ba til to ɗaa?» 4Swaga ge Bage ɗiŋnedin ne kwa go, na saŋge tene le may pe go ndilla ɗe, Dok tol na ne uwara mbe zi ya: «Musa! Musa!» Na sḛ vin na: «Mbi né!» 5Dok jan na go: «Kaage mo ndar tene ya zi gwa to, fage mo tyarko ma ne mo koo zi uzi, ago swaga ge mo ne mḛ́ ne na go no ɗe, a swaga ge mbegeya ne.» 6Na sḛ gwan jan go: «Mbi Dok ge mo bá Abraham ne, ne Dok ge Isaku ne, ne Dok ge Yakub ne.» Musa woy na ndwara uzi, ne da pe, ka siya vo, na kaage na kwa Dok ndwara to.
7Bage ɗiŋnedin jan na go: «Mbi kwa yál njotɗa ge mbi naa ma ne suwal Masar go, mbi za̰ fyaso ge nama ne ne yál ge a ne ka ke nama pe, ago mbi kwa yál njotɗa ge nama ne kwa. 8Ne pe no, mbi ka̰ mbi koo ya se no, ndwara zur nama ne Masar ma tok go, ndwara abe nama ne suwal mbe no go mbo suwal ge siŋli, ne ge fiyal ya, suwal ge ne ɓul pam ma ne daaram, suwal ge Kanan ma, ne Hittitiya ma, ne Amoriya ma, ne Periziya ma, ne Hivit ma, ne Yebus ma ne kat ne go. 9Se no, fyaso ge Israyela ma ne det ja ɗiŋ mbi ta go, mbi kwa yál ge Masar ma ne ke nama. 10Ne se no, mbi teme mo mbo Faraon ta ya. Mbo, abe mbi naa Israyela vya ma ne suwal Masar diŋ ya zum.»
11Musa jan Dok go: «Mbi wuɗi ne koko ge mbi ba mbo Faraon ta ya, mbi ba abe Israyela vya ma ne suwal Masar diŋ ya zum ɗaa?» 12Dok jan na go: «A mbi mbo kat poseya ne mo ne. Kaŋ ge ŋgay go mbi teme mo ya ne no: Swaga ge mo ne mbo abe Israyela vya ma ja ne suwal Masar diŋ zum ɗe, aŋ mbo uware Dok njal mbe no pal.»
13Musa jan Dok go: «Mbi ma̰ mbo ya Israyela vya ma ta ya, mbi jan nama go: A Dok ge aŋ bá ma ne teme mbi ya aŋ ta ne. Kadɗa a ma̰ ele mbi ya go, a tol na dḭl gyana ɗe, mbi jan nama ma̰ gyana ɗaa?» 14Dok jan Musa go: «A MBI, A MBI ge ne go.» Gwan jan go: «A go no, mo ba gwan ne Israyela vya ma fare janna: A MBI teme mbi ya aŋ ta ne.» 15Dok gwan jan Musa go: «Jya̰ Israyela vya ma go: Bage ɗiŋnedin Dok ge aŋ bá ma ne, Dok ge Abraham ne, Dok ge Isaku ne, ne Dok ge Yakub ne teme mbi ya aŋ ta ne. No a mbi dḭl ne ɗiŋnedin, a mbo gá tol mbi dḭl mbe go no doŋ pe ma ne doŋ pe ma. 16Mbo kote ga̰l ge Israyela vya ma ne ma se, mo jan nama go: Bage ɗiŋnedin Dok ge aŋ bá ma ne, Dok ge Abraham ne, Dok ge Isaku ne, ne Dok ge Yakub ne dya̰ tene mbi ta ne. Na sḛ jya̰ mbi go: Mbi mbo so aŋ ko̰r, ne yál ge Masar ma ne ke aŋ pe. 17Mbi jan go: Mbi mbo ndage aŋ ne yál njotɗa ge aŋ ne ge ne suwal Masar go, mbi ba gene aŋ mbo suwal ge Kanan ma, ne Hittitiya ma, ne Amoriya ma, ne Periziya ma, ne Heviya ma, ne Yebus ma, ne ka ne go ya, suwal ge ne ɓul pam ma ne daaram ne go. 18A mbo za̰ mo. Aŋ ne ga̰l ge Israyela vya ma ne ma mwaɗak, aŋ ba mbo gan ge suwal Masar ne ta ya, aŋ ba jan na go: Bage ɗiŋnedin Dok ge Ibriniya ma ne dya̰ tene i ta. Se no, i kaɗe mo, ho̰ i viya̰ ge i ke dam ataa mborra babur pul go, i ba mbo tyare tuwaleya hon na. 19Mbi kwa kwa go, gan ge suwal Masar ne mbo ya̰ aŋ mborra to, ne pool mbḛ. 20Mbi mbo iyal Masar ma ne kaŋ ŋgayya ge ajab ma gale ɓya, ba ɗage ya̰ aŋ mborra. 21Mbi mbo é Masar ma kwar aŋ a̰se, swaga mborra go, aŋ mbo mbo tok baŋ to. 22Ndu gwale ge daage mbo ele na kon ge gulum pala, ne ndu ge ne kat ne na diŋ go, na ho̰ na kaŋ ge ne ɗeere ne fool kaal ma, ne kaŋ ge ne ɗeere ne dinar ma, ne ba̰r ma me. Aŋ mbo é nama aŋ vya sonmo ma ne aŋ vya ge gwale ma pal. Go no, aŋ mbo pwat kaŋ ma ne Masar ma tok go mwaɗak.»
Currently Selected:
Wat zum 3: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.