Wat zum 2
2
Tolla ge Musa ne
(Tkm 7:19-21)
1Ndu son a̰me ɗu ne pehir ge Levi ne zi, mbo san vya gwale ne hir ge Levi ne zi me. 2Gwale mbe eme tol vya son. Swaga ge ne kwa go na dore ɗe, woy na ɗiŋ saba ataa. 3Swaga ge ne kwa go na gwan day woy na to ɗe, her gum ge a ne tí na ne koko̰so, fat na se wawalat ne njiyal ma ne mboy. Dol na vya na pul go, mbo par na teer ma buwal zi, maŋgaɗam Nil wak go. 4Na ná vya ge gwale mḛ uzi kaal, ka ndil kaŋ ge ma mbo ke ne na ná vya ya.
5Faraon vya ge gwale mbo ya son tene maŋgaɗam Nil se, na kale ma ka anna mam wak go. Swaga ge ne kwa gum eya ne teer zi ya ɗe, teme na kale mbo her na ya. 6Swaga ge ne hage gum wak uzi, kwar vya son, ne fyalla. Kwar na a̰se, jan go: «A Ibriniya ma vya ne!» 7Na ná vya ge gwale jan Faraon vya ge gwale go: «Mo ɓyare go, mbi mbo tol mo Ibriniya ma gwale a̰me ya, na ba wal vya mbe ɗaa?» 8Faraon vya ge gwale jan na go: «Mbo!» Na sḛ mbo tol vya ná ya. 9Faraon vya ge gwale jan na go: «Ame vya no, mo wal mbi na, mbi mbo ka pot mo.» Gwale mbe ame vya, mbo wal na.
10Swaga ge vya mbe ne ha ga̰l, gene na mbo hon Faraon vya ge gwale. Gá dimma ne na ná vya ge son go, hon na dḭl Musa, jya̰ go: «Mbi twa na da mam se.»
Musa sya mbo suwal Madiyan
(Tkm 7:23-29)
11Dam a̰me ɗu, swaga ge Musa ne há ga̰l, mbo ndil na sele ma, kwar nama temel njoyya. Kwar Masar a̰me ne iyal na sele Ibriniya a̰me. 12Ndil na ziyar ma, kwar ndu a̰me to, hun na, mbul na kafeɗem zi. 13Dam ge kwap ge go, gwan’a, ɓol Ibriniya ma azi iyal ta, jan bage ne ke na kon ya̰l go: «Mo te iyal mo sele go gyana ɗaa?» 14Ndu mbe gwan ne na janna go: «A wuɗi e mo ga̰l, ko bage kun sarya i pal ne ɗaa? Mo ɓyare hun mbi dimma ne mo ne hṵ ndu ge Masar go’a?» Musa hat vo, jan tene go: «A fareba, a kwar fare mbe pe go.» 15Swaga ge Faraon ne za̰ fare mbe ɗe, ɓyare viya̰ go na hun Musa uzi. Amma Musa sya Faraon ndwara zḛ, mbo kat suwal Madiyan ya. Mbo kat tub wak go.
16Bage tuwaleya ge suwal Madiyan ne, da vya gwale ma ɓyalar. A mbo ya gàn mam wi swaga njot mam ge kavaar ma ne ndwara hon bama bá gii ma. 17Naa ge koy kavaar ma mbo ya, a yan nama uzi. Amma Musa za̰me digi, ɗaŋge nama pe, hon nama gii ma mam. 18Swaga ge a ne gwa̰ ya bama bá Rewuyel ta, jan nama go: «A ma kaŋ ke ne, aŋ ba gwan’a ma̰ avun go ɗaa?» 19A jan na go: «Ndu ge Masar a̰me ɗaŋge i pe ge be ge i ɓol yál ne naa ge koy kavaar ma tok go ne. A na sḛ gá̰ mam hon i kavaar ma njotɗa ne me.» 20Na sḛ jan na vya gwale ma go: «Na sḛ ya da ɗaa? Aŋ te ya̰ ndu mbe ya kyaɗa? Tó me na ya, na mbo ya zam kaŋzam.»
21Musa vin kat ndu mbe diŋ. Na sḛ hon Musa na vya ge gwale Sefora. 22Sefora tol na vya son, hon na dḭl Gerchom, ago ka janna go: «Mbi ndu ge mbay ne ne naa suwal go.»
Talla ge Musa ne ne zur Israyela vya ma pe
23Del ma kale bergetek, gan ge Masar ma ne su. Go no puy ɗe, Israyela vya ma gale ne njoyya ne sun ta temel mo̰r kerra zi. Fyal ta ge nama ne swaga temel mo̰r zi det Dok ta digi ya. 24Dok za̰ sun ta ge nama ne, dwat ne na wak tuli ge na ne ke ne Abraham, ne Isaku, ne Yakub. 25Dok ndil Israyela vya ma, kwa nama yál njotɗa.
Currently Selected:
Wat zum 2: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.