Bage oy fare 12
12
1Bool ge mo ne zi, dwa ne mo Bage dolla tek ge swaga ge sone ma gale ne be yan’a, ko del ge mo ba ɗage janna go: «Mbi zá̰ tuli ge gwan kat ne ndwara to.»
2Tek ge gyala ma ne kwaya̰l, saba ma ne guwa̰r ma gale ne be sebe se tṵ ɗeɗek to, ge pḭr gwan gwan’a go̰r ge mam swarra ne go to.
3Swaga mbe go, naa ge koy yàl ma mbo gá ndatɗa, naa ge pool vivir ma mbo gá mbo viya̰ kudgiya, swara nanna mbo á, ne naa zaab ge nan swara ma ne gá woɗege pe, nama ge ne njole swaga ne zok ndwala ma go ma ndwara ma mbo lar.
4Swaga mbe go viya̰ wak ga̰l mbo dibi digi, njal nanna vinna mbo á, njoole fyaso gagak mbo kore naa, kaŋ mballa ma mbo á.
5Swaga mbe go swaga haal ŋgeɗo puy na ndeya gá ke na yál, gá sya viya̰ mborra vo. Ago na pala susu ɓoy ya saal teret dimma ne uwara Amande wak ɓoyya go, nege ya dṵṵl ne tere ne nege dṵṵl go, kaŋ ge ne é kaŋzam ame wak, na camam be gwan gá ne na ta to.
Swaga mbe go ndu dasana mbo gwan na swaga katɗa ge ɗiŋnedin ya. Ago naa ge mbal sḭ ma wi viya̰ pul ja.
6Dwa ne na, tek ge táál ge fool kaal gale ne be syatɗa, seɗe ge dinar gale ne be ɓaya, tóól gale ne be ɓaya tub wak go, kaŋ ge a ne zwal táál na ta pwat mam gale ne be det tub pul se ya to.
7Tek ge suwar lugɗum gale ne be gwan na byalam ge zaŋgal suwar se, o̰yom gale ne be gwan Dok ge ne ho̰ na na zi ta ya.
8A a̰me pe ne to, bage oy fare jan ne, kaŋ ma pet a a̰me pe ne to.
Fare ge pe aya
9Bage oy fare be kat zwama ɗeŋgo to, na sḛ uwale, hate naa kwarra, ka zá̰ fare ma, ka hale nama pe, ke fare sḭ ma gḛ ge be to. 10Na sḛ á tene go, na ɓó fare ge tuli ma, njaŋge fare mbe ma dosol zi, fareba pal.
11Fare janna ge naa ge zwama ma ne a dimma ne walam wak zwabal go, cya̰me naa digi temel ta, nama kaŋ njaŋgeya ma a dimma ne kaŋ ge ne ɗù ɗur se ŋgay naa viya̰ mborra ge jwap go. A bage koyya ge ɗu ho̰ nama fare mbe ma ne.
12Mbi vya, ke haŋgal, kaage mo gwan kan fare pal ta to. Maktub ma njaŋgeya á to. Hale fare pe lilit lwage naa lwage.
13Zá̰ me nee fare ge pe aya: kaŋ ge ndu dasana ne mbya kerra, ago na sya Dok vo, na koy na eya ma me.
14Ago Dok mbo gene kaŋ kerra ge ɗimil ge daage ya swaga sarya go, ko ge kwaɗa, ko ge sone.
Currently Selected:
Bage oy fare 12: FGN2013
Highlight
Share
Compare
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
