Temel kerra ma 24

Kaŋgeya ge Bulus ne

1Dam anuwa̰y go̰r go, kep tuwaleya Hananiya, poseya ne naa ga̰l ma, ne ndu ge ɗaŋge bama pe Tertullus me, a det ya me, a gene bama maktub kaŋgeya ge Bulus ne ya hon bage ne do na ndwara ne suwal pal. 2Swaga ge a ne tó na ya, Tertullus her fare janna go: «Da ne mo pe, ne nṵsiya ge mo ne nṵsi suwal ne ɓase mbe ma no pe, i ɓo swaga katɗa halas no. 3Ndu ga̰l ge ɓaŋlaŋ Felise, ɗaɗak, ne swaga ma go pet i ame na da ne laar saal. 4Amma ne her mo swaga ma bergetek to pe ɗe, i kaɗe mo, mo za̰ i nde kwa a̰se ge mo ne zi. 5I ɓo go ndu mbe no a mbogom ne, gene ya iigiya Yuda ma buwal zi ge dunya zi pet, na sḛ ga̰l ge naa ge ne hon hateya ge sone ge naa ge suwal Nazaret ma ne ne. 6Ɓyare go na hat zok ge mbegeya seŋgre, i wa̰ na no. [I ɓyare go i kun na sarya eya ge i ne ma pal, 7Amma asagar ma ga̰l Lisiyas zu ya no, maŋge na ne i tok go ne pool no, 8a na ho̰ wak ne go naa ge a ne kaŋge na ma mbo ya mo ndwara se.]#24:8 Swaga mbe no ne maktub ge zaŋgal a̰me ma zi to. Mo da ne pool ele na fare, mo ma̰ ɓol fare ge i ne kaŋge na ne na pe.» 9Yuda ma vin na fare mbe, a jan go na jan fare ge fareba.

Bulus ɗaŋge tene pe Felise ndwara se

10Swaga ge bage ne do na ndwara ne suwal pal ne ho̰ na viya̰ jan fare, Bulus jan go: «Mbi kwa kwa go mo ke ya del ma gḛ swaga kun sarya suwal mbe no go, uwale mbi ɗaŋge tene pe mo ndwara ma̰ be vo. 11Dam ke ma̰ ya no wol para azi ge mbi ne mbo Ursalima mbo uware Dok, mo da ne pool hale pe, 12ndu a̰me be ɓol mbi zok ge mbegeya zi, ko Sinagog ma zi, ko suwal diŋ ne sigɗi fare ne ndu a̰me, ko ne par fare ne naa zi nama ɗage ne fare digi to. 13Naa mbe ma no a ne pool jan mo fare zum waŋ go bama e fare mbi pal da ne fare ge no pe to. 14Ndi, mbi jan mo go: Mbi ke temel mo̰r hon Dok ge i bá ma ne ge viya̰ ge nama sḛ ma ne tol na hateya ge sone go. Mbi hon fareba kaŋ ge ne njaŋge ne eya ma zi ma ne kaŋ ge ne njaŋge ne maktub ge anabi ma ne zi pal. 15Mbi da ne jobreya mbe no ne Dok ta, dimma ne nama sḛ ma go me, ago tanna ya go ne naa ge dosol ma ne naa ge dosol to ma pe me. 16Da ne pe no mbi á tene no go, Dok ndwara se, ko naa dasana ma ndwara se, fare a̰me ge wan mbi na ka to. 17Go̰r del ma kaal ge mbi ne zum ya, mbi gwa̰ ya suwal diŋ no ndwara ke bobo hon mbi pehir ma, ndwara tyare tuwaleya hon Dok me. 18A go mbe no a mbo ya ɓol mbi zok ge mbegeya zi no swaga hat tene yaɗat go. Pala vwalla a̰me, ko iigiya a̰me be kat to. 19Amma Yuda a̰me ma ge ne ɗage ne suwal Asiya ya ... a nama mbo te ya mo ndwara se kaŋge mbi ne, kadɗa a da ne fare a̰me ho̰l ne mbi. 20Kadɗa go to, naa ge ne mo ndwara se mbe ma no nama jya̰, swaga ge a ne mbo ne mbi Yuda ma naa ga̰l ge kun sarya ma ndwara se ya a ɓo ma ya̰l ge mbi ne ke ɗaa? 21Ta da ne fare ge mbi ne mḛ digi nama buwal zi jan nama pe kyala: Da ne tanna ge siya ma ne pe a mbo ne mbi ya mo ndwara se ke sarya ma̰ no.»

22Ne jo̰ Felise wan fare ge viya̰ mbe ne pe wan gagaraw ɗe, dol nama sarya mbe digi, jan nama go: «Swaga ge ga̰l ge asagar ma ne Lisiyas ne mbo mbo ja, mbi mbo gwan kat aŋ fare mbe pal.» 23Hon asagar ma ga̰l wak go nama koy na daŋgay amma nama ya̰ na suli nde, ndwara go na kaam ma ba ka mbo ya mbar na.

Felise ma ne na gwale Drusilla tol Bulus ya ndwara za̰ na

24Dam ma kwaɗa lwak go̰r go, Felise ma ne na gwale Drusilla, na ge a Yuda ne, a mbo ya. Dol temel a tó na Bulus ya, na za̰ na fare janna ge hon fareba Jeso Kris zi pal. 25Ne jo̰ nama fare sigɗiya ka fare ge dosol, ne wan ta, ne sarya kunna ge dam ge hṵsi ne pal ɗe, Felise dulwak wanna, jan na go: «Se no gwa̰, mbi mbo gwan tol mo ya dam ge ɗogle go.» 26Ka dwat go Bulus ma̰ hon na bware, da ne pe no, ka tol na ya no ndwara wowol sigɗi fare ne na. 27Swaga ge del azi wak ne wi, Porkiyos Festus er Felise. Ne jo̰ Felise ka ɓyare ke Yuda ma sḛ tuli ɗe, ya̰ Bulus daŋgay zi.

Currently Selected:

Temel kerra ma 24: FGN2013

Highlight

Copy