Temel kerra ma 23

1Bulus dol na ndwara ge Yuda ma naa ga̰l ge kun sarya ma ndwara zi, jan go: «Ná vya ma, ɗiŋ ma̰ no, mbi ke mborra Dok ndwara se be ge mbi dulwak wan mbi ne fare a̰me.» 2Kep tuwaleya Hananiya, hon naa ge ne ka na ta gwa ma wak go nama yá na na wak zi. 3Bulus jan na go: «Gulum ge petɗa, a Dok mbo iyal mo ne! Mo ka ne mo tandal sarya go ndwara kun mbi sarya eya ma pal, mo ka hon wak go a iyá mbi eya pal to me’a!» 4Naa ge ne ka swaga mbe go ma jan go: «Mo sal kep tuwaleya ge Dok ne’a!» 5Bulus jan go: «Ná vya ma, mbi be kwa go na kep tuwaleya ne to, a njaŋge go: Mo mbo vḛne mo wak ga̰l ge mo ɓase ma ne pal to bat#Wat 22:27..»

6Bulus ka da ne kwarra go, ne Yuda ma naa ga̰l ge kun sarya ma buwal zi, mbut ma Saduki ma ne, mbut ma Farisi ma ne me. Ndage na ka̰l oyya swaga sarya go go: «Na vya ma, mbi Farisi ne, Farisi ma vya ne! Kadɗa a mbo ne mbi ya swaga sarya go, da ne jobreya ge nee ne pe, ndwara go tanna ge naa ge siya ma ne!» 7Swaga ge ne jya̰ fare mbe no, gool ɗage Farisi ma ne Saduki ma buwal zi digi, naa varse se pe azi. 8Ago Saduki ma jan go, tanna, ko maleka, ko O̰yom to, amma Farisi ma kwa kaŋ mbe ma kwa pet. 9Ko̰r ge ɓaŋlaŋ ɗage nama buwal zi digi, naa ge njaŋgeya ge ne Farisi ma buwal zi ma ɗage digi, a jan go: «I be ɓol a̰me ge sone ne ndu mbe no ta to. A o̰yom, ko maleka a̰me jya̰ na fare ne kyala?» 10Ne jo̰ gaage ge nama ne mbe saŋge ga̰l ge be to, ne vo ge go nama ma̰ hat hun Bulus ɗe, asagar ma ga̰l hon na asagar ma wak go nama mbo wan Bulus ne nama buwal zi ya uzi, nama mbo dol na daŋgay zi. 11Ɗaal mbe zi, Bageyal dyan tene na ta, jan na go: «Wa̰ mo dulwak! Dimma ne mo ne ke mbi sayda Ursalima diŋ go, a kwaɗa go mo mbo ke mbi sayda suwal Roma ya go no me.»

Yuda ma guni ta go bama hun Bulus

12Swaga ge swaga ne ko̰y, Yuda ma vwal wak ne guniya go bama zam kaŋ, ko njot a̰me to, ɗiŋ bama hun Bulus ɓya. 13Naa ge a ne guni ta ma a ka waɗe naa wara anda. 14A mbo ɓol naa ge ke tuwaleya ma ga̰l ma ne naa ga̰l ma, a jan nama go: «I guni ta go i zam a̰me to, ɗiŋ i hun Bulus gale ɓya. 15Aŋ ɗe, se no, za̰ me ta ne Yuda ma naa ga̰l ge kun sarya ma, jya̰ me asagar ma ga̰l go na mbo ne aŋ Bulus ya aŋ ba hale na fare pe kwaɗa. I sḛ ma ɗe, i Nṵsiya, i hun na zḛ tek ge na dé ya aŋ ta.»

16Amma Bulus ná vya ge gwale vya za̰ fare mbe, mbo daŋgay zi ya mbo jan Bulus pal. 17Bulus tol asagar ma ga̰l a̰me ya, jan na go: «Ɗame vya dore mbe no mbo aŋ ga̰l ta ya, da ne fare ge jan na.» 18Asagar ma ga̰l mbe wan na, gene na bama ga̰l ta ya, jan na go: «Daŋgay Bulus tó mbi ne, jya̰ mbi no go mbi gene vya dore mbe no ya mo ta, na da ne fare ge jan mo.» 19Asagar ma ga̰l mbe wan na tok, a ne na abe ta uzi ya nde, ele na go: «Mo ɓyare jan mbi ma fare ɗaa?» 20Vya mbe jan na go: «Yuda ma za̰ ta go bama kaɗe mo, mo gene bama Bulus ya swaga sarya go kwap, ne son go bama hale na fare pe. 21Kaage mo vin nama to. Ago naa ya go waɗe wara anda ge a ne huli ne viya̰ go, a guni ta go bama zam kaŋ, ko njot a̰me to ɗiŋ bama hun na gale ɓya. A nṵsi ne go nṵsi, a da̰re ne go vinna ge mo ne ɗeŋgo.» 22Asagar ma ga̰l mbe jan vya dore mbe go na kaage wan ndu ge ɗogle fare mbe pe to. Ya̰ na mborra.

A teme Bulus mbo bage ne do na ndwara ne suwal pal ta ya

23Tol ga̰l ge asagar ma ne ma ya azi, jan nama go: «Nṵsi me ta mbo Sezare ɗaal gyala pe#23:23 Ɗaal gyala pe mbe mbo kaŋ ge ler lamaɗo ge ɗaal go., abe me asagar ma kikis azi, ne naa ge ne tisi ma wara ɓyalar, ne naa ge ne deŋso ma kikis azi me. 24Nṵsi me tisi ma ne Bulus pe me, ne da pe aŋ ba gene na mbo hon Felise, bage ne dó na ndwara ne suwal pal be ge fare a̰me ɓol na.» 25Njaŋge maktub mbe no hon nama tok go me:

26«A mbi Klodiyus Lisiyas, mbi san ndu ga̰l ge ɓaŋlaŋ Felise, bage ne do na ndwara ne suwal wak ne! 27Ndu mbe no, Yuda ma wa̰ na, a ɓyare hun na hun, swaga ge mbi ne maŋge na ne nama tok, mbi za̰ no go na vya suwal ge Roma ne ne. 28Mbi ɓyare kwa fare ge a ne e na pal pe, mbi gene na ya nama naa ge kun sarya ma ndwara se no. 29Mbi ɓo go fare ge a ne e na pal, a fare ge nama eya ma ne, amma fare ge ne mbya a kun sarya ge siya na pal, ko a dol na daŋgay zi to. 30Swaga ge mbi ne za̰ nama vwa wak ya na pal ndwara hun na ɗe, mbi teme na ya hon mo no, mbi jya̰ naa ge a ne e fare na pal ma no go, nama mbo kaŋge na mo ndwara se ya.»

31Asagar ma ke dimma ne a ne ho̰ bama wak go, a wan Bulus, a mbo ne na ɗaal zi ɗiŋ mbo suwal Antipatris. 32Swaga ge swaga ne ko̰y, a ya̰ naa ge tisi ma mbo ne na, a gwan’a daŋgay wak go. 33swaga ge a ne dé ya suwal Sezare go, a hon bage ne do na ndwara ne suwal pal maktub mbe, a gene Bulus ya na ndwara se me. 34Swaga ge ne isi maktub mbe ɗe, ele go na ndu ge suwal ge daage ne ne de. A jan na go na ndu ge suwal Kilikiya ne. 35Jan go: «Mbi mbo za̰ mo swaga ge naa ge ne kaŋge mo ma ne mbo yan ja.» Hon wak go a koy na Herodus yadiŋ.

Currently Selected:

Temel kerra ma 23: FGN2013

Highlight

Copy