Rômiunut 11
11
Israêlitit ajaktortauᴋôrtut sukutsiane sâgiaromârninginik piulijaujomârninginik. Gudib aulatsingita tatamnadlartut nertortauninginik.
1Tagva mâna oᴋarpunga: Gûdib inuᴋotine ajaktulauᴋpagît? Taimaitsangilaᴋ. Uvangatauᴋ Israêlitiogama, Abrahab kinguvârivânga, Benjaminikut illagivânga.
2Gûdib inuᴋotine sivorngagut illitarijane (anerijane) ajaktulaungilait. Kaujimangipisigiglônêt aglait Eliasemik oᴋartût? ᴋanoᴋ Israêle patsitigilugo Gûdib sânganut pingmat, oᴋarmallo:
3Nâlegaᴋ, nalautaijoᴋotitit toᴋolauᴋpait, Altâreᴋotitillo serᴋomilauᴋpait; kissimilo amiakôvunga toᴋonasuarpângalo.
4Kanorle Gûdib kiovaûk? “Uvamnut amiakoᴋartitsilauᴋpunga angutinik 7,000 inik, Baalib sânganut sêrᴋortulaungitunik.” #I Atan. 19:10,18.
5Taimaktauᴋ naliutome tamattomane amiakoᴋarivoᴋ saimanermut (nâpkiningnermut) anerijaujunik.
6Saimanermulle pigunik, piniarnermut pingilat; taimaingipat saimaneᴋ saimaniojungnairpoᴋ. Piniarnermulle pigunik, saimanermut pingilat; taimaingipat, piniarneᴋ piniarniojungnairpoᴋ.
7Kanoᴋ tagvâ? Israêlib ᴋenertane pilaungilâ; anerimajulle pivât, assingit mangaitisimavut.
8Sorlo aglaksimangmat: Nâlekab anerneᴋ siningnartoᴋ kovingmago ilipsingnut, ijiselo nalautaijut mattulugit, niaᴋoselo takotitjuteᴋartut uliklugit. #Deut. 29:4; Jes. 29:10.
9Dâvidelo oᴋarpoᴋ: Nerrivitik nigarilitsuk, mikigiarilugolo, aporvigilugolô, akkiniarutigilugolo pigilitsuk;
10Ijingit takpêtikit takojungnairᴋovlugit, sorairatiglo ᴋemerdlungit okkungatikit. #Img. 69:23.
11Oᴋarpunga tagva: Kataᴋovlugit apornerᴋât? Taimaitsangilaᴋ! Taipkoale katangninganit nalojut piulijauneᴋ pigilerpât, (Jûdit) tâpkoninga ilungertordlutik maligasuarᴋovlugit.
12Taipkoale katangningat silaᴋsoarmiut akluitigingmatsuk, taipkoalo ikitlijauningat nalojut akluitigingmatsuk; ᴋanoᴋ tamanna piluaromârᴋâ, ilûnamatsiatik katititaulerêrpattâ?
13Ilipse nalojunit pijose oᴋarvigivapse; nalojunut Aposteliogama; tamanna kivgartornera nertôtigivara,
14Taipkua uvingijakka kajungersainimut illungertortilugit pijungnarmangârma, piuliniarlugit illangit.
15Taipkoa ajaktortauninganut silaᴋsoarmiut saimarsauteᴋalermatta, ᴋanoᴋ tagva illaliortauningat ilingajomârᴋa? inôsiojomârpoᴋ sorlo toᴋungajunit.
16(Sanaukab sanamajub) sivorlerpângat ivjornaikpat, niaᴋôjaksaᴋtauᴋ ilûnane ivjornainivoᴋ; amârlo ivjornaikpat, akkerungittauᴋ ivjornainivut.
17Akkerungitale illangit naviksimagalloarmatta, igville orᴋsuliksamik napârtutsiangolaungitotit, akornganut ivertitauleravit napârtutsiab orᴋsuliksab amânganik iptinganiglo illangiusimavlutit;
18Nertôtiniarnak akkerᴋunut (nachogilugit)! Nertôtiguville tâpkonunga, erᴋainiarit, amâᴋ ᴋaleringilat, amâble ᴋalerivâtit.
19Tagva oᴋarpotit: Akkerᴋut naviksimavut uvanga ivertitauᴋovlunga.
20Naumâne, naviksimavut, okpinginingit pivlugit, igville nangerpotit okpernikut; piojoriniarnak sivôragille!
21Gûdib ingergarmik akkerôjut ivlerilaunginamigit igvittauᴋ ivlerinajanginivâtit.
22Tamanna pivlugo Gûdib pitsiarninga sivôranarningalo nautsertulikik; sivôranarninga kataksimajune; pitsiarningalo ilingne, iperangikungne pitsiarninga; iperarungnele, igvittauᴋ kipijaujomârpotit.
23Ipkoalo ivertitaujomârivuttauᴋ, okpinginermêtsainangipatta; Gûdib ama ivertitsungnaralloarpait.
24Igville pêrtaumajotit napârtomit orᴋsoliksamit ingminik perortomit, ilusinga akkerartorlugo ivertisimaguvit napârtutsiamut orᴋsoliksamut; anginersamik tagva ingergarmik akkerôjut napârtomingnut orᴋsuliksamut ivertitaujomârput.
25Katangutikka, nangminipsingnik silatunasugerᴋonase, naloᴋojomangilapse nalonartomik tamattominga: Israêlib kinguvângita illangit mangaitisimavut, nalojut (sâgiaromârtut) unurningit nâmakserᴋârtinagit,
26Taimaglo Israêlitit ilûnaita piulijauᴋovlugit; sorlo aglaksimangmat: Zionemulle piuliklerte tikitsomârpoᴋ sâgiartunullo tapatonermit Jâkokune;
27Tamadjalo angerutiga taipkununga, ajorningit pêjarniarupkit. #Jes. 59:20,21; 27:9.
28Oᴋautsit tussarnertut maliklugit ômigijauvut (Gûdemut) ilipse pivluse; anerimanerle maliklugo nagligijauvut, atâtat pivlugit.
29Gûdib tunergutine ᴋaiᴋojininelo ᴋaᴋialerutigingilait.
30Sorlo ilipsetauᴋ itsaᴋ okpingitôlaurapse Gûdemut, mânale nâpkigijaulerdluse, taipkoa okpingimatta,
31Taimaktauᴋ taipkoa mâna okpingilat, ilipse nâpkigijaunise pivlugo taipkoatauᴋ nâpkigijauᴋovlugit.
32Gûdib tamaita okpinginermêtituinalauᴋpait, tamaita nâpkigijomavlugit.
33Inornarmêk Gûdib akluitoᴋsôningata itininga, tamangnik: silatujoᴋsônermik nalotuitoᴋsônermiglo! Ila tâpsoma kajusimaningit tukkisijaujungnangilat, apᴋotingillo nautsertortaujungnaratik!
34Kiale Nâlekab issumanga illisimavaûk? kialônêt ajoᴋertulauᴋpaûk? #Jes. 30:13.
35Kialônêt tunitjivigerᴋârpaûk sumik, akkiniartaumilunê?
36Tâpsomangat, tâpsomûnalo tâpsomungalo ilûnamatsiatikingmatta. Tâmna nertortaudlarle issoᴋangitomut. Amen.
Currently Selected:
Rômiunut 11: LIHB08
Highlight
Copy
Compare
Share
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
