Numbers 30
30
1Mosesiblo Israêlib kinguvârêngita angajoᴋângit oᴋarvigivait, oᴋarlune: Tamadja tagva Nâlekab perᴋojijutigijanga.
2Angut angermaringnermik angerune Nâlekamut, angermarigune nelâgut oᴋarmariklune tarnine ᴋelaksorlugo, oᴋausine unioraksarilungilâ; ᴋanerminille anijoᴋ maliklugo piniarmariktuksauvoᴋ.
3Taimaktauᴋ arnaᴋ angermaringnermik angerune Nâlekamut, ᴋelaksorlune nangminerminik oᴋauserminut ᴋelak sûtigijaminut, atâtame iglunganêdlune suli, inôsuktôvlune;
4Atâtangatalo angermaringninga oᴋausingalo ᴋelaksûtigijanga tarniminik tusarpago, nipangervigikpagolo, tagva angerningit soᴋosingituksauvut, oᴋausingillo ᴋelaksûtigijangit tarniminik soᴋosingituksauvut.
5Atâtangatale inerterpago uvlorme tusarvigijamine, angerningita tarnimelônêt ᴋelaksûtigijangita neliat soᴋosingituksaungilaᴋ; Nâlekablo issumagijungnaiviginiarpâ, atâtangata inertermago.
6Ueᴋarlunele angermaringnermik erᴋsugune, silainartomiglônêt oᴋarsimagune, tarnine ᴋelaksorlugo,
7Uingatalo tusarpago inertertaililugolo uvlorme tusarvigijamine, tagva angerningit soᴋosingituksauvut, oᴋausingillo ᴋelaksûtigijangit tarniminik soᴋosingituksauvut.
8Uingatale inerterpago uvlorme tusarvigijamine tâpsominga, tagva angermaringninga erᴋsuktanga, oᴋausingalo silainartoᴋ, ᴋaninganit anijoᴋ, ᴋelaksûtigijanga tarniminik, sunaungititaksarivâ, Nâlekablo issumagijungnaiviginiarpâ.
9Uigarnerûble avitaumajûblônêt angermaringninga, tarniminiglo ᴋelaksûtigijanga sunaugaloarpat, soᴋosingituksauvoᴋ.
10Uigilauᴋtamele iglungane angermarilaurune, tarninelônêt ᴋelaksulauruniuk oᴋauserminut,
11Uigilauᴋtangatalo tusalauᴋpago, nipangervigilugolo inerterlaungipago, tagva angermaringningit ilûnatik soᴋosingituksauvut, oᴋausingillo ᴋelaksûtigijangit tarniminik soᴋosingituksauvut.
12Uingatale sulingitilauᴋpagit nelautsititaksaujungnaitilugillo uvlorme tusarvigijamine tâpkoninga, tagva anilauᴋtut ilûnatik ᴋaninganit angermaringningit pitjutigilugit, ᴋelaᴋsûtillo tarniminik pitjutigilugit, soᴋosertuksauvut; uingata sulingitipait; Nâlekablo issumagijungnaiviginiarpâ.
13Angermaringnerit tamaita, oᴋautsillo ᴋelaksûtaujut oᴋumaiksartitsijut tarnemik tamaita, uingata maliktauᴋojungnarpait inerterutigijungnarpaillônêt.
14Uingatale uvlormit uvlormut nipangervigênarpago, tagva palangatipait angermaringningit tamaita, ᴋelaksûtingillo erᴋsuktangit tamaita; palangatipait nipangervigingmago uvlorme tusarvigijamine tâpkoninga.
15Sulingitipagille nelautsititaksaujungnaitilugillo tusarêramigit kingorngane, tagva nuliame idluituliningit nangmaraksarivait.
16Tamadja tagva maligaksat Nâlekab perᴋojijutigijangit angut nuliangalo pivlugik, atâtaujorlo paningalo inôsuktoᴋ atâtame iglunganêtoᴋ sulle pivlugik.
Currently Selected:
Numbers 30: LIHB08
Highlight
Copy
Compare
Share
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
