Numbers 27
27
1Josefiblo erningata Manassib kinguvângita ilangata erningata Makirib erningata Gileadib erningata Heferib erningata Zelofehadib paningit tikilerput; paningillo attingit imaiput: Mala, Noa, Hogla, Milka, Tirzalo.
2Nangerpullo Mosesib Eliasariblo ajoᴋertuijûb, angajoᴋâllo, ilagêktoᴋsuillo ilûnatik, sângane, ilagêktut tupingata upkoangane, oᴋarlutik:
3Atâtavut inôjungnailauᴋpoᴋ sunaᴋajuitome, pikablâᴋatigêktunullo Nâlekamik Koramut ilanginullo, ilaulaungilaᴋ; idluininele pivlugit toᴋolauᴋpoᴋ; erneᴋalaungilarlo.
4Sôᴋ atâtapta attinga pêjartaujuksauvâ kinguvângoᴋatigijanginit, erneᴋalaungininga pitjutigivlugô? Nangminerijaksaptingnik tunitjivigilauᴋtigut atâtapta ᴋatangutingita akorngane.
5Mosesiblo tâpkoa pitjutigijangat âpâ Nâlekab sânganut.
6Nâlekablo Mosese oᴋarvigivâ, oᴋarlune:
7Zelofehadib paningit idluartomik oᴋarput: kingormgutijaksamik nangminerijamingnik tunitjivigijaksarivatit atâtangita ᴋatangutingita akorngane; atâtangita kingormgutijaksanga tunijaksarivat tâpkonunga.
8Israêlikullo oᴋarvigijaksarivatit, oᴋarlutit: Inuk inôjungnaipat erneᴋarane, kingormgutijaksanga tunijaujuksauvoᴋ paninganut.
9Paniᴋangipallo kingormgutijaksanga tunijaksarivase ᴋatangutinginut.
10ᴋatanguteᴋangipallo, kingormgutijaksanga tunijaksarivase atâtangata ᴋatangutinginut.
11Atâtangalo ᴋatanguteᴋangipat, kingormgutijaksanga tunijaksarivase ilagijanganut ᴋaninerpaujomut tâpsomunga kinguvârêngningane; tamadja maligaksauvoᴋ idluarsainerme Israêlikunut, sôrlo Nâlekab Mosese perᴋolaungmago.
12Nâlekablo Mosese oᴋautivâ: Majorarit ᴋaᴋᴋamut omunga Abarimut, nunalo tunimajara Israêlikunut ulernairtoruk.
13Ulernairêrungnelo, igvittauᴋ ilaliudjaulârpotit sivorlerijarnut, sôrlo angajuit Aron ilaliudjaulaungmat;
14Oᴋausera tapagilauraptiko sunaᴋajuitome Zineme ilagêktoᴋsuit aivadlarningine, ivlernartilaunginaptinga tâpkoa ijingita sângine. (Tamadja immit akkerartorvit Kadeseme sunaᴋajuitome Zineme.)
15Mosesiblo Nâlegaᴋ oᴋarvigivâ, oᴋarlune:
16Nâlekab uvinilit ilûnatik anerningita Gudingata angut angajoᴋaujuksaᴋ ilagêktoᴋsoarnut anneriliuk,
17Anisârtuksaᴋ tâpkoa sivuningine, itersârtuksarlo tâpkoa sivuningine, tesiortuksaᴋ tâpkoninga aulartilugit tikitilugillo; Nâlekab ilagêktoᴋotingit saukatitut mianerijeᴋangitutitut iᴋonagit.
18Nâlekablo Mosese oᴋautivâ: Josua, Nunib erninga, ilagiuk, angutaujoᴋ anernermik ilumilik, aggangnullo patingmiuk;
19Eliasariblo ajoᴋertuijûb sânganôrtiuk ilagêktullo iluengartut sânginut; perᴋoleruglo tâpkoa takkoane.
20Opinautigijavillo ilanga iliuk tâpsomunga, ilagêktoᴋsuit Israêlikut iluengartut tusâᴋovlugit.
21Eliasariblo ajoᴋertuijûb sângane nangertuksauvoᴋ, tâpsomalo ᴋaumaᴋutib idluarsaininga atorlugo Nâlekab sângane aperᴋutigijaksarivâ; tâpsoma oᴋausinga maliklugo anijuksauvut, tâpsomalo oᴋausinga maliklugo itertuksauvut, tâmna, Israêlikullo ilûnatik tâmna ilagilugo, tagva ilagêktoᴋsuit iluengartut.
22Moseselo taimailiorpoᴋ, sôrlo Nâlekab perᴋongmago; Josualo ilagivâ pitilugolo Eliasarib ajoᴋertuijûb sânganut, ilagêktullo iluengartut sânginut;
23Patingmivâlo aggangminut perᴋolugolo sôrlo Nâlegaᴋ oᴋalaungmat Mosesemut.
Currently Selected:
Numbers 27: LIHB08
Highlight
Copy
Compare
Share
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
