Numbers 19
19
1Nâlekablo Mosese Aronelo oᴋarvigivak, oᴋarlune:
2Tamadja maligaksat ilutsingat, Nâlekab perᴋojanga, oᴋarlune: Israêlikut oᴋautikit âtsiᴋovlugit ilingnut tuktuvangmik aupaluktomik piodlarmariktomik ᴋanoetoᴋangimariktomik nangmautemiglo atulaungitomik suli;
3Tunijaksarivaselo Eleasaremut ajoᴋertuijomut, tâpsomalo âtaksarivâ tangmârviub avatânut, toᴋotsijoᴋartuksauvorlo tâpsominga tâpsoma takkoane;
4Eleasariblo ajoᴋertuijûb tâpsoma aungata ilanga tigujaksarivâ tikkerminut serparsautigilugolo sevenertorlune ilagêktut tupingata sânganut;
5Tuktuvaglo ôtitaujuksauvoᴋ tâpsoma takkoane, aminga, nerᴋingalo, aungalo, anangalo ôtitaksarivait;
6Ajoᴋertuijorlo tigusijuksauvoᴋ ᴋejungmik Sideremik, isupiniglo (ᴋesertutinik), aupaluktamiglo (merᴋolingmik), egilugillo tuktuvangmut ôtitaulertomut.
7Tungânelo ajoᴋertuijûb annorâne ergortoraksarivait, timinelo ubvarlugo imermut, ivsornarniarlunelo unnuk tikidlugo.
8Otitsijûblo tâpsominga annorâne ergortoraksarivait imermut, timinelo ubvarlugo imermut, ivsornarniarlunelo unnuk tikidlugo.
9Angutiblo ivsornaitûb argjat tuktuvangmit katitaksarivait ililugillo salumaitoᴋangitomut tangmârviub avatâne, ᴋomergutauniarpullo kigligiutsiᴋovlugit Israêlikut ilagêktoᴋsôningit pivlugit, atoraksauᴋovlugit sujungailisautiksamut; tunergutiksauvoᴋ ajortoêrutiksaᴋ.
10Katersijûblo tuktuvaub argjanginik annorâne ergortoraksarivait, ivsornarniarlunelo unnuk tikidlugo. Tamannalo maligaksaujuksauvoᴋ soᴋosijuitoᴋ Israêlikunut takorngartanullo tâpkoa akorngane nunaᴋaturnut.
11Inuk toᴋungajûb timinganik aktoajoᴋ ivsornarniarpoᴋ uvlunik sevenenik;
12Tâmna sujungaitituksauvoᴋ nangminerminik tamattomunga uvlut pingajuane, uvlullo seveningane, tagva ivsornainiarpoᴋ; sujungaitilungikunele nangminerminik uvlut pingajuane uvlullo seveningane ivsornainiangilaᴋ.
13Aktoajoᴋ inûb toᴋungajûb timinganik sujungaitiluganelo nangminerminik, sujuivoᴋ Nâlekab tupinganik; taimaitorlo avitaujuksauvoᴋ Israêlikunit; imeᴋ sujungailisautiksaᴋ serparsautaulaungimat tâpsomunga, ivsornarniarpoᴋ; ivsornarninga tâpsomanêpoᴋ suli.
14Tamadja maligaksaᴋ inuk inojungnaipat tuperme; ilûnatik itertut tupermut, tupermêtullo ilûnatik ivsornarniarput uvlunik sevenenik.
15Pôllo ilûnatik angmajut ᴋelaksimajunik mattoᴋangitut, ivsornarniarivut.
16Silamelo aktoajoᴋ toᴋotaumajomik saviksoarmut, ingminiglônêt toᴋolauᴋtomik, inûblônêt sauninganik, iluvermiglônêt, ivsornarniarpoᴋ uvlunik sevenenik.
17Ivsornartorlo pivlugo tigusijuksauvut argjat tunergutaumajûb ajortoêrutiksab ôtitauninganit pijut ilanginik, koverilugillo imermik ômanartomik ᴋajûtarme;
18Inuglo ivsornaitoᴋ tigusiniarpoᴋ isupinik (ᴋesertutinik) missuklugillo imermut, serparsautigilugolo tupermut perᴋutinginullo, inungnullo tagvanêlauᴋtunut, tâpsomungalo aktoalauᴋtomut saunermik, toᴋotaujomiglônêt, ingminiglônêt toᴋolauᴋtomik, iluvermiglônêt;
19Ivsornaitûblo ivsornartoᴋ serparsaraksarivâ uvlut pingajuane seveninganelo; uvlullo seveningane sujungaitiniarpâ; annorânelo ergortoraksarivait, ubvarlunelo nangminerminik imermut, unnukpallo ivsornailârpoᴋ.
20Inugle ivsornartitaujoᴋ sujungailungitorlo nangminerminik, tâmna avitaujuksauvoᴋ ilagêktunit, Nâlekab ivsornaitoviᴋotinga sujungmago; imeᴋ sujungailisautiksaᴋ serparsautaulaungilaᴋ tâpsomunga; ivsornarpoᴋ.
21Tamanna maligaksauvoᴋ soᴋosijuitoᴋ tâpkonunga; serparsaijûblo imermut sujungailisautiksamut annorâne ergortoraksarivait; aktoajorlo imermik sujungailisautiksamik ivsornarniarpoᴋ unnuk tikidlugo.
22Ivsornartûblo aktortangit ilûnatik ivsornarniarput; aktoajorlo tâpkoninga ivsornarniarpoᴋ unnuk tikidlugo.
Currently Selected:
Numbers 19: LIHB08
Highlight
Copy
Compare
Share
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
