Numbers 18
18
1Nâlekablo Aron oᴋautivâ: Igvit, ernitillo, atâtagilauᴋtavîllo kinguvângit ilagilutit, nangmartuksauvose ivsornaitoviub ajorninganik, igvillo ernitillo nangmartuksauvose ajoᴋertuijônipse ajorninganik.
2ᴋatangutitittauᴋ, Levib kinguvângit, atâtagilauᴋtavît kinguvângit, ilagijaksarivatit, piᴋatigilutit piᴋovlugit, kivgartorᴋovlugillo ilingnik; igville ernitillo ilagilutit kigligiutjineᴋtaliub tupingata sânganêtuksauvose.
3Tâpkoalo udjertoraksarivâtit, udjertoraksarivâttauᴋ tupiub ilûnanga; kissiane najorniktuksaungilat ivsornaitoviub perᴋutinginik tunerguservingmiglo, tâpkoalo ilipselo toᴋoᴋonase.
4Piᴋatigijaksarivâtillo, udjertortuksauvlutiglo ilagêktut tupinganik, katimaniksat tuperme nâvlugit; takorngartarlo majorniktuksaungilaᴋ ilipsingnik.
5Ilipselo udjertortuksauvose ivsornaitovingmik tunerguservingmiglo; ningaumajârneᴋ tikitsungnaiᴋovlugo Israêlikunut.
6Uvangalo, ahâk, ᴋatangutise Levikut tiguvakka Israêlikut akornganit; ilipsingnut tunergusiangovut tunijaumajut Nâlekamut, kivgartorᴋovlugit ilagêktut tupingane.
7Igvillo ernitillo ilagilutit ajoᴋertuijônipsingnik udjertortuksauvose tunerguserviub perᴋutingit tamaita pivlugit upkûblo iluanêtut pivlugit; kivgartortuksauvoselo; ajoᴋertuijôneᴋ tunivara ilipsingnut perᴋutauᴋovlugo; takorngartarlo najorniktoᴋ toᴋotaujuksauvoᴋ.
8Nâlekablo Aron oᴋautivâ: Uvanga, ahâk, uvanga tunergusiarijakka issautijauᴋattartut, Israêlikullo ivsornaititangit tamaita tunimavakka ilingnut, ilangiusiaksauvlutik mingoartauneᴋ pivlugo tunivakka ilingnut ernernullo, soᴋoserniangitomik pigênalârpase.
9Tamadja perᴋutigilârtatit ivsornainerpaujunit, ikomamit ningertaujunit: tunergutingit nerᴋiksat ilûnatik, tunergutingillo ajortoêrutiksat ilûnatik, tunergutingillo pasijaungijutiksat ilûnatik, uvamnut tunijangit, ivsornainerpaujuksauvut ilingnullo ernernullo.
10Ivsornaitovingme nerrijaksarivatit; angutit ilûnatik nerrijaksarivait; ivsornaituksauvut ilingnut.
11Tamadjalo pigijaksarivatit: tunergutingit isautijauᴋattartut, Israêlikut tunergutingit senervaiᴋitârtitat, tâpkoa tunivakka ilingnut ernernullo paningnullo ilagilutit, soᴋoserniangitomik pigênalârpase; ivsornaitut ilûnatik iglungnêtut tâpkonangat nerrijuksauvut.
12Orᴋsorlo pionerpâk, vaineliksablo paungangita iptingat pionerpâk, senaugaksallo pionerpât, tâpkoa pijariorutingit tunijangit Nâlekamut, ilingnut tunimavakka.
13Nunangita paungangit innersimaᴋârtut ilûnaita âtangit Nâlekamut, igvit pigilârpatit; ivsornaitut iglungnêtut ilûnatik nerrijuksauvut tâpkonangat.
14Tunijaumajut tamaita Israêleme perᴋutiginiarpatit.
15Igliamik angmaijut uvinilingne tamaine tunijaujut Nâlekamut, inômangât nergjuteomangâllônêt, perᴋutiginiarpatit; erniangoᴋârtorlo inungne pisiarijaksarivat, nergjutillo ivsornartut erniariᴋârtangit pisiarijaksarivatit.
16Pisiarijaujariaᴋartullo pisiniarijaksarivatit taᴋᴋeᴋarpatta atautsemik, akkeᴋartilugit sekelenik tellimanik, ivsornaitoviub sekelinga maliklugo, tâmna gêratut 20tut akkitôtigivoᴋ.
17Tuktuvauble, saukablônêt, tuktungajûblônêt erniariᴋartânga pisiarijaksarilungilat; tâpkoa ivsornaiput; taipkoa aungit serparsautigijaksarivatit tunerguservingmut, orᴋsungillo ôtilugit tunergutiksautilugit ikomakut, tipitsiariktunik Nâlekamut.
18Nerᴋingillo perᴋutigilârpatit, sôrlo sakkiaᴋ isautijauᴋattartoᴋ tallerlo isautijaujoᴋ ᴋongmut perᴋutigigangne.
19Tunergutit ᴋongmut isautijaujut ilûnaita ivsornaitut, Israêlikut tunijangit Nâlekamut, tunimavakka ilingnut, ernernullo paningnullo ilagilutit, soᴋoserniangitomik pigênalârpase; angerᴋatigêngniovoᴋ angermaringnermik soraijuitomik Nâlekab sângane ilingnut kinguvângnullo ilagilutit.
20Nâlekablo Aron oᴋautivâ: kingormgutijaᴋartuksaungilatit nunangine ilangiusiaᴋartuksaungilatillo tagvane; uvanga ilangiusiarivarma kingormgujilutillo uvamnik Israêlikut akorngane.
21Levikunullo ahâk Israêlikut perᴋutingita tellimaujungit tamaita kingormgutijaksautisimavakka, akkiksauᴋovlugit kivgartorninginut piniarnerijanginut ilagêktut tupingane.
22Mattomalo kingorngane Israêlikut najorniktuksaungilat ilagêktut tupinganik (tunerguseromavlutik), pititsiᴋonagit ajornermik nangminermingnut, toᴋoᴋonagillo.
23Levikulle piniartuksauvut ilagêktut tupingata kivgartortaugianganik, tâpkoalo nangmartuksauvut idluininginik: tamanna maligaksauvoᴋ soᴋoserungnangitoᴋ kinguvângoᴋatigêngnipsingne, Israêliklullo akorngane kingormgutijaksaᴋartuksaungilat.
24Israêlikut perᴋutingita tellimaujungit, tunijangit, tunergutiksat isautijaujut ᴋongmut, Nâlekamut, tâpkoa tunimavakka Levikunut kingormgutijaksautilugit; tamanna pivlugo oᴋautivakka: Israêlikut akorngane kingormgutijaksaᴋartuksaungilat.
25Nâlekablo Mosese oᴋarvigivâ, oᴋarlune:
26Levikut oᴋarvigijaksarivatit oᴋautilugillo: Tigusigupse Israêlikut perᴋutingita tellimaujoanik kingormgutijaksautitamnik ilipsingnut tâpkonangat, tunitjijuksauvose ilanganik, tellimaujoab tellimaujoanik, tunergutiksamik ᴋongmut isautijaksamik Nâlekamut.
27Tunergutiselo ᴋongmut isautijaksat kititaulârput ilipsingnut sôrlo senaugaksanik katjugvingmit, sôrlolo vaineliksat tullerajârtauvinganit pijut ilanganik.
28Taimaidluse tunitjilârivose tunergutiksanik ᴋongmut isautijaksamik Nâlekamut tellimaujoanit pijapsingnit Israêlikunit; tagvangallo tunitjijuksauvose Nâlekab tunergusiarijaksanganik ᴋongmut isautijaksamik Aronemut ajoᴋertuijomut.
29Tunergusiarijapsingnit tamainit tunitjijuksauvose Nâlekab tunergusiarijaksanginik ᴋongmut isautijaksanik tamainik, tâpkoa pionerpânginit tamainit, tagva ivsornaitunginit tamainit.
30Taimaimat oᴋautijaksarivatit; Pionerpâk tagvangat ᴋongmuartikupsiuk, kititaulârpoᴋ Levikunut katjugviub pitangititut, vaineliksallo tullerajârtauvingata pitangititut.
31Nerrijaksarivaselo ilûnâne, ilipselo iglomioᴋatiselo; akkiliusiarivase kivgartornise pivlugit ilagêktut tupingane.
32Idluinermiglo nangmarniangilase ᴋongmuartitsigupse pionerpaujunik tâpkonangat; ivsornartitsiniangilaselo Israêlikut ivsornaititanginik, toᴋoniangilaselo.
Currently Selected:
Numbers 18: LIHB08
Highlight
Copy
Compare
Share
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
