Leviticus 7
7
1Tamadjalo perᴋojak tunergutiksak pasijaksaungijutiksak pivlugo; ivsornaitoksôvok.
2Tunergutiksab ôtaksab toᴋotauvingane, tunergutiksak pasijaksaungijutiksak toᴋotaujuksauvok; aungalo serᴋerautigijaksarivâ tunerguserviub avatânut.
3Tunnualo ilûnât tunergutigijaksarivâ; pamiunga ᴋoinijôk erᴋavingitalo tunnungat;
4Taktûglo, taktûglo tunnungat, okpatîkitalo tunnungat, kiksautingillo ilûnaita, taktûk ilagilugik, pêjaraksarivait:
5Ajoᴋertuijûblo ôtitaksarivait tunerguservingme tunergutauᴋovlugik ikomakut Nâlekamut: tunergutauvok pasijaksaungijutiksak.
6Angutit ilûnatik ajoᴋertuijut akorngane nerrijuksauvut tâpsomangat; ineme ivsornaitome nerrijaujuksauvok; ivsornaitoksôvok.
7Tunergutiksab ajoᴋêrutiksab ilinganingatut, taimaituksaugivok tunergutiksak pasijaksaungijutiksak: atautsemik perᴋojaᴋarpok tâpkoa pivlugik: ajoᴋertuijûb tâpkoninga ulapirᴋsaijuteᴋartûb pigijaksarivait.
8Ajoᴋertuijûblo inuit naliata tunergutiksanganik ôtaksamik tunergusertûb, ajoᴋertuijûb tâpsoma nangminerijaksarivâ tunergutib ôtâb tunergusertame aminga.
9Tunergutillo nerᴋiksat ilûnaita igajaujut kiaksautib igavingane, ilûnaitalo jarraktaujut jarrauteme, igautemelônêt sâpatâme, ajoᴋertuijûb tunergusertûb tâpkoninga perᴋutigijaksarivait.
10Tunergutillo nerᴋiksat ilûnaita, orᴋsumut akusimajut panertullônêt Aronib erningita ilûnatik adsigêktomik pigijaksarivait.
11Tamadjalo perᴋojak tunergutiksak ᴋujaliutiksak tunergutaujok Nâlekamut pivlugo.
12ᴋujaliutautilugo tunikpago, tunergutiksak ᴋujaliutiksak ilagellugo tunitjijuksauvok ᴋakᴋôjanik pubjusauteᴋangitunik orᴋsumut akusimajunik, ᴋakᴋôjârsungniglo sâpatânik orᴋsumut mingoartaumajunik, ᴋakᴋôjaniglo orᴋsumut akusimajunik sanaugatsiarmit kinipajomit.
13Tunergutiksane tunijaksarivâ ilaᴋartilugo ᴋakᴋôja nik pubjusautelingnik, tapiksaujunik tunergutiminut ᴋujaliutiksamik, ᴋujalijutautilugo.
14Tunergutinillo tamainit tunitjijuksauvok atautsimik tunergutauᴋovlugo issârutiksamik Nâlekamut: tamanna ajoᴋertuijûb tunergutiksat ᴋujaliutiksat aunganik serᴋeraijûb pigijaksarivâ.
15Tunergutingatalo ᴋujaliutiksab ᴋujaliutautilugo nerᴋinga nerrijaujuksauvok uvlorme tunerguserviojome; amiakoᴋartitsijuksaungilak ᴋaupat tikidlugo.
16Tunergutingale angerviviksiorutiksaupat, tujûtaukpallônêt, nerrijaujuksauvok tunerguservigijangane; amiakoalo nerrijaujuksauvok ᴋaupat;
17Tunergusertaujûble nerᴋinga amiakoᴋarpat uvlut pingajuat tikidlugo, ikomamut nungutaujuksauvok.
18Tunergutingatalo ᴋujaliutiksab tunergusertaujûb nerᴋingata ilanga nerrijaukpat uvlut pingajuane, nâmagijaunialungilak, tunergusertûblo idluarsijutiginialungilâ; maᴋᴋojungnautauniarpoᴋ, nerrijûblo tâpsominga idluitulinine nangmalârpâ.
19Nerᴋelo aktuajok ivsornartomik nerrijaujuksaungilak; ikomamut nungutaujuksauvok. Ivsornaitut ilûnatik nerrijuksauvut nerᴋemik mattominga;
20Nerijulle tunergutaujûb ᴋujaliutiksab nerᴋinganik Nâlekamut tunijaujomik, najorteᴋarlune ivsornarnerminik, tâmna avitaujuksauvok inôᴋatiminit.
21Aktuijokarpallo ivsornartomik, inûb ivsornarninganiglônêt, ômajomiglônêt ivsornartomik, maᴋᴋojungnartomiglônêt sumik ivsornartomik, nerrilunalo tunergutaujûb ᴋujaliutiksab nerᴋinganik, Nâlekamut tunijaujomik, tâmna avitaujuksauvok inôᴋatiminit.
22Nâlekablo Mosese oᴋarvigivâ, oᴋarlune:
23Israêlib ᴋitorngangit oᴋarvigikit, oᴋarlutit: Tunnoktortuksaungilase, tuktuvaub saugablônêt tuktungajublônêt tunnuanik.
24Ingminiglo toᴋojûb tunnua, ômajunullo aliktortaujûb tunnua, atoraksauvok sunatuinarnut: nerrijaksaritsangilasele.
25Nerrijorlo nergjutib tunnuanik, ilanga tunijaumatilugo ikomakut Nâlekamut, ilâ, nerrijok tâpsominga avitaujuksauvok inôᴋatiminit.
26Aungmiglo nerrijuksaungilase, tingmiablônêt nergjutiublônêt aunganik iglupsingne nalianelônêt.
27Auktortoᴋ kinaugaloarpat, tâmna avitaujuksauvok inôᴋatiminit.
28Nâlekablo Mosese oᴋarvigivâ, oᴋarlune:
29Israêlib ᴋitorngangit oᴋarvigikit, oᴋarlutit: Tunitjijomajok tunergutiksaminik ᴋujaliutiksamik Nâlekamut, tâpsoma tunergutine Nâlekamut ᴋaitaksarivâ tunergutiksaminit ᴋujaliutiksamit;
30Aggangme nangminerijame Nâlekab tunergusiaksangit ikomakut ᴋaitaksarivait; sakiak tunnoᴋartilugo ᴋaitaksarivâ, sakiak senervaiᴋitârtitauᴋattarᴋovlugo tunergutauvlune sanervaiᴋitârtitaujok Nâlekab sângane.
31Ajoᴋertuijûblo tunno ôtitaksarivâ tunerguservingme; sakiagle Aronib erningitalo pigijaksarivât.
32Tallerle tallerpik tunijaksarivase ajoᴋertuijomut tunergutauᴋovlugo issârutiksamik tunergutipsingnit ᴋujaliutiksanit.
33Aronib erningita ilangata tunergusertûb tunergutiksat ᴋujaliutiksat aunganik tunnuaniglo tallek tallerpik ningersiarijaksarivâ.
34Sakiak sannervaiᴋitârtitaksak tallerlo issârutiksak tigugapkit Israêlib ᴋitorngangita tunergutiksanginit ᴋujaliutiksanit tunilugillo ajoᴋertuijomut Aronemut erninginullo soᴋosijuitomik perᴋutauᴋovlugit tâpkonunga Israêlib ᴋitornganginit.
35Tamadja Aronib mingoartaumajûb erningitalo mingoartaumajut ningersiarijaksangit Nâlekamut ikomakut tunijaumajunit uvlorme annerijauvigilauktangine ajoᴋertuijôvlutik kivgartorᴋovlugit Nâlekamik;
36Nâlekab tunijauᴋojangit tâpkonunga Israêlib ᴋitornganginut uvlorme mingoarvigilauktangane tâpkoninga. Soᴋosijuitomik pigijaksaritsainarpait kinguvarêngningine tamaine.
37Tamadja perᴋojat tunergut ôtaksak, tunergullo nerᴋiksak, tunergullo ajoᴋêrutiksak, tunergullo pasijaksaungijutiksak, mingoartaumanerlo, tunergullo ᴋujaliutiksak, pivlugit;
38Nâlekab perᴋojijutigilauktangit Mosesemut ᴋakᴋame Sinaime uvlorme perᴋojivigilauktangane Israêlib ᴋitornganginik tunitjiᴋovlugit tunergutiksanginik Nâlekamut Sinaib inuᴋajuitungane.
Currently Selected:
Leviticus 7: LIHB08
Highlight
Copy
Compare
Share
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
