Leviticus 5
5
1Idluitulijoᴋarpallo tusarame nippemik kigligiutsiᴋojijomik, tâmna kigligiutsijuksautilugo, takosomagame ᴋaujimagamelônêt, kigligiutsitailigune, tâpsoma idluitulinine nangmaraksarivâ.
2Aktuijoᴋarpallônêt ivsornartomik sunamik, ômajûb ivsornartûb ᴋellunganiglônêt, tuktuvaublônêt ivsornartûb ᴋellunganik, ᴋuglugiablônêt ivsornartûb ᴋellunganik, nalovlune, ivsornartitauvlunalo, tâmna pasijaksauvok;
3Nalovlunelônêt aktuigune inûb ivsornarninganik, ivsornarninga ivsornautigijanga sunaugaloarpat, ᴋaujimaleruniuk pasijaksauniarpok;
4Udjertorluganelônêt angermariktoᴋarpat idluitulijomavlune idluartulijomavlunelônêt, sunaugaloarpat inûb angerutigijanga udjertorlugane angerutigikpago, nalovlune, ᴋaujimaleruniuk, pasijaksaulârpok tâpkoa naliat pivlugo;
5Taimaitoᴋarpat, misigilerpat idluitulisimanerminik, kigligiutsijuksauvok idluitulilaungnerminik;
6Atsijuksauvorlo Nâlekamut tunergutiminik pasijaksaungijutiksamik idluinine piniarnerijane pivlugo saugârsungmik tuktungajomiglônêt arnarmik katimgajunit tunergutiksautilugo ajoᴋêrutiksamik; ajoᴋertuijûblo ulapirᴋsaraksarivâ idluitulinerilauktanga pivlugo.
7Saugârsungmigle sapidlarpat, âtsijuksauvok tunergutiksamik pasijaksaungijutiksamik idluitulinine pivlugo aᴋigeojârtûngnik maggûngnik aᴋigeojârângniglônêt maggûngnik Nâlekamut; aipâ tunergutiksautilugo ajoᴋêrutiksamik, aipangalo tunergutiksautilugo ôtaksamik.
8Ataksarivâglo ajoᴋertuijomut, tâpsomalo tunergutiksak ajoᴋêrutiksak tuniᴋâraksarivâ, niaᴋoa sêmimariklugo ᴋongasiub navgoangane, navingnagole;
9Tunergutiksablo ajoᴋêrutiksab aungata ilanga serᴋerautigijaksarivâ tunerguserviub saneranganut; aublo amiakoa kovijaksarivâ tunerguserviub ikkogganganut; tunergutauvok ajoᴋêrutiksamik.
10Aipangalo tunergutigijaksarivâ tunergutiksautilugo ôtaksamik ilusioᴋojaᴋ maliklugo; ajoᴋertuijûblo ulapirᴋsaraksarivâ idluininga piniarnerijanga pivlugo, isumagijungnaiviolârporlo.
11Sapidlarpalle akᴋigeojârtûngnik maggûngnik akᴋigeojârângniglônêt maggûngnik, ᴋaitsijuksauvok idluitulinerilauktane pivlugo sanaugatsiarmik ôktûtib êfab tallimaujoanik tunergutiksautilugo ajoᴋêrutiksamik; orᴋsumik pititsivigijaksaringilâ, tipitsiariksaumiglônêt pititsiviginago: tunergutiksaungmat ajoᴋêrutiksamik.
12Ataksarivâlo ajoᴋertuijomut, ajoᴋertuijorlo tigusijuksauvok tigumiarᴋamik tagvangat erᴋaumajutiksauᴋovlugo, ôtitaksarivâlo tunerguservingme, tunergutit Nâlekamut ikomakut tunijaujut piniarutauᴋojangit maliklugit; tunergutiksauvok ajoᴋêrutiksamik.
13Ajoᴋertuijûblo ulapirᴋsaraksarivâ idluininga piniarnerijanga tamakkoa naliane pivlugo, isumagijungnaiviolârporlo: ajoᴋertuijûblo amiakoa pigijaksarivâ, tunergutautilugo nerᴋiksamik.
14Nâlekablo Mosese oᴋarvigivâ, oᴋarlune:
15Inuit naliat tamarlune idluitulikpat Nâlekamut tunijaujut ivsornaitut pitjutigilugit, ᴋaitsijuksauvok tunergutiksaminik pasijaksaungijutiksamik Nâlekamut, angusâlormik ᴋanoêtoᴋangitomik katimgajunit, akkitutigijomik sekelenik silberenik idluarijat maliklugo, ivsornaitoviub sekelinga maliklugo, tunergutiksauᴋovlugo pasijaksaungijutiksamik:
16Tunijaujorlo ivsornaitok idluitulijutigijanga utertitaksarivâ, tallimanganik tappeᴋartilugo, tunijaksarivâlo ajoᴋertuijomut: ajoᴋertuijûblo ulapirᴋsaraksarivâ angusâloᴋ tunergutigilugo pasijaksaungijutiksamik, isumagijungnaiviolârporlo.
17Idluitulijoᴋarpallo, piniarlune Nâlekab inerterutingita nallînik: nalogaloarlune, pasijaksauniarpok, idluitulininalo nangmaraksarivâ.
18ᴋaitsijuksauvorlo ajoᴋertuijomut angusâlormik katimgajunit, idluarijat maliklugo, tunergutiksautilugo pasijaksaungijutiksamik; ajoᴋertuijûblo ulapirᴋsaraksarivâ idluininga nalovlune piniartanga pitjutigilugo, isumagijungnaiviolârporlo.
19Tunergutiksauvok pasijaksaungijutiksamik: pasijaksaudlalaungmat Nâlekab sângane.
Currently Selected:
Leviticus 5: LIHB08
Highlight
Copy
Compare
Share
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
