Leviticus 4
4
1Nâlekablo Mosese oᴋarvigiva, oᴋarlune:
2Israêlib ᴋitorngangit oᴋarvigikit, oᴋarlutillo: Pijarenane idluitulijoᴋarpat Nâlekab inerterutingita nalianik, piniarpallo perᴋojaungitut ilanganik:
3Ajoᴋertuijok mingoartaumajok idluitulikpat inugasaksuit sinaungajutauninginut; ajornine piniarnerijane pitjutigellugo tunergusertuksauvok tuktuvangmik inôtsungmik ᴋanoêtoᴋangitomik Nâlekamut ajoᴋêrutiksamik.
4Tuktuvaglo âtaksarivâ ilagêktut tupingata upkoangata sânganut Nâlekab sângane; tuktuvaublo niaᴋoa patingmijaksarivâ, tuktuvaglo toᴋolugo Nâlekab sângane.
5Ajoᴋertuijûblo mingoartaumajûb tuktuvaub aungata ilanga tigujaksarivâ tikiutilugolo ilagêktut tupinganut:
6Ajoᴋertuijûblo tikine misugaksarivâ aungmut, aublo ilanga serᴋerautigilugo sevenertorlune Nâlekab sângane, ivsornaitoviub upkoangata sângane.
7Ajoᴋertuijûblo aub ilanga pititaksarivâ isserluanititsiviub tipitsiariksaumik, ilagêktut tupinganêtûb, nakjunginut, Nâlekab sângane: tuktuvaublo aunga ilûnât kovijaksarivâ tunerguserviub tunergutinik ôtaksanik ikkogganganut, ilagêktut tupingata upkoangata sânganêtomut.
8Tuktuvaublo ajoᴋêrutiksab tunnua ilûnât pêjaraksarivâ tâpsomangat; kiksautingit erᴋavingitalo tunnungat ilûnaita.
9Taktûglo, taktûkitalo tunnungit, okpatîkitalo tunnungit, taktûk ilagilugik, pêjaraksarivait.
10Sôrlo pêjartaungmat tuktuvangmit tunergutiksamit ᴋujaliutiksamit: ajoᴋertuijûblo ôtitaksarivait tunerguservingme ôtaksanik.
11Tuktuvaublo aminga, nerᴋingalo ilûnât, niaᴋoalo, niungillo, erᴋavingillo, anangalo,
12Ilâ, tuktuvak ilûnât âtaksarivâ tangmârviub avatânut, ipeᴋangitomut, argjaᴋôvingmut, ôtitaksarivâlo ikomamut ᴋejuit ᴋângane: argjaᴋôvingme ôtaujuksauvok.
13Ilagello Israêlikut ilûnatik tammarpatta, piniarnitiglo ijersimakpatta ilagêt ijinginit, pinialaukpattalo Nâlekab inerterutingita ilanginik, pasijaksaukpattalo;
14Ajornek idluitulinerijangat ᴋaujijaulerpat, ilagêt tunitjijuksauvut tuktuvangmik inôtsungmik ajoᴋêrutiksamik, âlugolo ilagêktut tupingata sânganut.
15Ilagêllo angajoᴋângita tuktuvaub niaᴋoa patingmijaksarivât Nâlekab sângane, tuktuvaglo toᴋotaujuksauvok Nâlekab sângane.
16Ajoᴋertuijûblo mingoartaumajûb tuktuvaub aungata ilanga tikiutijaksarivâ ilagêktut tupinganut.
17Ajoᴋertuijûblo tikine misugaksarivâ aungmut serᴋerautigilugolo sevenertorlune Nâlekab sângane, upkûb sângane.
18Aublo ilanga pititaksarivâ tunerguserviub, Nâlekab sânganêtûb, ilagêktut tupinganêtûb, nakjunginut, auglo ilûnât kovijaksarivâ tunerguserviub tunergutinik ôtaksanik ikkogganganut, ilagêktut tupingata upkoangata sânganêtomut.
19Tunnualo ilûnât pêjaraksarivât tâpsomangat, ôtilugolo tunerguservingme.
20Tuktuvak taimailiorutigijaksarivâ; sôrlo tuktuvak tunergutiksak ajoᴋêrutiksak piniarvigilaungmago taimâk una piniarvigijaksarivâ: ajoᴋertuijûblo ulapirᴋsaraksarivait, isumagijungnaiviolârput tagva.
21Tuktuvaglo âtaksarivâ tangmârviub avatânut ôtilugolo sôrlo tuktuvak sivorlek ôtilaungmago: tunergutauvok ajoᴋêrutiksak ilagêt pivlugit.
22Angajoᴋaksuit ilangat idluitulikpat, pijarenanalo piniarpat Nâlekab Gûdingata inerterutingita ilanganik, pasijaksaukpallo;
23Ajorningalo piniarnerijanga nalonaijartaukpat tâpsomunga, ᴋaitsijuksauvok tunergutiksamik tuktungajomik angusâlormik ᴋanoêtoᴋangitomik;
24Aggangminullo tuktungajûb niaᴋoa patingmijaksarivâ, toᴋotaksarivâlo tunergutiksat ôtaksat toᴋotauvigivaktangine Nâlekab sângane: tunergutauvok ajoᴋêrutiksak.
25Ajoᴋertuijûblo tunergutiksab ajoᴋêrutiksab aungata ilanga tigujaksarivâ tikerminut, pitilugolo tunergutit ôtaksat tunerguservingata nakjunginut, aungalo kovijaksarivâ tunerguserviub tunergutinik ôtaksanik ikkogganganut.
26Tunnungalo ilûnât ôtitaksarivâ tunerguservingme, sôrlo tunnok tunergutiksanit ᴋujaliutiksanit: ajoᴋertuijûblo ulapirᴋsaraksarivâ ajorninga pivlugo, isumagijungnaiviolârpoᴋ tagva.
27Inuillo erᴋanangitut ilangat pijarenane idluitulikpat, piniarlune Nâlekab inerterutingita ilanganik, pasijaksaukpallo;
28Ajorningalo piniarnerijanga nalonaijartaukpat tâpsomunga, ᴋaitsijuksauvok tunergutiksamik tuktungajomik arnarmik ᴋanoêtoᴋangitomik, ajornine piniarnerijane pivlugo.
29Aggangminullo tunergutiksab ajoᴋêrutiksab niaᴋoa patingmijaksarivâ, tunergutiksarlo ajoᴋêrutiksak toᴋotaksarivâ ôtaksanik tunergutiksat inigijangane.
30Tikerminullo aungata ilanga tigujaksarivâ pitilugolo tunergutit ôtaksat tunerguservingata nakjunginut, aungalo ilûnât kovijaksarivâ tunerguserviub ikkoggangata avatânut.
31Tunnungalo ilûnât pêjaraksarivâ, sôrlo tunnok pêjartaungmat tunergutinit ᴋujaliutiksanit; ajoᴋertuijûblo ôtitaksarivâ tunerguservingme tipitsiariktoᴋutauᴋovlugo Nâlekamut; ajoᴋertuijûblo ulapirᴋsaraksarivâ, isumagijungnaiviolârporlo.
32Saugârsungmiglo ᴋaitsikpat tunergutiksauᴋovlugo ajoᴋêrutiksamik, arnak ᴋanoêtoᴋangitok ᴋaitaksarivâ.
33Aggangminullo tunergutiksab ajoᴋêrutiksab niaᴋoa patingmijaksarivâ, toᴋotaksarivâlo tunergutiksautilugo ajoᴋêrutiksamik tunergutiksat ôtaksat toᴋotauvigivaktangine.
34Tikerminullo tunergutiksab ajoᴋêrutiksab aungata ilanga tigujaksarivâ pitilugolo tunergutiksat ôtaksat tunerguservingata nakjunginut, aungalo ilûnât kovijaksarivâ tunerguserviub ikkoggangata avatânut;
35Tunnungalo ilûnât pêjaraksarivâ sôrlo saugârsûb tunnunga pêjartaungmat tunergutiksanit ᴋujaliutiksanit; ajoᴋertuijûblo ôtitaksarivâ tunerguservingme, tunergutit Nâlekamut ikomakut ilusioᴋojangit maliklugit: ajoᴋertuijûblo ulapirᴋsaraksarivâ ajorninga piniarnerijanga pitjutigellugo, isumagijungnaiviolârporlo.
Currently Selected:
Leviticus 4: LIHB08
Highlight
Copy
Compare
Share
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
