Hesekiel 20
20
1Pivorlo jarit 7ingata, taᴋᴋingata tellimangata uvlungita 10ingane, Israêlib angajoᴋângita ilangit tikingmatta Nâlegaᴋ aperijomavlugo, sâmnullo ingiput.
2Nâlekablo oᴋausingata tikipânga, oᴋarlune:
3Inûb erninga, Israêlib angajoᴋângit oᴋarvigikit, oᴋautilugillo: Imâk oᴋarpoᴋ Nâlegaᴋ Nâlegaujoᴋ: Tikikisê uvanga aperijomavlungâ? Sorlo mikseᴋârtomik inôgama, oᴋarpoᴋ Nâlegaᴋ Nâlegaujoᴋ, aperijaujomangilanga ilipsingnut.
4Erᴋartoromavigît, igvit inûb erninga, erᴋartoromavigît? Kaujitisârkit atâtagijangita maᴋojungnartulinerilauᴋtanginik;
5Oᴋautikillo: Imâk oᴋarpoᴋ Nâlegaᴋ Nâlegaujoᴋ: Uvlorme ipsomane Israêle annerilaurapko, aggakkalo ᴋolangiutitigapkit Jakokut kinguvânginut, ᴋaujijautilauramalo tâpkonunga nuname Egipteneme, aggakka ᴋolangiutitigapkit tâpkonunga, oᴋarlunga: Uvangauvunga Nâlegaᴋ Gudise;
6Uvlorme tâpsomane aggakka ᴋolangiutitilauᴋpakka tâpkonunga anititsomavlugit nunamit Egiptenemit nunamut tâpkonunga ᴋenilauᴋtamnut imungmik igupsaujârtullo orᴋsuanik kôᴋartomut, nunat tamaita pionerpânganut.
7Oᴋautivakkalo: Ilûnase atunit ijipse maᴋojungnartulijutigijangit egisigik, ivsornartiniaraselo nangminipsingnik Egiptenemiut gudingoanginut; uvangauvunga Nâlegaᴋ Gudise.
8Tâpkoale tapagilauᴋpânga nâlegomanangalo; egitsijoᴋangilaᴋ ijingita maᴋojungnarutigijanginik, iperaingilallônêt Egiptenemiut gudingoanginik: oᴋarpunga tagva, kovisivigijomavakka ᴋaningaumajâdlarnimnik, nâmaksijomavlugo ningaumajârnera tâpkoninga tagvane Egipteneme.
9Piniarpungale attera issumagivlugo, tâmna ivsornaijungnaititauᴋonago inôᴋatigêksuit, tâpkoa najortangita, takoane, tâpkoa takoane ᴋaujijautilaurama uvamnik tâpkonunga anitilaurapkit nunamit Egiptenemit.
10Taimaimat anitilauᴋpakka nunamit Egiptenemit, tikiutilugillo sunaᴋajuitomut.
11Tunitjivilauᴋpakkalo maligaksauᴋojamnik, nelojungnaitilugillo idluarijamnik, tamakkoalo inûb piniarpagit inôjûtigilârpait.
12Tunitjivigivakkalo sabbatimnik, nelonaikutauᴋovlugit uvangalo tâpkoalo akunaptingne, ᴋaujimaᴋovlugit uvanga tâmnaugama Nâlegaᴋ tâpkoninga ivsornaititsijoᴋ.
13Israêlible ᴋitorngangita tapagilauᴋpânga sunaᴋajuitome; arvertalaungilat maligaksauᴋojamne ajaktuivulle perᴋojamnik, inûb tamakkoa piniarpagit inôjûtigilârpait; sabbatikkalo sôngojomik ivsornaijungnaitipait: oᴋarpunga tagva ningaumajârnera kovijomagapko tâpkonunga sunaᴋajuitome, nungutsomavlugit.
14Piniarpungale attera issumagivlugo, tâmna ivsornaijungnaititauᴋonago inôᴋatigêksuit aularutjivigilauᴋtama tâpkoninga sângine.
15Aggakkalo isângatilauᴋpakka tâpkonunga sunaᴋajuitome, tikiutijomanginapkit nunamut tunijamnut tâpkonunga, kôᴋartomut imungmik igupsaujârtullo orᴋsuanik, nunanit tamainit pionerpaujomut;
16Perᴋojakka ajaktulaungmagit, arvertaratiglo maligaksauᴋojamne, sabbatikkalo ivsornaijungnaitingmagit; ômatingita gudingoaliarimajatik malingmagit.
17Ijimale anajagivait asserortauᴋonagit, nungujomangilakkalônêt sunaᴋajuitome.
18Sunaᴋajuitomelo ᴋitorngangit oᴋautivakka: Arvertarniarase atâtapse maligaksauᴋojangine, nâlengniaraselo perᴋojanginik, ivsornartiniaraselo ilipsingnik gudingoanginut;
19Uvanga Nâlegaugama Gudise; arvertaritse maligaksauᴋojamne nâlekluselo perᴋojamnik, tamakkoa piniarlugit;
20Sabbatikkalo ivsornaitisigik; tâpkoalo nelunaikutaujuksauvut uvangalo ilipselo akunaptingne, ᴋaujimaᴋovluse uvanga Nâlegaugama Gudise.
21Kitorngalletauᴋ tapagivânga; arvertalaungilat maligaksauᴋojamne, perᴋojakkalo nâlengilait piniaromavlugit, inûb tamakkoa piniarpagit inôjûtigijangit; sabbatikka ivsornaijungnaitipait, oᴋarpunga tagva ᴋaningaumajârnera kovijomagapko tâpkonunga, ningaumajârnera tâpkoninga nâmaksijomavlugo sunaᴋajuitome.
22Aggakkale isângajungnaitipakka, piniarpungalo attera issumagivlugo, tâmna oᴋarnerlutigijauᴋonago inôᴋatigêksuit aularutjivigilauᴋtama tâpkoninga sângine.
23Sullele aggakka isângatilaurivakka tâpkonunga sunaᴋajuitome siamartitsomagapkit inôᴋatigêksuit akornganut nunanullo serᴋitijomavlugit;
24Malilaungimatta perᴋojamnik, ajaktuimattalo maligaksauᴋojamnik, ivsornaijungnaititsingmattalo sabbatimnik ijingillo sangumatta atâtagijangita gudingoanginut.
25Tunitjivigivakkatauᴋ maligaksanik idlualungitunik perᴋojaniglo inôgûtaungitunik;
26Ivsornartipakkalo tunergutimingnut, ikomakôrtitsingmatta tamainik erniangojunik, asseroiᴋovlunga tâpkoninga, ᴋaujimalerᴋovlugit tâmnaugama Nâlegaᴋ.
27Tamanna pivlugo, igvit inûb erninga, oᴋarit Israêlib ᴋitornganginut, oᴋautikillo: Imâk oᴋarpoᴋ Nâlegaᴋ Nâlegaujoᴋ: Tamattomanetauᴋ atâtapse mitautigivânga, tapagilaungmanga.
28Tikiutisimalaurapkit nunamut, aggakka isângatilugit tunijamnut tâpkonunga, ulernairtuivut ᴋaᴋᴋanik poᴋtojunik tamainik, napârtuniglo siliktunik tamainik, tagvanelo tunerguserput, tagvungalo pajukput tunergutimingnik maᴋojungnartunik, tagvanelo âᴋiksorpait tipigiktut naimajominartuliarimajatik, tagvanelo kovivait tunergutitik imiksat.
29Oᴋautivakka tagva: Suvâ imna poᴋtojoᴋ aivigijase? Sullelo uvlome tikidlugo taijauvoᴋ Poktojomik.
30Tamanna pivlugo Israêlib ᴋitorngangit oᴋautikit: Imâk oᴋarpoᴋ Nâlegaᴋ Nâlegaujoᴋ: Ivsornartiᴋisê ilipsingnik atâtapse iluserijangit maliklugît? Assiniarᴋisêlo tâpkoa maᴋojungnartuliangit maliklugît?
31Tunergutiselo tunigupsigik, erniselo ikomakôrᴋogupsigik, ivsornartikisê ilipsingnik gudingoapsingnut uvlome tikidlugô? Uvangalo aperijaujuksauvingâ ilipsingnut, ilipse Israêlib ᴋitorngangît? Sorlo mikseᴋârtomik inôgama, oᴋarpoᴋ Nâlegaᴋ Nâlegaujoᴋ, aperijaujomangilanga ilipsingnut;
32Issumapsingnullo pijut nelautsiniangimarikput, oᴋarapse: Inôᴋatigêksoatitut ilingajomavogut, nunat ᴋitorngarêngningititut, ᴋejuit ujarᴋallo kivgartorlugit.
33Sorlo mikseᴋârtomik inôgama, oᴋarpoᴋ Nâlegaᴋ Nâlegaujoᴋ, aggangnut pitsartujunut, talingmullo issamijomut, ᴋaningaumajârnermullo kovijaujomut, ataniojomavunga ilipsingnut:
34Tikiutijomavapselo inôᴋatigêksuit akornganit, katersoromavapselo nunanit siamarvigijapsingnit, aggangnut pitsartujunut, talingmullo issamijomut, ᴋaningaumajârnermullo kovijaujomut;
35Tikiutijomavapselo inôᴋatigêksuit sunaᴋajuitunganut, tagvanelo erᴋartoromavapse kênarmit kênarmut.
36Sorlo atâtagijase erᴋartulaurapkit sunaᴋajuitome nuname Egipteneme, taimak erᴋartoromavapse, oᴋarpoᴋ Nâlegaᴋ Nâlegaujoᴋ.
37Ajaupiab atâgôrtitsomavapse, tikiutijomavapselo angiᴋatigêngnerub ᴋelarutinganut;
38Akunapsingnillo pêjaromavakka nâlegungnaitut tapatojullo uvamnik; anititsomavakka nunamit tujormivigijanginit, itertuksaungilalle Israêlib nunanganut; ᴋaujijuksauvoselo uvangaugama Nâlegaᴋ.
39Ilipsele, Israêlib ᴋitorngangit, imâk oᴋarpoᴋ Nâlegaᴋ Nâlegaujoᴋ: Aileritse, ilûnaselo atunit gudingoaliarimajase kivgartorsigik, kingornganelo, nâlegomangikupsinga, attera ivsornaitoᴋ ivsornaijungnaititaksaringilase tunergutipsingnut gudingoapsingnullo.
40Kaᴋᴋamne ivsornaitome, Israêlib poᴋtoningata ᴋaᴋᴋangane, oᴋarpoᴋ Nâlegaᴋ Nâlegaujoᴋ, tagvane Israêlib ᴋitorngangita ilûnatik, ila, nunamêtut ilûnamaritik, kivgartoromârpânga: tagvanelo ilalioromârpakka, tagvanelo tunergutise, paungallo pijariorutit tunijaksarijase, ivsornaititase tamaita ilagilugit, ᴋaitauᴋojomârpakka.
41Tippe naimajominartoᴋ naivlugo ilalioromavapse, anitikupse inôᴋatigêksuit akornganit, katersorupselo nunanit siamarvigijapsingnit; ivsornaititaujomavungalo ilipsigut inôᴋatigêksuit takoane.
42Kaujijuksaulârposelo uvangaugama Nâlegaᴋ, tikiutigupse Israêlib nunanganut, nunamut, aggakka issângatilugit, angerutigilauᴋtamnut tunijomavlugo atâtapsingnut.
43Tagvanelo erᴋaijomârpose apᴋotigijapsingnik piniarnerijapsingniglo tamainik, ivsornartitsijutigijapsingnik ilipsingnik, maᴋojugilârposelo ilipsingnik, piungitulinerit piniartase tamaita pitjutigilugit.
44Kaujijuksaulârposelo uvangaugama Nâlegaᴋ, attera pivlugo sulivigigupse, apᴋutise idluitut maliklugi-ungitoᴋ, piniarniselo asserornartut maliklugi-ungitoᴋ, ilipse Israêlib ᴋitorngangit, oᴋarpoᴋ Nâlegaᴋ Nâlegaujoᴋ.
45Nâlekablo oᴋausingata tikipânga, oᴋarlune:
46Inûb erninga, kênait sâtiuk seᴋᴋinermut, oᴋausîllo kataktiuk seᴋinermut, naternablo ânêtub napârtoᴋotingit nelautaijutigikit;
47Napârtoliksuillo ânêtut oᴋautikit: Tusarsiuk Nâlekab oᴋausinga; Imâk oᴋarpoᴋ Nâlegaᴋ Nâlegaujoᴋ: Ahâk, ikomamik ikitsijomârpunga ilingne, napârtullo ômat ilûnaita, napârtullo pannait ilûnaita ilingnêtut nungutsomârpait: ikoma ikoâlajoᴋ ᴋamitaululângilaᴋ, kênallo ilûnatik ângat avunga tikidlugo tâpsomunga ôtaujomârput.
48Uvinilîllo ilûnatik takojuksaulârput uvanga Nâlegaᴋ ikilaurapko: ᴋaminiatsangilaralo.
49Uvangale oᴋarpunga: Ila, Nâlegaᴋ, imâk oᴋautigivânga; una adsiujutigut oᴋarpaktôlungilâᴋ?
Currently Selected:
Hesekiel 20: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
