Exodus 27
27
Otaksat tunerguservingat perᴋutingillo.
1Tunerguserviliortuksauvotillo ᴋejutsiarsajamit, talertut tallimatut takitigivlune, talertullo tallimatut siliktigivlune; tunerguservik iktoᴋeriktuksauvok: talertullo pingasutut poktotigijuksauvok.
2Nakjungillo sanajaksarivatit terreᴋungine sitamane; nakjungit tâmnatsainaujuksauvut; ᴋallineᴋartitaksarivallo ᴋaᴋorlermik.
3Sanajuksauvotillo argjaᴋautinginik, ᴋalugautinginiglo, pôgutaujanginiglo, kapoᴋautinginiglo, aumaᴋautinginiglo; perᴋutingit ilûnnatik ᴋaᴋorleojuksauvut.
4Kilapatâliortuksauvotillo tâpsomunga nuluangojârtomik ᴋaᴋorlermit; nuluangojârtublo terreᴋungine sitamane nuᴋloliortuksauvotit sitamanik ᴋaᴋorlernik.
5Ilijaksarivallo tunerguserviub ikomaᴋarvingata atânut, nulluangojârtoᴋ tunerguserviub ᴋerᴋanêtsiarᴋovlugo.
6Akigauteliortuksauvotillo tunerguserviub piksâgingnik, akigautîngnik ᴋejutsiarsajamit, ᴋallineᴋartilugiglo ᴋaᴋorlermik.
7Akigautîglo ilijaujuksauvuk nuklûngnut, akigautîglo tunerguserviub sanerâgingnêtuksauvuk, akigarianganut.
8Sâtojanit sanajaksarivat iloᴋarane: sorlo unertutijaungmat ilingnut ᴋakᴋame, taimâk sanajaksarivat.
9Tupiublo avatâ avalulioraksarivat; seᴋerngane avalut tâlutaᴋartuksauvut ᴋablunâᴋtajatsiamik, talertut 100tut takitigijunik;
10Napajungillo 20 manguviᴋartuksauvut 20nik ᴋaᴋorlernik; nappajullo kikkiaktangit ikârusingillo silbereojuksauvut.
11Tachânelotauk tâlutaᴋartuksauvok talertut 100tut takitigijunik, napajunginiglo 20nik, manguvinginiglo 20nik; napajullo kikkiaktangit ikârusingillo silbereojuksauvut.
12Tupiublo avatâta kangianêtub silingninga tâlutaᴋartuksauvok talertut 50tut sanimortotigijunik; napajunginiglo 10nik, manguvinginiglo 10nik.
13Avatâlo kitânêtok talertut 50tut sanimortotigijuksauvok.
14Tâlutat upkoab sanianêtut igluane talertut 15tut ituksauvut: napajungillo pingasut, manguvingillo pingasut.
15Igluanelo tâlutat talertut 15tut: napajungillo pingasut, manguvingillo pingasut.
16Avatâtalo upkoanganut tâlutaᴋartuksauvok talertut 20tut, tungujoktamik, tungulângajomiglo, aupalutsiartomiglo, ᴋablunâᴋtajatsiamiglo, takominarsauteliortauvlutik; napajungillo sitamaujuksauvut, manguvingillo sitamat.
17Napajut ilûnnatik avalunêtut ikâruseᴋartuksauvut silbereojunik, kikkiaktangillo silbereojuksaugivut, manguvingillo ᴋaᴋorleovlutik.
18Avalut ilua talertut 100tut takitigijuksauvok, silingningalo talertut 50tut ilûnâne, poktoningalo talertut tallimatut ᴋablunâᴋtajatsiamit, manguvingillo ᴋaᴋorleovlutik.
19Tupiublo perᴋutingit ilûnnatik atortangit kivgartornerme, kikkiaktangillo, avalullo kikkiaktangit ᴋaᴋorleojuksauvut.
20Israelikullo ᴋaitserᴋoniarpatit ilingnut napârtut orᴋsunganik kaugarsimajomik ikomaksanganut, ᴋolek ikimatsainarᴋovlugo.
21Ilagêt tupingane, upkub silatâne, kigligiutjineᴋtaliub sângane, Aronib erningitalo kamagijaksarivât unnungmit uvlârmut Nâlekab sângane; tamanna maligaksautsainartuksauvok kinguvânginut, Israêlikut akorngane.
Currently Selected:
Exodus 27: LIHB08
Highlight
Copy
Compare
Share
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
