Exodus 25
25
Tupek ivsornaitok perᴋutingillo ajoᴋertûtauvut.
1Nalekablo Mosese oᴋarvigivâ, oᴋarlune:
2Israêlikut oᴋarvigikit ᴋaitserᴋovlugit tunergutinik uvamnut: inungnit tamainit ᴋuviasuklutik ômmatimingnullo tunitjijunit tigujaksarivase tunergutit uvamnut.
3Tamadja tunergutit tigujaksarijase tâpkonangat: Goldelo, silberelo, ᴋaᴋorlerlo,
4Tungujoktarlo, tungulângajorlo, aupalutsiartorlo, ᴋablunâktajatsiarlo, tuktungajullo merᴋungit;
5Saukallo angusâluit amingit aupaluktitaumajut, ᴋabvîllo amingit, ᴋejutsiarsajallo;
6Orᴋsullo ᴋollinut, tipigiksaullo orᴋsumut mingoarutiksamut, iserluanerutiksamullo tipitsiariktomut;
7Alliguillo tungujuangajut, alliguillo ilijaksat ikiarmut opinartomut, sagvingmiutarmullo.
8Ivsornaitoviliorlillo uvamnut, iniksaᴋarungnarᴋovlunga akorngane.
9Tamaita ilingnut unertûtigijakka, tupiub ôktûtinga perᴋutingitalo ôktûtingit maliklugit, taimâk sanajaksarivase.
10Iklerviliortuksauvut ᴋejutsiarsajamit: tallertut Maggûtut abvatullo takitigijuksauvok, tallertullo atausertut abvatullo sanimuᴋarlune, tallertullo atausertut abvatullo poktotigijuksauvok.
11Kallineᴋartitaksarivallo goldemik ilaᴋangitomik, silatâgullo iluagullo ᴋallineᴋartitaksarivat. ᴋângalo avaliarutaᴋartitaksarivat goldemik avatâgut.
12Tâpsomungalo kovisijuksauvotit nuklûnik sitamanik goldemit, ililugillo terreᴋunginut sitamanut; nuklûk maggûk sanerangata igluanut, nuklûglo maggûk sanerangata igluanut.
13Akkigauteliortuksauvotillo ᴋejutsiarsajamit, ᴋallineᴋartilugiglo goldemik.
14Akkigautîglo ilijaksarivakik nuklûnut iklerviub sanerâgingnêtunut, iklervik akkigartaurᴋovlugo tâpkungnunga.
15Akkigautîk nuᴋlûnêtsainartuksauvuk: pêjartaujuksaungilak tagvangat.
16Kigligiutjinîllo tunijomajakka ilingnut ilijaksarivatit iklervingmut.
17Iksivaviliortuksauvotillo saimarvigijauvingmik goldemit ilaᴋangitomit: tallertut maggûtut abvatullo takitigijuksauvok, tallertullo atausertut abvatullo siliktigivlune.
18Kerubîngniglo maggûngnik goldemit sanajuksauvotit; katjuklugik sanajaksarivakik, iksivaviub saimarvigijauviub isûgingne.
19Kerubelo aipâ isuanêtilugo aipâne, Kerubelo aipanga isuanêtilugo aipangane; iksivaviub saimarvigijauviub isûgingne iglugêngne sanajaksarivakik.
20Kerubîglo isivitsijuksauvuk esarᴋumingnik ᴋollâgut, iksivavik saimarvigijauvik uliklugo esarᴋumingnut, kênâgik sângautijuksauvuk: iksivavik saimarvigijauvik sâvigivlugo kênâgik pijuksauvuk.
21Iksivaviglo saimarvigijauvik ilijaksarivat iklerviub ᴋânganut, kigligiutjinîllo tunijomajakka ilingnut ilijaksarivatit iklervingmut.
22Tagvanelo naipitsomavagit, oᴋaᴋatigijomavagillo iksivaviub saimarvigijauviub ᴋolânit, kerubîk iklerviub kigligiutjinektaliub ᴋânganêtuk akorngangnit, perᴋojat tamaita pivlugit tunijomajakka ilikut Israêlikunut.
23Sâliortuksaugivotit ᴋejutsiarsajamit: tallertut Maggûtut takitigijuksauvok, tallertullo atausertut siliktigivlune, tallertullo atausertut abvatullo poktotigivlune.
24ᴋallineᴋartitaksarivallo goldemik ilaᴋangitomik, avaliarutalioraksarivallo goldemik avatâgut.
25Pinarnarsauteᴋartitaksarivallo atâta avatâgut aggait silingningittitut siliktigijomik, siningalo avaliarutalioraksarivat ᴋolâgut goldemit.
26Tâpsomungalo nukloliortuksauvotit sitamanik goldemit, nuklullo ilivlugit niulungita sitamat terreᴋunginut sitamanut.
27Nuklut sinakjuata atânêtuksauvut, ᴋejûk akigautîk, sâmik akigautîk, kaimitaurᴋovlugik tagvunga.
28Akkigautîglo sanajaksarivakik ᴋejutsiarsajamit, ᴋallineᴋartilugiglo goldemik, sâ akigartaurᴋovlugo tâpkungnunga.
29Pôgutanginiglo, allupsautinginiglo, ᴋajutanginiglo ᴋalutanginiglo ᴋaluviojungnarᴋovlugo, sanajuksauvotit goldemit ilaᴋangitomit.
30Sâblo ᴋânganut ilijitsainartuksauvotit ᴋakᴋôjanik takonâraksanik sâmne.
31Naneroaᴋaviliortuksauvotillo goldemit ilaᴋangitomit: Sanajaujuksauvok katjuksimajomit: ikogganga, akkerungillo, ᴋingmingoangoangillo, paungangoangillo, nuvugulângoangillo tâmnatsainaujuksauvut.
32Akerᴋut 6it anijuksauvut sanerâgingnit; akerᴋut pingasut sanerangata aipânit, akerᴋullo pingasut sanerangata igluanit.
33Akerᴋut atunit ᴋingmingoangoaᴋartuksauvut pingasunik, paungangoamiglo nuvugulângoamiglo: taimâk akkerᴋut 6it naneroaᴋavingmit anijut atunit pitaᴋartuksauvut.
34Naneroaᴋaviublo nappajua ᴋingmingoangoaᴋartuksauvok sitamanik, paungangoangit nuvugulângoangillo ilagivlugit.
35Akerᴋuglo akilerêk atâgut paungangoaᴋartuksaugivok, akerᴋuglo akilerêk atâgut paungangoaᴋartuksaugivok, akerᴋuglo akilerêk atâgut paungangoaᴋartuksaugivok, akerᴋut 6it anijut naneroaᴋavingmit maliklugit.
36Paungangoat akerungillo tâmnatsainaujuksauvut: ilûnnane goldeojuksauvoᴋ katjuksimajomik.
37Âkᴋisûtingillo 7nit sanajaksarivatit, Âkᴋisurᴋovlugit ikomanginik, ᴋaumaivlutiglo sangmijamingnik.
38Takᴋersûtingillo argjaᴋautingillo goldeojuksauvut ilaᴋangitomik.
39Tâmna perᴋutingillo ilûnnaita sanajaksarivatit goldemit ilaᴋangitomit talentemit atautsimit. (Talente atausek paundititut 125ititut oᴋumaitigivalaivok.)
40Kamatsiarillo sanarᴋovlutit tâpkoninga ôktûte unertutaujok ilingnut ᴋakᴋame maliklugo.
Currently Selected:
Exodus 25: LIHB08
Highlight
Copy
Compare
Share
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
