Exodus 16
16
Tikiput sunaᴋajuitomut Sinimik atelingmut. Ajoksadlarlutik oᴋarnerlûtjivut. Gûdib tiliklervigivait aᴋigiarsungnik mannamiglo.
1Elimemillo aularput, ilagêllo Israêlikut iluêngartut tikiput sunaᴋajuitomut Sinimik atelingmut, Elimib Sinaiblo akorngangnêtomut, takᴋiub aipangata uvlungita 15ingane anilaungninginit nunamit Egiptenemit.
2Ilagêllo Israêlikut ilûnnatik oᴋarnerlûtjivut Mosesemut Aronemullo sunaᴋajuitome;
3Israêlikullo oᴋautivakit: Atso ilâ! nakudlarajalaungnerpoᴋ toᴋolaurupta Nâlekab agganginut nuname Egipteneme, iksivalaurapta ukkusit igautit saniane ᴋakᴋôjaktoraptalo akᴋeartorluta; tagva tikiutitipaptigut sunaᴋajuitomut ômunga ilagêt ukoa ilûnnaita toᴋotsomavlugit perlernermut.
4Nalekab tagva Mosese oᴋautivâ: Ahâk, ᴋakᴋôjamik piksapsingnik silalurᴋojijomavunga ᴋilangmit, inuillo anijuksauvut katersoivlutiglo uvlub piksanganik ᴋaut tamât, ôktoromagapkit arvertaromamangâta perᴋojamne pijomangimangâtalônêt.
5Kisianele uvlut 6ingane atuinarutijaksarivait angerautijatik, uvlut tamaita katersorpaktatik maggoertorlugo.
6Moseselo Aronelo oᴋarpuk Israêlikunut tamainut: Unnulerpat missigilârpose Nâlekab âsimangmase nunamit Egiptenemit:
7Uvlâkullo takolârpose Nâlekab ivlernarninganik; tusarmat oᴋarnerlûtjinipsingnik Nâlekamut: Uvagugle sunauvinûk oᴋarnerlûtigaptigûk?
8Moseselo oᴋarpok: Taimailârpok, Nâlekab tunitjiviginiarpâse nerᴋêjamik nerᴋiksapsingnik unnukut, ᴋakᴋôjamiglo akᴋeartûtiksapsingnik uvlâkut, Nâlekab oᴋarnerlûtjinise tâpsomunga tusarmagit: Uvagugle sunauvinûk? Oᴋarnerlûtjinise pilungilat uvaptîngnut, Nâlekamulle.
9Mosesiblo Arone oᴋautivâ: Ilagêt Israêlikut ilûnnaita oᴋarvigikit: Kaglileritse Nâlekab sânganut, oᴋarnerlûtjinise tusarmagit.
10Aroniblo ilagêt Israêlikut iluêngartut oᴋarvigingmagit, takosarput sunaᴋajuitomut, ahâglo, Nâlekab ivlernarninga takotipok nuvujarme.
11Nâlekablo Mosese oᴋarvigivâ, oᴋarlune:
12Israêlikut oᴋarnerlûtjiningit tusarpakka: oᴋarvigikit, oᴋarlutit: Unnupat nerᴋetolârpose, uvlâkullo aᴋeartolârpose ᴋakᴋôjamik, misigilârposelo uvangaugama Nâlegak Gûdise.
13Atso ilâ, unnulermat aᴋigearsuit tikiaᴋivut, tangmârvik mattuvlugo: Uvlâkullo mitsuksoak nunamêpok tangmârviub avatâne.
14Mitsuksoarlo nungungmat, ahâk, amiakôjoᴋarpok sunaᴋajuitub ᴋângane angmalukitânik mikijunik, sorlo ᴋakᴋornartut mikitigijunik.
15Israêlikullo takogamigit oᴋaudjutivut: Mânnauvut ukkoa! ᴋaujimalunginamik sunaungmangâta. Mosesiblo oᴋautivait: Tamadja ᴋakᴋôjak Nâlekab tunijanga ilipsingnut nerᴋiksaurᴋovlugo.
16Tamadja, tagga, Nâlekab perᴋojanga: Katersoigitse tâpkonangat ilûnnase atunit nerrijaluapsingnik, omerib (ôktûtib, gallonib abvanganit anginersârsub) tatautigijangatut angitigijomik attunit, inuᴋotipse unurningit maliklugit; tigusigitse atunit tuppemioᴋatingita piksanginik.
17Israêlikullo taimailiorput, katersoilarmiglo ilangit anginersamik, ilangit mikinersamik.
18Omeremullo ôktormatsuk, angijomik katersoijok simnikoᴋangilak, ikituniglo katersoijok amigaᴋsilungilak; Atunit katersoivut nerrijaluaminik.
19Moseselo oᴋarpok: ᴋautsamut amiakoᴋartoᴋarniarane.
20Kisianele Mosese nâlalungilât, ilangillo tamattoma ilanganik amiakoput uvlâmut, ᴋoperguᴋalerporlo tippelulerlarmelo: Mosesiblo ningautidlarpait.
21Katersorpaillo uvlât tamât, atunit nerrijaluaminik: Seᴋinerlo ônarsingmat aukpok.
22Uvlulle 6ingane katersoivut ᴋakᴋôjanik maggoertoraksanik, omeringnik maggûngnik inungmut atautsimut; ilagêllo angajoᴋângita Mosese oᴋautijartorpât.
23Tâpsomalo oᴋautivait: Gûdib, tagga, oᴋautigisimajanga: ᴋaupat Sabbateojok ivlernartok, merngoerserviksase Nâlekamut naliutivok. Otitsomajase ôtiniarsigik uvlome, igajomajaselo iganiarsigik; amiakoa torᴋorsiuk uvlâmut piksaᴋumitarilugo.
24Torᴋorpâllo uvlâmut, sorlo Mosese perᴋojingmat: Tippelulungilarlo ᴋoperguᴋalungilarlônêt.
25Moseselo oᴋarpok: Tâmna uvlome nerrisiuk; tagva uvlome Sabbateovok Nâlekamut: uvlome nagvârniangilase taimaitomik natername.
26Uvlune 6ne katersoraksarivase, uvlulle 7ingane, Sabbateojome, pitaᴋarniangilak.
27Sunaubvale, uvlut 7ingane inuit ilangit anivut katersoijomavlutik, nagvâlungilalle.
28Nâlegarlo tagva oᴋarpok Mosesemut: ᴋanok akunertigijomik perᴋojakka maligaksaurᴋojakkalo ᴋippilûtigisimagomavisigîk nâlegomanagit?
29Takoitse, Nâlekab tunitjivigingmase Sabbatemik, taimaimat uvlut 6ingane tunitjivigivâse uvlûk maggûk ᴋakᴋôjaksanginik; ilûnnase innigijapsingnêtuaritse, anijoᴋarniarane iniminit uvlut 7ingane.
30Taimaimat inuit merngoerserput uvlut 7ingane.
31Israêlikullo tamakkoa taivait Mannanik: korianderib (perortut ilangata) karngasûtiksangititut iput, ᴋaᴋortauvlutik; tipeᴋarpullo sorlo ᴋakᴋôjârsutut igupsaujârtut orᴋsuanik ilaliktut.
32Moseselo oᴋarpok: Tamadja, tagga, Nâlekab perᴋojanga: Omere tatalersiuk tâpkoninga, torᴋorsimajuksanik kinguvâksapsingnut; takorᴋovlugit ᴋakᴋôjanik nerrititsijutigilauktamnik ilipsingnik aularutigapse nunamit Egiptenemit.
33Mosesiblo Arone oᴋautivâ: Ilulerᴋumik tigusilerit, pititsivigivlugolo Mannanik, omerib tatautiluanganik, Nâlekablo sânganut iliuk, torᴋorsimajuksaurᴋovlugit kinguvâksapsingnut.
34Sorlo Nâlekab Mosese perᴋongmago, taimâk Aronib ilivâ kigligiutsineᴋtaliub sânganut, torᴋorsimajuksaurᴋovlugo.
35Israêlikullo nerrivut Mannanik jârit 40 nâvlugit, tikkerᴋârtinagit nunamut inulingmut; nerrivut Mannanik tikkerᴋârtinagit nunab Kânaanib kiglinganut.
36Omere tagva Efab tellimaujortunga.
Currently Selected:
Exodus 16: LIHB08
Highlight
Copy
Compare
Share
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
