Deuteronomy 4
4
1Manalo, Israêl, maligaksat idluarsautiksallo Ajuᴋertûtigijakka ilipsingnut tusarsigik, piniarᴋovluse tâpkoninga; inôᴋovluse, iterᴋovluselo nunalo Nâlekab, atâtapse Gûdingata, tunijanga ilipsingnut pigilugo.
2Oᴋauseᴋ perᴋojijutigijara ilipsingnut ilajaksaringilase ilangaraksarilungilaselônêt; Nâlekab Gûdipse perᴋojangit perᴋojarijakka ilipsingnut nelaudlugit piᴋovluse.
3Ijise takovut Nâlekab piniarninginik Baal-peor pitjutigilugo; angutit ilûnaita malilauᴋtut Baal-peoremik Nâlekab pêjarpait akunapsingnit.
4Ilipsele Nâlekamut Gûdipsingnut ungajose inôvose uvlome sulle, ilûnase.
5Ahâk, ajuᴋertorpapse maligaksanik idluarsautiksaniglo, sorlo Nâlekab Gûdima perᴋongmanga, taimailiorᴋovluse nuname aivigijapsingne pigijomavlugo.
6Taimaimat ivlerisigik piniarlugillo; tamanna ilisimanerigapsiuk silatunerilugolo inôᴋatigêksuit takkoane, tusalârtut maligaksauᴋojaujunik makkoninga tamainik, oᴋarniarlutiglo; Inôᴋatigêksuit tâpkoa ilisimadlarlutiglo silatudlartoksôvut.
7Nane inôᴋatigêksoaᴋarᴋâ taimak ᴋanitigijomik Gûdelingnik, sorlo Nâlegak Gûdivut ᴋanitigingmat uvaptingnut ᴋaigarsugvigijarangaptigô?
8Nanelônêt inôᴋatigêksoaᴋarᴋâ maligaksalingnik idluarsautiksalingniglo taimak idluartigijunik perᴋojatitut ukkutitunaᴋ uvlome unertutigijaptut ilipsingnût?
9Udjertortuinarit ilingnik, tarnîllo katsungaidlutit pairiuk, puigorᴋonak pisimajunik ijîkpît takojangangnik, pêjarᴋonagillo ômatingnit uvlut inôvigilârtatit tamaita nâvlugit; ᴋaujijautikille ᴋitorngarnut ᴋitorngavillo ᴋitornganginut;
10Uvloᴋ imna (puigornago) nangilauravit Nâlekab Gûdivît sângane Horebeme, Nâlekab oᴋautingmanga: Inuit katimatikit, tusartilârpakkalo oᴋauserijamnik, iliniarᴋovlugit sivôragijaksaringmanga uvlut inôvigilârtatik nuname tamaita nâvlugit, ajuᴋertuiᴋovlugillo ᴋitorngamingnik.
11Kaglilauᴋposelo nangerluselo ᴋakᴋab atâne; ᴋakᴋarlo ikomamut ikoâlavok ᴋilaub ᴋerᴋâ tikidlugo, tâᴋ, nuvujallo, tâᴋtoksoarlo ilautilugit.
12Nâlekablo oᴋarvigivâse ikomab iluanit; oᴋausingita nippingat tusarpase, tautulingmigle takolungilase; nippe kissiat tusarpase.
13ᴋaujitipâselo angerutigijaminik piniartauᴋojaminik ilipsingnut, tagva perᴋojanik 10nik; aglakpaillo aglagvîngnut ujarᴋângnut maggûngnut.
14Taipsomanelo Nâlekab ajuᴋertuiᴋovânga maligaksanik idluarsautiksaniglo piniaraksarijapsingnik nuname aivigijapsingne pigijomavlugo.
15Taimaimat udjertudlaritse ilipsingnik, ilutselingmik sumiglônêt takolaunginapse uvlorme Nâlekab oᴋarvigilauᴋtangane ilipsingnut Horebeme ikomab iluanit;
16Aseroiᴋonase ilipsingnik, ilipsingnullo inungoaliorᴋonase sunalônêt adsilivlugo, angutingoarmik arnangoarmiglônêt,
17Nergjutingoarmiglônêt nunamêtomik, tingmingoarmiglônêt tingisômik ᴋilaub ikiangane,
18Pâmgortungoarmiglônêt nuname pâmgorpaktomik, aulasakkangoarmiglônêt imânêtomik nunab atâne;
19Arlortitsiᴋonaglônêt ijîkingnik ᴋilangmut, seᴋinerlo, taᴋᴋerlo, uvloritjallo, ᴋilaub katimgajokotingit, takonârlugit, kajungersartauniarlutillo tâpkoa pâmaktervigijomavlugit kivgartoromavlugillo, Nâlekab ilingatitangit inôᴋatigêksoarnut tamainut ᴋilaub ilûnane atâne.
20Nâlekab ilaliormase anitiluselo kikiangmik auktitsivingmit, Egiptenemit, inuᴋutauᴋovluse kingormgutijaksamik tâpsomunga, sorlo uvlome igapse.
21Nâlekablo ama ningarvigivânga pitjutigivluse, oᴋamariklune Jordan ikâraksaringinapko, nunalo piodlartok Nâlekab Gûdivît kingormgutijaksautitanga ilipsingnut aivigijaksaringinapko;
22Toᴋojuksaugamale nuname tamattomane, Jordaniblo ungatânôrtuksaunanga; ilipsele ikâlârpose nunatsiarlo tâmna pigilugo.
23Udjertoritse nangminipsingnik, puigorᴋonase Nâlekab Gûdipse angerutigijanganik ilipsingnut, adsingoaliorᴋonaselo sunab adsinganik Nâlekab Gûdivît inerterutigijanganik ilipsingnik.
24Nâlegak Gûdît ikomauvok nungutsijok, Gûdeovlune ilungertortok.
25Kitorngatarupse erngutatârluselo, nunamêᴋitârupselo, asserorupselo ilipsingnik, adsingoaliorluselo Nâlekab Gûdivît takkoane, tâmna ningarsârlugo;
26ᴋilak nunalo kigligiutjingorᴋovâka ilipsingnut uvlorme tamattomane, mânakut pêjartaudlamarilârapse, nunamit, Jordan ikârdlugo, aivigijapsingnit pigijomavlugo; uvluse tagvane unuksitiniangilase, nungutaumarilârposele.
27Nâlekablo siamartitsomârpâse inôᴋatigêksuit akorngane, amiakojomârposelo inuit ikitut inôᴋatigêksoarne Nâlekab aularutjauviotitangane ilipsingnut.
28Tagvanelo kivgartulârpose Gûdingoarnik, inuit aggangita sanajanginik, ᴋejungnik ujarᴋaniglo, tautulungitunik tusangituniglônêt, nerrilungitunik naijungnangituniglônêt.
29Tagvangallo Nâlegak Gûdît ᴋenerungne, nagvâlârpat, ômamut tamânut tarnemullo tamânut ᴋenerungne.
30Kapiasungnermêguvit, tamakkoa ilûnatik tikipatit uvlune kingorlerne, uteromârpotit Nâlekamut Gûdingnut, tâpsomalo nippinga nâleklugo;
31Nâlegak Gûdît Gûdeongmat nâpkigosuktok; tâpsoma ᴋujanârutiginiangilâtit asserorniangilâtillônêt, puigorniangilarlo angernermik angerutigilauᴋtaminik atâtagijarnut.
32Aperᴋutigikit uvlut ᴋângersimajut, sivunernêtut, uvlormit Gûdib pingortitsivigilauᴋtanganit inungnik nuname, kilaublo issuanit issuata aipânut, mattotunak angitigijoᴋalaungmangât, mattotunarlônêt tusaumajaujoᴋarmangât.
33Inuit tusalauᴋsimavât Gûdib nippinganik ikomab iluanit oᴋartomik, sorlo igvit tusaravit, inôvlutiglô?
34Gûdelônêt tigusinasualauᴋsimavâ inôᴋatigêksoarnik nangminerijomajaminik inôᴋatigêksuit tâpkoa assingita akornganit, ôktornernut, nelunaikutanut, tatamnartulinernut, unatarnermut, aggangnut pitsartudlartunut, tallermullo issamijomut, kapianartovaksoarnullo, sorlo Nâlekab Gûdipse piniulaungmase Egipteneme ijipse sânginê?
35Ilingnut unertutigijaulauᴋpok, ᴋaujiᴋovlutit Nâlegak, tâmnaungmat Gûde, nelleᴋangimallo.
36ᴋilangmit tusartipâtit nippiminik, ajuᴋertoromagamitit; nunamelo takotipâtit ikomaᴋsoaminik, oᴋausingillo tusarpatit ikomab iluanit.
37Atâtatillo nagligilauramigit, tamanna pivlugo tâpkoa kinguvângit annerivait kingorngane, Egiptenemillo tikiupâtit najornerminut pitsartunerminut;
38Inôᴋatigêksuit angerᴋijatit pitsarᴋijatillo ᴋemâtitsomavlugit sivunernit, itertitsomavlutit, tâpkoa nunangat kingormgutijaksautitsomavlugo ilingnut, sorlo uvlome ingmat.
39Taimaimat nelojungnailerit uvlome, ômamiutarilugolo, Nâlegak tâmnaungmat ᴋilangme pâne, nunamelo atâne Gûdeojok; nelleᴋangilak.
40Maliluaraksarivatillo tâpsoma maligaksangit perᴋojangillo, uvlome ilingnut perᴋojarijakka, pilluangoᴋovlutit, igvit ᴋitorngatillo kingunerne, uvlutillo unuksiᴋovlugit nuname Nâlekab Gûdivît tunijangane ilingnut soraijuitomik.
41Mosesib tagva iglugasaksuit pingasuit Jordanib ungatâne seᴋinerûb nuiviata nelâne ingmikôrtipait;
42Tagvunga ᴋemâᴋovlugo inungmik toᴋotsijok, pijârinane, ômiginagolo sivorngane toᴋotsisimajok; ᴋêmâvlunelo iglugasaksuit makkoa nelianut, inôᴋovlugo;
43Tamadja, Bezer, sunaᴋajuitome naternarme, Rubenekunut; Ramotelo, Gileademe, Gadikunut; Golanelo, Bâsaneme, Manassekunut.
44Tamadjalo maligaksat Mosesib pititangit Israêlikut sânginut;
45Tamadja kigligiutjinerit, maligaksallo, idluarsautiksallo Mosesib oᴋautigijangit Israêlikunut Egiptenemit anisimangmatta;
46Jordanib ungatâne, naᴋsarme Bet-peorib nelâne, Sihonib, Amorikut ataningata, Hesboneme ineᴋalauᴋtûb, nunangane, tâmna Mosesib Israêlikullo sâlagivât Egiptenemit pigamik;
47Nunangalo tiguvât pigilugolo, Ogiblo, Bâsanib ataningata, nunangatauᴋ, Amorikut atanîgit maggûk, Jordanib ungatâne, seᴋerngûb nuiviata nelâne;
48Aroeremit, Arnonib naᴋsangata kiglinganêtomit, ᴋakᴋak Sion, (tagva Hermon) tikidlugo,
49Naᴋsarsoarlo ilûnane Jordanib ungatâne taunane, naᴋsarsûb imarbinga, Pisgab atsangajângita timâne, tikidlugo.
Currently Selected:
Deuteronomy 4: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.