Deuteronomy 3
3
1Sanguvogut tagva, majorarpogullo apᴋut Basânemut sangmijok atorlugo; Ogiblo, Bâsanib ataningata, pagreariartorpâtigut, tâpsomalo inuᴋotingitalo tamaita, sorᴋsugomavluta Edreime.
2Nâlekablo oᴋautivânga: Erᴋsiginiarpago pit; tâmnalo inungillo nunangallo tunimagapkit aggangnut; piniarvigilârpallo sorlo Sihon, Amorikut ataningat, Hesboneme igloᴋalauᴋtok, piniarvigilaurangne.
3Taimaglo Nâlekab Gûdipta Og, Bâsanib ataninga, inuᴋotingillo tamaita, tunivait aggaptingnut; annaudlarpavullo amiakoᴋarungnaimariᴋârtinago.
4Neliutomelo tâpsomane iglugasaksoangit tamaita tiguvavut; iglugasaksoaᴋangilak tigulungitaptingnik tâpkonangat; iglugasaksuit 60, Argobib erᴋâ tamât, Ogib ataniovinga Bâsaneme.
5Tâpkoa ilûnatik iglugasaksoangolauᴋput pinnailutaᴋarlutik ᴋarmanik poktojunik, upkoaᴋsoaniglo, seningajuniglo; iglugasangniglo ama ᴋarmaᴋangitunik unuktunik.
6Tâpkoa asserormarilauᴋpavut, sorlo Sihon, Hesbonib ataninga, piniarvigilauraptigo, iglugasaksuit inuktalit ilûnaita asserormariklugit, arnat sorutsillo ilagilugit.
7Nergjutille tamaita, iglugasaksuillo perᴋutingit, aᴋsârnigarivavut pigijomavlugit.
8Neliutomelo tâpsomane nuna tigulauᴋpavut Amorikut atanîkita maggûk Jordanib ungatânêtuk agganginit, Arnonib naᴋsanganit ᴋakᴋak Hermon tikidlugo;
9(Zidonemiut Hermon atserarpât Sirionemik, Amorikulle taivât Seniremik;)
10Iglugasaksuit tamaita naternamêtut, Gileadelo ilûnât, Bâsanelo ilûnât, Salkalo Edreilo, iglugasaksuit Ogib ataniovingane Bâsaneme, tikidlugit.
11(Og, Bâsanib ataninga, kissime amiakotôvok inukpangnit; ahâk, iglinga kikiangovok; Rabamêngilâk, Amorikunê? Tallertut 9tut takitigivok, tallertullo sittamatut senimut, angutib tallinga ôktûtigilugo.)
12Nunalo tâmna tigulauᴋpavut taipsomane, pigijomavlugo; Aroeremit, Arnonib naᴋsangata kiglinganêtomit, nunablo Gileadib ᴋakᴋaliub abvanga, iglugasaksoangillo ilagilugit, tunivakka Rubenekunut Gadekunullo;
13Gileadiblo amiakoa, Bâsanelo ilûnât, Ogib ataniovinga, tunivakka kinguvârêt Manassekut abvanginut; Argobib erᴋâ ilûnât, Bâsan ilûnât. (Tamanna inukpait nunanganik taijauvok.
14Jairib, Manassib erningata, Argobib erᴋâ ilûnât, Gesuremiut Makatemiullo kiglingat tikidlugo, tiguvât; atinelo adsigilugo, Bâsanemêtut atserarpait Havot-jairemik, uvlome tikidlugo.)
15Gileadelo tunivara Makiremut.
16Rubenekullo Gadekullo tunitjivigivakka Gileademit Arnonib naᴋsanga tikidlugo, naᴋsab ᴋerᴋâ kigligilugo; kôk Jabbok, tamadja Ammonekut kiglingat, tikidlugo;
17Naᴋsarsoarlo, Jordan kigligilugo, Kineretemit naᴋsarsûb imarbinga, imarbik tarriok, Pisgab atsangajângita atânêtok, tikidlugo.
18Perkolaukpapse taipsomane, oᴋarlunga: Nâlekab Gûdipse nuna tamanna tunimavâ ilipsingnut, perᴋutauᴋovlugo; sakkolijarluse ikârtuksauvose ᴋatangutipse Israêlikut sângine, angutit sorᴋsukpaktut ilûnatik.
19Nuliasele, ᴋitorngaselo, nergjuteᴋotiselo (ᴋaujimagama nergjuteᴋoteᴋadlarapse) paijuksauvut iglugasaksoaᴋotipsingne tunijamne ilpisingnut;
20Nâlekab ᴋatangutise merngoerserviksaᴋartilugit ilipsetut piᴋârtinago, tâpkoalo nunalo Nâlekab Gûdipse tunijanga tâpkonunga Jordanib ungatâne pigilugo piᴋârtinagit; taipsomanelo utilârpose ilûnase atunit pigijapsingnut tunimajamnut ilipsingnut.
21Neliutomelo tâpsomane Josua perᴋolauᴋpara, oᴋarlunga: Ijîkik tautukpuk tamainik Nâlekab Gûdivît piniarninginik atanîngnut tâpkungnunga maggûngnut: taimailioromârivait ataniovit tamaita ikârvigijase.
22Sivôragijaksaringilase, Nâlekab Gûdipse sorᴋsugutigijomârmase.
23Nâlegarlo ᴋenuvigilauᴋpara taipsomane, oᴋarlunga:
24Nâlegak Gûde, angijoksônit, aggatillo pitsartujut nelonaijalerpatit kivgarnut; kina Gûdeovâ ᴋilangmelônêt nunamelônêt piniarungnartok piniarnitit suliarijatillo pitsartudlartut adsilivlugît?
25Ikârlangatôk, nunalo piodlartok Jordanib ungatânêtok takolugo, ᴋakᴋatsiangojok, Libanonelo.
26Pitjutigilusele Nâlekab ningarvigivânga, tusângilângalo; Nâlekablo oᴋautivânga: Tamanna nâmaksijutigituinaruk; taijungnaisaruk uvamnut.
27Majorarit Pisgab ᴋânganut, takosarillo kangimut, taggamullo, seᴋinermullo, unungalo, ijingnullo takonârit; Jordan tâmna ikâraksarilunginangne.
28Josuale perᴋoleruk, maksuatilugolo, pitsartutilugolo; tâmna ikârtuksaungmat inuit ukkua sângine, tâpsomalo kingormgujitilârpait nunamik takojaksarnik.
29Kikarpogut tagva naᴋsarme Bet-peorib nelâne.
Currently Selected:
Deuteronomy 3: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.