एफिसी 3
3
पावलम अरु आन कली पशो गेय
1मिनु गो पावल अर्को रागी ङा मुर इन कली ख्रीस्त येसु आ लोव़ शेंतीके साङलोम पाइक्साक्यी। #फिलिप्पी १:७,१३ 2परमप्रभु यावेमी “अर्को मुर आन कली आं शिशी आ पर्बम शेंदो” दे आं कली गेय पाइब सेल्ती। गेपुकीम एको लोव़ नेंशो बाक्नी माइ, दे मिम्नुङ। #गलाती २:७ 3दोपा परमप्रभु यावेमी आ ख्रुइश्शो लोव़ आं कली तुइक्पदा, मोपा ङोंइतीन इन कली इचइच्का ब्रेक्ने थुम्शो बाक्ती। #एफिसी १:९-१०; गलाती १:१२ 4मिनु गेपुकीमी मेको पढेनीनु, ख्रीस्त आ पर्बम ख्रुइश्शो लोव़ ङा गेय दोपा पवा, दे आं तुइश्शो लोव़ रुप्ने चाप्नीनी। 5मुल परमप्रभु यावे आ सोक्तीमी येसु ख्रीस्त आ सोइश्शो नु परमप्रभु यावे आ लोव़ पाइब आन कली परमप्रभु यावे आ ख्रुइश्शो मार बाक्बा, दे शेंताक्ङमी। ङोंइती ङा मुरपुकीमी चहिं मतुइश्शो बाक्तेक्म। #कलस्सी १:२६ 6मिनु मेको ख्रुइश्शो लोव़ मार बाक्ब देंशा हना, अर्को रागी ङा मुरपुकी यो इस्राएली नु खाल का ङा दुम्शा, अङस ताइब बाक्नीम। मेको नेल्ल रां का नम। ग्येरपाइक्ब लोव़मी मार देंब देंशा हना, ख्रीस्त येसु कली थमा सुइश्शा, मेकोपुकी यो परमप्रभु यावे आ कबल ताइब बाक्नीम। #एफिसी ३:१३,१८-१९; प्रेरित १५:७-९
7मोपा अर्को रागी ङा मुर आन कली ग्येरपाइक्ब लोव़ शेंचा, दे शेंब सेल्ती। परमप्रभु यावे आ सक्तिम पतीके आ शिशी मोशा गेप्तु। 8गो परमप्रभु यावे आ मुर नेल्ल आन क्येङा आइक्च बाक्नुङ। मिनु परमप्रभु यावेमी आ शिशी रे आं कली “अर्को रागी ङा मुर आन कली ख्रीस्त आ शिशी गिश ठेयब बाक्बा तुइक्पाइक्मी” दे शेंब सेल्ती। #१ कोरिन्थी १५:९-१०; गलाती १:१६; एफिसी १:७ 9मिनु मारेइ मारेइ सेल्ब परमप्रभु यावेमी रागी सेल्शो रे ख्रुइश्शा वोइश्शो नेल्ल आन कली तपाइक्चा, दे कोंइब सेल्ती। #एफिसी १:९-१०; रोमी १६:२५-२६; कलस्सी १:१६ 10मारदे आं कली मोदेंशो सेल्ती देंशा हना, येसु ख्रीस्त कली थमा सुइक्बपुकीमी परमप्रभु यावे आ मिम्शो मार बाक्बा, मेको स्वर्गम बाक्ब हुकुम नु अधिकार पाइब आन कली तुइक्पदमेक्ल, दे आं कली कोंइब सेल्ती। #१ पत्रुस १:१२ 11मेको परमप्रभु यावे आ गेना हना यो मिम्शो लोव़ बाक्त। मेको मुल इं प्रभु ख्रीस्त येसु रे खाप्शो बाक्त। 12मोपा येसु ख्रीस्त कली थमा सुइक्तीकेमी गोपुकी महिंथु, इं कली दाक्ब, दे तुइश्शा, परमप्रभु यावे आ नेक्था जाक्दीत्नय। #रोमी ५:२ 13इन पर्बम गो श्येत जशो बाक्नुङ। मेको इन कली रिम्शो दुम्ब। मोपतीके आं कली श्येत जशो तशा महिनीन। #कलस्सी १:२४
14मोदेंशो पा गो इं आफ परमप्रभु यावे आ ङोंइती बाप्शा, पोक्च थेक्शा, इन कली मिम्शा पुंइशा बाक्नुङ। 15परमप्रभु यावे सरीङ नु रागीम बाक्ब नेल्ल आन आफ बाक्ब। 16मिनु गोमी परमप्रभु यावे कली “इन शुश छेङछेङ नु सक्तिम, एफिसस ङा थमा सुइक्ब आन थुं बोल्यो सेलीन। मिनु इन सोक्त आन थुंमी बाक्मेनु, महिंब दुम्नीम। #एफिसी १:७; एफिसी ६:१०; २ कोरिन्थी ४:१६ 17मोपा थमा सुइक्तीके ख्रीस्त मेको आन थुंमी बाक्ब। मिनु ‘येसु ख्रीस्तमी आं कली दाक्ब’ दे शाक्श ग्रुक्शो रवा खोदेंशो पा इन दाक्तीकेमी ख्रुम्शो मुरपुकी सेलीन। #यूहन्ना १४:२३; कलस्सी २:७ 18मो दुम्मेनु, मेकोपुकी नु नेल्ल थमा सुइक्बपुकीमी येसु ख्रीस्त आ मुर आन कली दाक्तीके गिश ब्रेम्शो, गिश दुइश्शो, गिश लाइश्शो नु गिश लुक्च लशो बाक्मे, मेको नेल्ल रुप्तीक थुं गेने। 19ख्रीस्त आ दाक्तीके गिश ठेयब बाक्बा, मेको रुप्ने मचाप्चा ङा बाक्त हना यो, मेको आन कली रुप्पतीन। मिनु परमप्रभु यावे, गे दोपा मारेइ मारेइमी गाप्शो बाक्नीनी, मोपा मेको आन कली यो इन सक्तिमी प्रिंदीन। #कलस्सी २:२-३ 20गे नेल्ल आन क्येङा ठेयब सक्ति पाइश्शो बाक्नीनी। मोपतीके इन सक्ति रे आंइ पुंइशो नु मिम्शो क्येङा यो शुश गेने चाप्नीनी। 21मिनु थमा सुइक्ब आंइ दातेमी येसु ख्रीस्त आ नेंमी नेल्ल पाला ङा मुरपुकीमी इन कली गेना हना यो ठेयब सेल्नीकी, आमेन” दे इन पर्बम पुंइनुङ।
Currently Selected:
एफिसी 3: SUSZ
Highlight
Copy
Compare
Share
Want to have your highlights saved across all your devices? Sign up or sign in
© 1992, 2011 Wycliffe Bible Translators Inc.
