Dagiti Salmo 88
88
Kararag a Pagdawat iti Tulong#PAULO ITI HEBREO: Salmo dagiti annak ni Core; maysa a kanta. Daniw ni Heman nga Esrahita.
1Agmalmalem nga umaw-awagak, O Apo a Diosko,
ket iti rabii, umayak iti saklangmo.
2Ipangagmo koma toy kararagko;
denggem toy panagdawatko iti tulongmo.
3Nakaad-adu a rigat ti nagpasarak
ket ita asidegakon ken patay.
4Naibusanakon iti pigsa;#4 Naibusanakon iti pigsa; wenno awan ti tulong nga umay kaniak.
naibilangakon a natay a kas kadagiti dadduma.
5Nabaybay-anak iti lugar dagiti natay;
kaslaak kadagiti napapatay nga addan iti tanemda,
isuda a nalipatamon a namimpinsan,
ket saanmo idan a matulongan.
6Intapuaknak iti yuyeng ti tanem,
iti abut a kasipngetan ken kaunggan.
7Agdissuor kaniak ti nakaro a pungtotmo,
ket lapunosendak dagiti dalluyonmo.
8Inyadayom dagiti gagayyemko kaniak;
pinagbalinnak a makarimon kadakuada,
ket diak makaruar ditoy nakaipupokak.
9Nakapsuten ti panagkitak gapu ti panagsagabak.
Kenka, O Apo, inaldaw nga umawagak,
agkararagak a silalayag dagiti imak.
10Agiparangka aya iti milagro kadagiti natay?
Bumangonda aya tapno agdaydayawda kenka?
11Iti tanem, saritaenda aya ti napudno nga ayatmo?
Iti lugar a pakadadaelan, saritaenda aya ti kinamatalekmo?
12Iti kasipngetan, makita aya
dagiti karkarna nga aramidmo?
Iti daga ni lipat, mabigbig
aya ti kinaimbagmo?
13O Apo, umawagak a patulongan kenka;
agkararagak kenka iti tunggal agsapa.
14Apay, O Apo, a laksidennak?
Apay nga ilingedmo ta rupam kaniak?
15Kakaasi ken agngangabitak ken patay sipud pay idi ubingak;
inibturak dagiti panggugormo ket itan mautoyanak.
16Ti rungsotmo naglasat kaniak,
ket dagiti pangdidigram dinadaeldak.
17Agmalmalem a kasda la layus a manglawlaw kaniak;
linakubdak ket awan ti paglisiak.
18Uray dagiti nadekket a gagayyem inyadayom kaniak;
ti laeng sipnget ti nabati a kaduak.
Currently Selected:
Dagiti Salmo 88: RIPV
Highlight
Copy
Compare
Share
Want to have your highlights saved across all your devices? Sign up or sign in
© 1996 Philippine Bible Society
