Dagiti Salmo 40
40
Kanta a Pagdayaw#PAULO ITI HEBREO: Salmo ni David.
1Siaanusak a nagur-uray iti Apo;
inallingagnak ket dinengngegna ti asugko.
2Iti napeggad nga abut
inaonnak, kasta met iti gayong-gayong a nakailumlomak.
Iti rabaw ti bato insagpatnak,
iti kasta, natalged ti pannagnak.
3Insuronak nga agkanta iti baro a himno,
maysa a kanta a pagdaydayaw iti Diostayo.
Agbutengto ti adu a makakita,
ket iti Apo agtalekda.
4Nagasat ti tao a ti Apo ti pagtalkanna,
ket saan a dagiti napasindayag ti pagkamanganna,
wenno agdaydayaw kadagiti didiosen.
5Adu ti impapaaymo kadakami, O Apo a Diosmi.
Awan ti kas kenka.
Adu dagiti nakaskasdaaw a panggepmo kadakami.
Diak maisao amin ida, ta naruayda.
6Dagiti#Heb. 10:5-7. daton ken sagut dimo tarigagayan;
dimo kiddawen ti daton a mapuoran,
wenno daton tapno ti basol mapakawan.
Inikkannak ketdi iti lapayag tapno mangngegka,
7iti kasta kinunak, “Adtoyak.
Adda dagiti bilbilinmo kaniak iti libro ti Linteg.#7 Adda…libro ti Linteg; wenno nailanad iti librom ti kinatulnogko kenka.
8Ti panangtungpal iti pagayatam, O Dios, isut' ragsakko.
Ipapusok dagiti bukodmo a pannursuro.”
9Iti taripnong dagiti amin a tattaom, O Apo,
imbagak ti naimbag a damag a mangisalakanka.
Ammom a diakto agsardeng a mangipakaammo.
10Diak inlimlimed ti damag ti panangisalakanmo;
kanayon nga ibagbagak
ti kinapudnom ken ti panangispalmo.
Wen, diak inlimlimed
ti di agbalbaliw nga ayat ken kinapudnom,
iti dakkel a taripnong dagiti tattaom.
11Ammok, O Apo,
a dimonto isardeng ti mangngaasi kaniak!
Ti di agbalbaliw nga ayat ken kinapudnom
ti kanayon a pagtalgedak.
Kararag a Pagdawat iti Tulong
(Sal. 70)
12Dagiti kinadakes a nanglikmut kaniak aduda;
Dagiti basbasolko inaddagandak,
ket saanakon a makakita.
Ad-aduda ngem dagiti buok iti ulok,
ket awanen ti natda a turedko.
13Kaasiannak, O Apo, ket isalakannak.
Umaykan ta tulongannak!
14Mawarawara koma a mamimpinsan ken maibabain
dagiti agpanggep a mangdangran kaniak.
Mapasanud koma ken maibabain
dagiti agragsak gapu iti pakariribukak.
15Kasta met dagiti mangang-angaw kaniak
kumapsutda koma iti inda pannakaabak.
16Agragsak ken agrag-oda koma
amin nga umay agkamang kenka!
Amin a mangipateg iti panangisalakanmo
kanayon koma a kunada, “Nagtan-ok ketdin ti Apo!”
17Nakurapay ken nakakaasiak,
ngem silalagipka, kaniak, O Apo.
Sika ti salakan ken Diosko—
O Diosko, darasem ti umay tumulong kaniak!
Currently Selected:
Dagiti Salmo 40: RIPV
Highlight
Copy
Compare
Share
Want to have your highlights saved across all your devices? Sign up or sign in
© 1996 Philippine Bible Society
