Job 8
8
Agsao ni Bildad a Suhita:
1-2Nalpas kadin ti bukodmo a bitla?
Atiddog ngem awan met ti linaonna.
3Ballikugen aya ti Dios ti hustisia?
Killoenna aya ti kinalinteg?
4Nalabit a nakabasol dagiti annakmo;
dinusa ida ti Dios kas maitutop iti aramidda.
5Agkamangka iti Dios a Mannakabalin-amin,
ket agpakpakaasika kenkuana.
6No pudno a nalintegka ken awan basolmo,
awan duadua a tulongannaka ti Dios,
ket isublina a kas gunggonam dagiti napukawmo.
7Dinto maidilig ti napukawmo a kinabaknang
iti itedto kenka ti Dios iti kamaudianan,
8Amirisem#Sir. 8:9. ti kinasirib idi punganay;
utobem dagiti nasursuro dagidi ammatayo.
9Ababa unay ti biagtayo ket ania ti ammotayo?
Ditoy daga, anniniwan laeng ti kayarigantayo.
10Paisuroka kadagiti mamasirib idi ugma;
ammoem ti pannursuroda, denggem ti ibagada:
11“Saan nga agtubo dagiti runo iti awan danumna;
iti la kadanuman ti pakasarakan kadakuada.
12No agmaga ti nagtuboanda,
magangoda idinto a kalanglangtoda,
ken saan pay a mabalin a makeltay,
kadagiti amin a mula, umunada a malaylay.
13Mayarig dagiti awan Diosna kadagita a runo;
apaman a lipatenda ti Dios, mapukaw metten ti namnamada.
14Agtalekda iti panait—iti sapot ti lawwalawwa.
15Matuangda no agsanggirda iti balay ti lawwalawwa;
no kumpetda iti panait, matulonganna aya ida a tumakder?”
16Kasla barsanga dagiti managdakdakes nga agtubo iti kainitan,
barsanga nga agsaknap iti minuyongan.
17Kadagiti bato, agkawikaw dagiti ramutda,
kadagiti dadakkel a bato nairut ti ikakapetda.#17 nairut ti ikakapetda; Iti Hebreo, kumita.
18Ngem no parutem ida,
awan ti makaammo a sadiay ti nagtuboanda.
19Wen, kasta laeng ti ragsak dagiti managdakdakes,
adda dagiti umay a sumublat iti lugarda.
20Saan a baybay-an ti Dios dagiti napudno a tattao;
dina met tulongan dagiti nakillo.
21Pagragsakennakanto manen;
agkatawakanto, agriawkanto iti rag-o.
22Ngem ibabainna dagiti manggura kenka,
ket awanton ti taeng dagiti managdakdakes.
Currently Selected:
Job 8: RIPV
Highlight
Share
Compare
Copy
Want to have your highlights saved across all your devices? Sign up or sign in
© 1996 Philippine Bible Society
