Exodo 23

Ti Hustisia ken ti Umisu a Panangikeddeng

1“Dikay#Ex. 20:16; Lev. 19:11-12; Deut. 5:20. agiwaras iti sao nga awan kinapudnona. Dikay tulongan ti tao a nagbasol babaen iti panagsaksiyo iti ulbod. 2Diyo suroten ti kaaduan no agaramidda iti dakes wenno agulbodda tapno dadaelenda ti hustisia. 3Ngem#Lev. 19:15. diyo ipakita nga ayonanyo ti napanglaw bayat ti pannakaidarumna.

4“No#Deut. 22:1-4. makitayo a nakabulos ti baka wenno asno ti kabusoryo, tiliwenyo ket isubliyo kenkuana. 5No nakusbo ti asnona gapu iti nadagsen nga awitna, diyo baybay-an ngem tulonganyo ketdi a mangpatakder.

6“No#Lev. 19:15; Deut. 16:19. maisaklang ti napanglaw, diyo ipaidam ti hustisia kenkuana. 7Dikay agpabasol no awan pammaneknekyo. Diyo papatayen ti tao a nalinteg ken awan basolna. Dusaek ti siasinoman nga agaramid iti kasta a kinadakes. 8Dikay umawat iti pasuksok, ta ti pasuksok pagbulsekenna ti tao ket dina makita ti nalinteg ken dadaelenna ti kalintegan dagiti awan basolna.

9“Diyo#Ex. 22:21; Lev. 19:33-34; Deut. 24:17-18; 27:19. idadanes ti ganggannaet. Ammoyo ti rikna ti maysa a ganggannaet ta ganggannaetkayo met idi idiay Egipto.

Ti Maikapito a Tawen ken ti Maikapito nga Aldaw

10“Mulaanyo#Lev. 25:1-7. ti dagayo iti las-ud ti innem a tawen ket urnongenyo ti maapit. 11Ngem iti maikapito a tawen, diyo mulmulaan ket diyo met ap-apiten ti aniaman nga agtubo. Bay-anyo nga agpaay kadagiti napanglaw ti aniaman nga agtubo ket baginto met dagiti atap nga animal ti matda. Kasta met ti aramidenyo kadagiti mulayo nga ubas ken olibo.

12“Innem#Ex. 20:9-11; 31:15; 34:21; 35:2; Lev. 23:3; Deut. 5:13-14. nga aldaw nga agtrabahokayo, ngem aginanakayo iti maikapito nga aldaw tapno makainana dagiti tagabu ken ganggannaet nga agtartrabaho kadakayo, kasta met dagiti baka ken asnoyo.

13“Ipangagyo ti amin nga imbagak kadakayo. Dikay agkararag kadagiti didiosen wenno baliksen la koma dagiti naganda.

Dagiti Tallo a Kangrunaan a Fiesta

(Ex. 34:18-26; Deut. 16:1-17)

14“Tallo a fiesta ti rambakanyo iti tinawen kas pammadayaw kaniak. 15Iti#Ex. 12:14-20; Lev. 23:6-8; Num. 28:17-25. bulan ti Abib, ti bulan nga ipapanawyo idi idiay Egipto, rambakanyo ti Fiesta ti Tinapay nga Awan Lebadurana. Kas imbilinko kadakayo, tinapay laeng nga awan lebadurana ti kanenyo iti las-ud ti pito nga aldaw bayat ti fiesta. Dikay umay agdaydayaw kaniak no awan ti idatonyo.

16“Rambakanyo#Lev. 23:15-21; Num. 28:26-31; Lev. 23:39-43. ti Fiesta ti Panagapit babaen iti panangidatonyo ti umuna a maapit kadagiti talonyo.

“Rambakanyo ti Fiesta ti Abong-abong iti panaggibus ti tawen, inton burasenyo ti bunga dagiti kaubasan ken minuyonganyo. 17Tunggal tawen, kadagitoy a fiesta, masapul nga umay dagiti amin a lallaki tapno agdaydayawda kaniak nga Apo a Diosyo.

18“Diyo pakuyogan iti tinapay nga adda lebadurana ti dara ti animal nga idatonyo kaniak. Diyo met ipabigat ti taba dagiti animal a maidatag kaniak kadagitoy a fiesta.

19“Yegyo#Deut. 26:2; Ex. 34:26; Deut. 14:21. iti balay ni Yahweh a Diosyo ti bunga ti umuna nga apit ti talonyo tunggal tawen.

“Diyo lutoen ti urbon a karnero wenno kalding iti gatas ti inana.”

Dagiti Kari ken Balakad

20“Ibaonko ti maysa nga anghel nga umun-una ngem dakayo tapno salaknibannakayo iti panagdaliasatyo ken ipannakayo iti lugar nga insaganak. 21Ipangagyo ket tungpalenyo ti amin nga ibagana. Diyo sukiren gapu ta siak ti nangibaon kenkuana ket dinto mapakawan ti siasinoman nga agsukir. 22Ngem no ipangagyo ket aramidenyo ti amin nga ibagak, gubatek dagiti amin a kabusoryo. 23Idalannakayto ti anghelko. Ipannakayo iti daga dagiti Amorreo, Heteo, Perezeo, Cananeo, Heveo ken Jebuseo ket dadaelekto ida. 24Dikay agrukbab wenno agdaydayaw kadagiti didiosenda. Diyo tuladen dagiti ar-aramidenda. Dadaelenyo dagiti didiosenda ket rebbaenyo dagiti nasantoan a bato nga adigida. 25No agdaydayawkayo kaniak, ni Yahweh a Diosyo, ikkankayo iti makan ken danum ken ilisikayo kadagiti amin a kita ti sakit. 26Iti dagayo, awanto ti babai a maalisan ket awanto met ti lupes. Ikkankayto iti atiddog a biag.

27“Gapu iti aramidek, agbutengto kaniak dagiti amin a bumusor kadakayo ket kiburekto dagiti kagubatyo. Pagsanudekto amin a kabusoryo ket itarayandakayto. 28Kellaatekto dagiti kabusoryo ket agtataraydanto amin nga agkakaribuso.#28 Kellaatekto…agkakaribuso; wenno Ibaonkonto dagiti uyokan kadagiti kabusoryo. Paksiatekto dagiti Heveo, Cananeo, ken Heteo inton sumungadkayo. 29Saankonto pay laeng a pagtalawen amin ida iti uneg ti maysa a tawen tapno saan a mabaybay-an ti daga ken saan nga umadu unay dagiti atap nga animal a pagpeggadanyo. 30In-inutekto a papanawen ida agingga nga umadukayo ket kabaelanyo a tagikuaen ti daga. 31Mangruginto ti beddengyo iti Baybay a Nalabaga#31 Kayatna a sawen, ti Gulfo ti Aqaba. agingga iti Baybay a Mediterranean ken manipud let-ang agingga iti Karayan Eufrates. Ikkankayto iti pannakabalin a mangparmek kadagiti taga-sadiay ket pagtalawenyonto ida iti isusungadyo. 32Dikay makitulag kadakuada wenno kadagiti didiosenda. 33Diyo ipalubos nga agnaed dagitoy a tattao iti pagilianyo. No ipalubosyo nga agnaedda, pagbasolendakayto iti maibusor kaniak. No agdaydayawkayo kadagiti didiosenda, isunto ti pakaigapuan ti pannakadadaelyo.”

Currently Selected:

Exodo 23: RIPV

Highlight

Compare

Copy