Taga-Efeso 5
5
Ti Panagbiag iti Lawag
1Gapu ta dakayo ti annak a patpatgen ti Dios, masapul a tumuladkayo kenkuana. 2Ti#Ex. 29:18; Sal. 40:6. koma ayat ti mangiturong iti panagbiagyo, kas iti ayat nga impaay ni Cristo kadatayo babaen iti pannangtedna iti biagna gapu kadatayo, kas nabanglo a sagut ken daton a makaparagsak iti Dios.
3Tattaonakayo ti Dios. Saan ngarud a rumbeng nga adda pakasarsaritaanyo maipapan iti pannakikamalala wenno kinarugit wenno kinaagum. 4Di met tumutop nga agisawangkayo kadagiti naalas, minamaag wenno narugit a balikas. Agyamankayo ketdi iti Dios. 5Dikay agduadua iti daytoy: Awanto ti lugar ti mannakikamalala, narugit wenno naagum iti pagarian ni Cristo ken ti Dios. (Ta ti kinaagum ket maysa a kita ti panagrukbab iti didiosen.)
6Dikay paallilaw iti siasinoman babaen kadagiti ulbod a sarsarita. Dagitoy ti pakaigapuan ti panagdissuor ti pungtot ti Dios kadagiti saan nga agtulnog kenkuana. 7Ngarud, dikayo makikadua kadagiti kasta a tattao. 8Addakay idi iti sipnget, ngem gapu ta nagbalinkayon a tattao ti Apo, addakayon iti lawag. Isut' gapuna a masapul nga agbiagkayo a kas tattao a naruam nga agtaeng iti lawag. 9Ta ti lawag#9 Ta ti lawag: Ta ti Espiritu, kuna ti dadduma a manuskrito. ti mangyeg iti nawadwad a bunga ti amin a kita ti kinaimbag, kinalinteg ken kinapudno. 10Birokenyo no ania ti pakaragsakan ti Apo. 11Adaywanyo dagiti tattao nga agaramid kadagiti awan serserbina a banag nga agtaud iti sipnget. Ibutaktakyo ketdi ida. (12Kinapudnona, nakababain uray ti panangsarita laeng kadagiti ar-aramidenda iti nalimed.) 13Ket inton maiparangarang ti amin a banag iti lawag, makitanto a silalatak ti pudno a kababalinda. 14Ta ti aniaman a maipalgak a silalawag agbalin a lawag. Daytoy ti gapuna a makunkuna,
“Agriingka, sika a matmaturog,
Bumangonka ken ni patay!
Ket lawagannakanto ni Cristo.”
15Ngarud, annadanyo ti panagbiagyo. Dikay agbiag a kas nakuneng a tattao, no di ket kas mamasirib. 16Usarenyo#Col. 4:5. ti amin a gundawayyo nga agaramid iti naimbag agsipud ta dakes dagitoy nga aldaw. 17Dikay ngarud agkunkuneng. Ammoenyo ketdi ti kayat ti Apo nga aramidenyo.
18Dikay agbarbartek ta isut' pakadadaelanyo. Ikagumaanyo koma ketdi nga agtaeng kadakayo ti Espiritu. 19Iti#Col. 3:16-17. panagsasaritayo, usarenyo dagiti balikas dagiti salmo, himno ken naespirituan a kankanta. Kantaanyo ti Apo kadagiti himno ken salmo a buyogan ti naimpusoan a panagdaydayaw. 20Kanayon nga agyamankayo iti Dios Ama gapu kadagiti amin a banag, iti nagan ni Apotayo a Jesu-Cristo.
Ti Annongen dagiti Agassawa
21Paiturayankay iti maysa ken maysa kas pakakitaan iti panagraemyo ken ni Cristo.
22Babbai,#Col. 3:18; 1 Ped. 3:1. paiturayankayo kadagiti assawayo, kas iti panangituray ti Apo kadakayo. 23Ta adda kalintegan ti lalaki a mangibaga no ania ti aramiden ti asawana, a kas met iti kaadda ti kalintegan ni Cristo a mangibaga iti aramiden ti iglesia. Ket ni Cristo a mismo ti Mangisalakan iti iglesia a bagina. 24Iti kasta, masapul a paiturayan dagiti babbai kadagiti assawada iti amin a banag, a kas met iti iglesia a paiturayan ken ni Cristo.
25Lallaki,#Col. 3:19; 1 Ped. 3:7. ayatenyo dagiti assawayo a kas iti panagayat ni Cristo iti iglesia. Indatonna ti biagna gapu kenkuana. 26Inaramidna daytoy tapno pasantoenna ti iglesia iti Dios babaen iti panangugasna iti danum ken saona,#26 panangugasna iti danum ken saona: awan kaes-eskan ti buniag (wenno bautisar) no di mabuyogan iti pannakaikasaba ken panangawat iti sao. 27tapno idatagna iti sangoananna met laeng: ti iglesia a kasla babai a nakapimpintas—nadalus, awan mansa wenno kuretret wenno aniaman a pakapilawanna. 28Rebbeng ngarud nga ayaten ti lalaki ti asawana a kas iti panagayatna iti bagina. Ti lalaki nga agayat iti asawana, ayatenna met ti bagina. (29Ta awan ti tao a manggura iti bukodna a bagi. Taraonanna ketdi ken taripatoenna a kas iti panangtaraon ken panangtaripato ni Cristo iti iglesia. 30Ta kamkamengnatayo ti bagina.) 31Kas#Gen. 2:24. kuna ti Nasantoan a Surat, “Daytoy ti gapuna a panawanto ti lalaki dagiti nagannak kenkuana. Makitiponto iti asawana ket agbalindanto a maymaysa.”#31 Basaen ti Gen. 2:24. 32Adda dakkel a kinapudno nga iparangarang daytoy a paset ti Nasantoan a Surat, ket maawatak a mayaplikar daytoy ken ni Cristo ken iti iglesia. 33Mayaplikar met daytoy kadakayo. Masapul nga ayaten ti tunggal lalaki ti asawana a kas iti bagina. Masapul met a raemen ti tunggal babai ti asawana.
Currently Selected:
Taga-Efeso 5: RIPV
Highlight
Share
Copy
Want to have your highlights saved across all your devices? Sign up or sign in
© 1996 Philippine Bible Society