Deuteronomio 27
27
Maisurat dagiti Linteg ti Dios kadagiti Tapi a Bato
1Kinuna ni Moises ken dagiti pangulo ti Israel kadagiti tattao, “Tungpalenyo dagiti amin nga ibilinko kadakayo ita nga aldaw. 2Iti#Jos. 8:30-32. aldaw a ballasiwenyo ti Karayan Jordan a mapan iti daga nga ited kadakayo ti Apo a Diosyo, mangipasdekkayto iti sumagmamano a dadakkel a bato sayo palitadaan. 3Isuratyo kadagitoy dagiti amin a linteg ken pannursuro. Inton nakastrekkayon iti nabaknang ken nadam-eg a daga nga ited kadakayo ti Apo a Diosyo kas inkarina kadagidi kapuonanyo, 4ket addakayon iti ballasiw ti Jordan, ikabilyonto dagitoy a bato idiay Bantay Ebal sayo palitadaan a kas imbilinko kadakayo. 5Mangbangonkayo#Ex. 20:25. sadiay iti altar a bato a maipaay iti Apo a Diosyo; dikay agaramat iti landok nga alikamen. 6Ngamin, masapul a saan a natikapan dagiti bato nga aramatenyo iti aniaman nga altar a bangonenyo a maipaay iti Apo a Diosyo. Sadiay ti pangidataganyo kadagiti daton a mapuoran. 7Sadiay met ti pangidataganyo ken pangananyo iti daton a pakikappia ket agyamankay iti imatang ti Apo a Diosyo. 8Isuratyo a silalawag ti tunggal balikas dagiti linteg ti Apo kadagiti napalitadaan a bato.”
9Kinuna ni Moises ken dagiti papadi a Levita kadagiti amin nga Israelita: “Tattao ti Israel, dumngegkayo a nalaing! Ita nga aldaw, nagbalinkayon a tattao ti Apo a Diosyo. 10Agtulnogkayo ngarud kenkuana ket tungpalenyo dagiti amin a lintegna nga itedko kadakayo ita nga aldaw.”
Dagiti Lunod a Maipatay kadagiti Agsukir
11Imbaga ni Moises kadagiti Israelita, 12“Apaman#Deut. 11:29; Jos. 8:33-35. a maballasiwyo ti Jordan, dagiti sumaganad a tribu ti agtakderto iti Bantay Gerizim inton mabendisionan dagiti tattao: Simeon, Levi, Juda, Issacar, Jose ken Benjamin. 13Dagitoyto met ti agtakder iti Bantay Ebal inton maipakdaar dagiti lunod: Ruben, Gad, Aser, Zabulon, Dan ken Neftali. 14Kastoyto ti ipakaammo dagiti Levita iti napigsa a timek:
15“‘Maipatay#Ex. 20:4; 34:17; Lev. 19:4; 26:1; Deut. 4:15-18; 5:8. ti lunod ti Dios iti siasinoman nga agaramid iti didiosen a bato, kayo wenno metal ket pagdaydayawanna iti nalimed. Kagura ti Apo ti panagdaydayaw kadagiti didiosen.’
“‘Amen,’ isungbatto dagiti tattao.
16“‘Maipatay#Ex. 20:12; Deut. 5:16. ti lunod ti Dios iti siasinoman a di agraem kadagiti nagannak kenkuana.’
“‘Amen,’ isungbatto dagiti tattao.
17“‘Maipatay#Deut. 19:14. ti lunod ti Dios iti siasinoman a mangyalis iti mohon ti daga ti kaarrubana.’
“‘Amen,’ isungbatto dagiti tattao.
18“‘Maipatay#Lev. 19:14. ti lunod ti Dios iti siasinoman a mangyaw-awan iti bulsek.’
“‘Amen,’ isungbatto dagiti tattao.
19“‘Maipatay#Ex. 22:21; 23:9; Lev. 19:33-34; Deut. 24:17-18. ti lunod ti Dios iti siasinoman a mangilupitlupit iti kalintegan ti ganggannaet, ulila wenno balo a babai.’
“‘Amen,’ isungbatto dagiti tattao.
20“‘Maipatay#Lev. 18:8; 20:11; Deut. 22:30. ti lunod ti Dios iti siasinoman a mangibabain iti amana iti panangkaiddana iti siasinoman kadagiti assawa ni amana.’
“‘Amen,’ isungbatto dagiti tattao.
21“‘Maipatay#Ex. 22:19; Lev. 18:23; 20:15. ti lunod ti Dios iti siasinoman a mangkaidda iti animal.’
“‘Amen,’ isungbatto dagiti tattao.
22“‘Maipatay#Lev. 18:9; 20:17. ti lunod ti Dios iti siasinoman a mangkaidda iti kabsatna a babai wenno kabsatna iti ama wenno iti ina.’
“‘Amen,’ isungbatto dagiti tattao.
23“‘Maipatay#Lev. 18:17; 20:14. ti lunod ti Dios iti siasinoman a mangkaidda iti katuganganna a babai.’
“‘Amen,’ isungbatto dagiti tattao.
24“‘Maipatay ti lunod ti Dios iti siasinoman a mangliput a mangpatay iti padana a tao.’
“‘Amen,’ isungbatto dagiti tattao.
25“‘Maipatay ti lunod ti Dios iti siasinoman nga umawat iti pasuksok tapno patayenna ti awan basolna.’
“‘Amen,’ isungbatto dagiti tattao.
26“‘Maipatay#Gal. 3:10. ti lunod ti Dios iti siasinoman a di agtulnog iti amin a linteg ken pannursuro ti Dios.’
“‘Amen,’ isungbatto dagiti tattao.”
Currently Selected:
Deuteronomio 27: RIPV
Highlight
Share
Compare
Copy
Want to have your highlights saved across all your devices? Sign up or sign in
© 1996 Philippine Bible Society
