Deuteronomio 26
26
Dagiti Maidaton nga Apit
1Intuloy ni Moises, “Kalpasan ti panangsakupyo iti daga nga ited kadakayo ti Apo a Diosyo ket agnaedkayon sadiay, 2masapul#Ex. 23:19. a mangalakay iti umuna nga apit iti tunggal mulayo. Ibasketyo dagitoy ket ipanyo iti naituding a lugar a pagrukbaban. 3Inkay iti padi nga agserserbi iti dayta a tiempo ket kunayo kenkuana, ‘Kayatko nga ipakaammo iti imatang ti Apo a Diosko nga addaakon iti daga nga inkarina kadagidi kapuonanmi.’
4“Alaen ti padi ti basket sana ikabil iti sango ti altar ti Apo a Diosyo 5ket ipakaammoyo iti imatang ti Apo a Diosyo, ‘Maysa nga agalla-alla nga Arameo ni amak a nangipan iti familiana idiay Egipto. Bassit ti bilangda idi napanda sadiay ngem immaduda ket nagbalinda a nabileg a pagilian. 6Pinarparigatdakami dagiti Egipcio ket pinilitdakami nga agtrabaho a kas tagabu. 7Immasugkam iti Apo a Dios dagiti kapuonanmi. Impangagna dagiti asugmi; nakitana ti panagsagaba, pannakaparparigat ken panagladladingitmi. 8Babaen iti naindaklan a pannakabalinna, impanawnakam idiay Egipto. Nagiparang kadagiti milagro ken datdatlag a pasamak. Nakabutbuteng dagiti pasamak a pinarnuayna. 9Inyegnakami ditoy ket intedna kadakami daytoy nabaknang ken nadam-eg a daga. 10Ngarud, yegko iti Apo ti umuna nga apitko iti daga nga intedna kaniak.’
“Ikabilyo ti basket iti imatang ti Apo ket agrukbabkayo sadiay. 11Agyamankayo gapu iti amin a naimbag a banag nga inted kadakayo ti Apo a Diosyo, dakayo ken ti familiayo. Awisenyo a makipagrambak dagiti Levita ken dagiti ganggannaet nga agnaed iti sakupyo.
12“Tunggal#Deut. 14:28-29. maikatlo a tawen, itedyo dagiti apagkapullo dagiti apityo kadagiti Levita, ganggannaet, ulila ken balo a babbai tapno iti amin nga ili adda umanay a taraonda. Kalpasanna, 13kunayo iti Apo, ‘Awanen ti nabati iti nasagradoan nga apagkapullo iti balayko. Intedko kadagiti Levita, ganggannaet, ulila ken balo a babbai a kas imbilinmo kaniak. Awan ti sinalungasingko wenno nalipatak a bilinmo maipapan iti apagkapullo. 14Diak nangan iti apagkapullo idi nagminatayak. Awan ti inruarko iti daytoy idi maibilangak a narugit iti imatang ti linteg. Awan met ti indatonko uray sangkabassit laeng kadagiti natay. Tinungpalko ti pagayatam, O Apo. Inaramidko amin nga imbilinmo kaniak maipapan iti apagkapullo. 15Tumannawagka ngarud manipud nasantoan a pagtaengam sadi langit ket bendisionam dagiti tattaom nga Israelita ken ti nabaknang ken nadam-eg a daga nga intedmo kadakami, kas inkarim kadagidi kapuonanmi.’
Dagiti Tattao ni Yahweh
16“Ita nga aldaw, ibilin ti Apo a Diosyo a tungpalenyo dagiti amin a lintegna. Tungpalenyo ngarud ida a sipapasnek iti amin a puso ken kararuayo. 17Ita nga aldaw, binigbigyo ti Apo a kas Diosyo. Inkariyo nga agtulnogkayo kenkuana, tungpalenyo dagiti lintegna ken aramidenyo amin nga ibilinna. 18Ita#Ex. 19:5; Deut. 4:20; 7:6; 14:2; Tit. 2:14; 1 Ped. 2:9. nga aldaw, inawatnakayo ti Apo a tattaona a kas inkarina kadakayo ket bilinennakayo a tungpalenyo amin a lintegna. 19Pagbalinennakay a nabilbileg ngem dagiti dadduma a pagilian a pinarsuana ket maidaydayaw ken maitan-okto ti naganna.#19 maidaydayaw…naganna; wenno umawat iti pannakaitan-ok ken pammadayaw. Dakayto dagiti nasantoan a tattaona a kas inkarina.”
Currently Selected:
Deuteronomio 26: RIPV
Highlight
Share
Compare
Copy
Want to have your highlights saved across all your devices? Sign up or sign in
© 1996 Philippine Bible Society
