SAN MARCOS 1
1
Nda Juan cui̱i̱ lo'o ngu' ne' quixi̱' su ná ndi'i̱ ñati̱
1Nde nscua cha' nu ntsu'u su̱u̱ cha' tso'o ji'i̱ Jesucristo, nu sca ti Sñi' ycui' Ndyosi. 2Cua sa'ni nguscua jyo'o Isaías nu ngua tu'ba ji'i̱ ycui' Ndyosi ñi'ya̱ nu caca xana cha' re. Ndi'ya̱ nscua cha' bi':
Culo na' cña ji'i̱ sca ñati̱ nu caca xca̱ 'na, nacui̱ ycui' Ndyosi ji'i̱ Cristo,
cha' tsaa yu nde loo nu'u̱.
Bi' laca nu saala tyucui̱i̱ su tsaa nu'u̱, nacui̱ Ni.
3Cui̱i̱ xi'ya yu ne' quixi̱'. Ndi'ya̱ ñacui̱ yu: “Xaala clya ma̱ sca tyucui̱i̱ su ca̱a̱ ycui' nu Xu'na na; xquiñi tso'o ma̱ tyucui̱i̱ su tyeje tacui ycui'”.
4Ñi'ya̱ nu nguscua Isaías cha' bi', jua'a̱ ndyu'u tucua Juan ne' quixi̱' su ná ndi'i̱ ñati̱. Lo'o li' nchcui' yu lo'o ngu' cha' caca tyuju'u ti' ngu' ji'i̱ lcaa cha' cuxi nu ntsu'u ji'i̱ ngu', cha' culochu̱' ngu' ji'i̱ cha' cuxi bi', cha' jua'a̱ cua'ni clyu ti' ycui' Ndyosi ji'i̱ ngu' bi'. Li' tyucuatya Juan ji'i̱ ngu' bi'. 5Ndyu'u ti'i̱ quiña'a̱ tsa ñati̱ slo Juan; ñaa ngu' quichi̱ sube ti nu ndi'i̱ loyuu su cuentya Judea slo yu, lo'o jua'a̱ ñaa ngu' Jerusalén nu quichi̱ tonu bi' slo yu. Nu ñati̱ nu ngua tyuju'u tsa ti' ji'i̱ cha' cuxi nu ntsu'u ji'i̱ ngu' ni, ngüijña ngu' ji'i̱ ycui' Ndyosi cha' cuityi̱ Ni cha' cuxi bi', lo'o li' ntyucuatya Juan ji'i̱ ngu' bi' lo hitya sta'a̱ Jordán.
6Lo'o nu Juan bi' ni, lacu' yu sca late' quicha̱' camello, lo'o ndyaaca̱' juata sii' yu. Ndacu yu tscu' lo'o cuiñaa' cuityu̱. 7Ndi'ya̱ laca cha' nu nchcui' yu lo'o ñati̱ bi':
―Ntsu'u sca ñati̱ nu cua ca̱a̱ ti; cua nda Ni 'na lijya̱a̱ yala la, pana ñati̱ bi' laca loo la ―nacui̱ Juan ji'i̱ ngu'―. Lo'o na', cua'ni tlyu na' ji'i̱ ñati̱ bi'; tso'o tsa caca tyiquee na' masi caña nu ntsu'u quiya' ñati̱ bi' sati̱' na' juata ti. 8Lo'o hitya ti ntyucuatya na' ji'i̱ ma̱, pana ná tyucuatya yu bi' ji'i̱ ngu' lo'o hitya ti, masi cua'ni yu cha' tyanu Xtyi'i ycui' Ndyosi ne' cresiya ji'i̱ ngu' cha' caca lubii ngu' tsiya' ti, nu lo'o tyucuatya yu ji'i̱ ngu'.
Ntyucuatya Juan ji'i̱ Jesús
9Lo'o li' ca tiya' la xi ngutu'u Jesús quichi̱ Nazaret nde loyuu su cuentya Galilea bi', ndyaa yu su ndi'i̱ Juan ca to' sta'a̱ Jordán. Li' ntyucuatya Juan ji'i̱ ycui' Jesús lo hitya sta'a̱. 10Lo'o cua tyu'u ti Jesús lo hitya, li' na'a̱ cha' cua ndyaala tyucui̱i̱ nde cua̱. Li' ngua'ya Xtyi'i ycui' Ndyosi su ndu̱ Jesús; ñi'ya̱ ndyacui sca tyupe', jua'a̱ ngua'ya Xtyi'i ycui' Ndyosi lo Jesús li'. 11Lo'o li' nguañi nchcui' ycui' Ndyosi ca su ntucua Ni nde cua̱. Ndi'ya̱ nacui̱ Ni:
―Nu sca ca Sñi' na' laca nu'u̱, lo'o jua'a̱ ntsu'u tsa tyiquee na' ña'a̱ na' jinu'u̱ ―nacui̱ ycui' Ni ji'i̱ Jesús―. Tyaca'a tsa nu'u̱ 'na ―nacui̱ Ni.
Nti' nu xña'a̱ tyiji̱loo ji'i̱ Jesús
12Lo'o li' hora ti ndyaa lo'o Xtyi'i ycui' Ndyosi ji'i̱ Jesús nde ne' quixi̱' su ná ndi'i̱ ñati̱. 13Ndyaa Jesús li', tu'ba tsa̱ ndyanu yu ycui' ti yu ne' quixi̱', lo'o jua'a̱ ndi'i̱ na'ni tyaala ne' quixi̱' bi'. Li' ndyalaa Satanás slo yu, ngua ti' tyiji̱loo ji'i̱ Jesús si cua'ni ca yu cña cuxi. Lo'o cua ndye cha' bi', li' ndyalaa xca̱ ji'i̱ ycui' Ndyosi slo Jesús cha' xtyucua ngu' ji'i̱ yu, cha' ta ngu' xi juersa ji'i̱ yu.
Nguxana Jesús ndyu'ni cña ji'i̱ ycui' Ndyosi Sti yu ca nde Galilea
14Lo'o ca tiya' la ngusu'ba ngu' ji'i̱ Juan ne' chcua̱. Li' nguxtyu̱u̱ Jesús nde loyuu su cuentya Galilea, nclyu'u yu ji'i̱ ngu' ñi'ya̱ laca cha' tso'o ji'i̱ ycui' Ndyosi.
15―Cua ndyalaa hora cha' caca ycui' Ndyosi loo ne' cresiya ji'i̱ ñati̱ ―nacui̱ Jesús―. Ca tyuju'u ti' ma̱ ji'i̱ lcaa cha' cuxi nu ntsu'u ji'i̱ ma̱; culochu̱' ma̱ ji'i̱ cha' cuxi bi', cha' li' taca xñi ma̱ cha' tso'o nu ji'i̱ ycui' Ndyosi nu cua'ni lyaá ji'i̱ ma̱.
Ngusi'ya Jesús ji'i̱ jacua tya'a ñati̱ nu ndya'a̱ cuta cualya
16Lo'o ngua sca tsa̱ nu ndya'a̱ Jesús to' tayu' Galilea, li' na'a̱ yu ji'i̱ Simón, lo'o Andrés tya'a ngula Simón; ndya'a̱ ngu' cuta cualya lo'o taraya, cha' bi' laca cña nu ndu'ni ngu' bi' lcaa tsa̱. 17Nchcui' Jesús lo'o ngu' bi' li':
―Tsaa ma̱ lo'o na' ―nacui̱ Jesús ji'i̱ ngu'―. Xa' cña culu'u na' ji'i̱ ma̱ juani, cha' clyana ma̱ ji'i̱ ñati̱ chalyuu nu nguna' chalyuu ji'i̱ xqui'ya cha' cuxi, cha' caca ngu' bi' ñati̱ jna' ―nacui̱.
18Ndyuna ngu', lo'o hora ti nguxtyanu ngu' taraya ji'i̱ ngu', ndu'u ngu' ndya'a̱ ngu' lo'o Jesús li'.
19Lo'o cua ndyaa la xi Jesús, li' na'a̱ yu ji'i̱ tyucuaa sñi' Zebedeo nu naa Jacobo lo'o Juan. Nga'a̱ ngu' ne' yaca ni'i̱ sube ti, ndyu'ni cho'o ngu' taraya ji'i̱ ngu'. 20Li' ngusi'ya Jesús ji'i̱ ngu' cha' tsaa ngu' lo'o yu. Hora ti nguxtyanu ngu' ji'i̱ Zebedeo sti ngu', ndyanu nu cusu' bi' lo'o msu ji'i̱ ne' yaca ni'i̱ sube ti. Ndu'u ngu' ndyaa tyucuaa sñi' nu cusu' bi' lo'o Jesús.
Ngusñi cui'i̱ cuxi ji'i̱ sca nu qui'yu
21Lo'o li' ndyalaa ca ta'a ngu' ca quichi̱ Capernaum. Tsa̱ ta'a lo'o ndi'i̱ cña' ngu', li' ndyaa Jesús ne' laa ji'i̱ ngu' cha' culu'u yu ji'i̱ ngu'. 22Lo'o ndyuna ngu', li' ndube tsa ti' ngu' ñi'ya̱ cha' nclyu'u Jesús ji'i̱ ngu'. Ngua ti' ngu' cha' tlyu tsa chacuayá' ntsu'u ji'i̱ yu lo'o nchcui' yu lo'o ngu', si'i ñi'ya̱ nclyu'u mstru nu nclyu'u cha' jo'ó ne' laa. 23La cui' ne' laa bi' nga'a̱ sca nu qui'yu nu ntsu'u cui'i̱ cuxi ji'i̱. Ngusi'ya tsa yu ji'i̱ Jesús li':
24―¿Ñi'ya̱ cha' nti' nu'u̱ chcui' lo'o na', Jesús Nazaret? ―nacui̱ nu quicha bi'―. ¿Ha cua nti' nu'u̱ cua'ni tye nu'u̱ cha' jna'? ―nacui̱―. Pana nslo na' jinu'u̱. Ycui' nu lubii laca nu'u̱, lo'o cua nda ycui' Ndyosi jinu'u̱ lijya̱ ca nde.
25Li' ngua'a Jesús ji'i̱ cui'i̱ cuxi nu ntsu'u ji'i̱ nu quicha, ngulo ji'i̱ cui'i̱ cuxi bi' cha' tyaa tsiya' ti.
―Nga'aa chcui' nu'u̱ ―nacui̱ Jesús ji'i̱―. Nga'aa cua'ni xña'a̱ cui'i̱ lo'o nu'u̱.
26Li' nguxalú cui'i̱ cuxi bi' ji'i̱ nu quicha. Cui̱i̱ ngusi'ya yu lo'o ngutu'u cui'i̱ bi' ndyaa li'. 27Ndyutsi̱i̱ tsa lcaa ngu' li'. Nchcui' ngu' lo'o tya'a ngu' ndi'ya̱:
―¿Ñi'ya̱ laca cha' re? ―nacui̱ ngu'―. ¿Ha xa' cha' nclyu'u nu jua ji'i̱ ñati̱? ―nacui̱ ngu'―. Nchca ji'i̱ yu jua culo yu cña, masi ji'i̱ cui'i̱ cuxi nclyo yu cña; hora ti nduna bi' cña nu ngulo yu ji'i̱, ndu'u nu cui'i̱ bi', ndyaa li'.
28Yala ti nguañi cha' ji'i̱ Jesús lcaa quichi̱ nde loyuu su cuentya Galilea li'.
Ngua'ni Jesús jo'o ji'i̱ xtya'a̱ laa Simón Pedro
29Lo'o li' ngutu'u Jesús ne' laa bi' lo'o Jacobo lo'o Juan, ndyaa ngu' ca to' tyi Simón lo'o Andrés. 30Li' ndacha' ngu' ji'i̱ Jesús cha' quicha tsa xtya'a̱ laa Simón; tlyu tsa tyique' ntsu'u ji'i̱ ma', ntsiya ti ma' lo qui'ña. 31Li' ndyaa Jesús slo nu quicha bi', ngusñi yu ya' ma' cha' xtyucua yu ji'i̱ ma' tyatu̱ ma'. Hora ti ndyu'u tyique' ji'i̱ ma' bi'. Lo'o ti nguxana ma' ngua'ni cho'o xi scuaa cacu ngu' li'.
Ngua'ni Jesús jo'o ji'i̱ quiña'a̱ tya'a ngu' quicha
32Cua ngusi̱i̱ tsa li'. Lo'o ndyaa cuichaa, li' ya̱a̱ lo'o ngu' ji'i̱ lcaa ngu' quicha slo Jesús, masi nu ngusñi cui'i̱ cuxi ji'i̱, masi nu ntsu'u xa' lo quicha ji'i̱. 33Ña'a̱ tsaca quichi̱ cua ndyu'u ti'i̱ ngu' ca to' ni'i̱ ji'i̱ Simón. 34Ngua'ni Jesús jo'o ji'i̱ ngu' li', masi quiña'a̱ lo quicha ntsu'u ji'i̱ ngu'; masi ngu' nu ngusñi cui'i̱ cuxi ji'i̱, ndyaca tso'o ngu' lo'o ngulo Jesús ji'i̱ cui'i̱ bi'. Pana ná nda Jesús chacuayá' chcui' cui'i̱ cuxi bi', cha' cua ndyuloo cui'i̱ bi' ji'i̱ ycui' Jesús.
Nda Jesús cha' ji'i̱ ycui' Ndyosi lo'o ngu' ca nde Galilea
35Lo'o bilya quixee chaca tsa̱, li' ndyatu̱ Jesús; ndu'u yu, ndyaa yu xi nde ne' quixi̱' su ti̱ ti ndu̱ chalyuu, cha' chcui' yu lo'o ycui' Ndyosi cajua. 36Pana Simón lo'o xa' tya'a ndya'a̱ yu ni, ndyaa ngu' ndyaana ngu' ji'i̱ yu. 37Nu lo'o nquije Jesús ji'i̱ ngu', li' nacui̱ ngu' ji'i̱ Jesús:
―Nclyana tsa ngu' jinu'u̱ ―nacui̱ ngu' ji'i̱ Jesús.
38―Masi nclyana ngu' 'na ca nde, pana tya tsaa la na nde xa' quichi̱ ―nacui̱ Jesús ji'i̱ ngu'―. Lo'o ji'i̱ ngu' xa' quichi̱ ntsu'u cha' culu'u na' cha' tso'o nu cuentya jna' ―nacui̱―. Bi' cña ntsu'u 'na cha' cua'ni na' nde chalyuu.
39Ndu'u ngu' ndyaa ngu' lo'o yu li'. Lcaa quichi̱ su ndya'a̱ Jesús nde Galilea bi' ndyaa yu ne' laa ji'i̱ ngu', cha' culu'u yu ji'i̱ ngu' bi'. Lo'o jua'a̱ ngulo yu cui'i̱ cuxi nu ngusñi ji'i̱ ngu', cha' tyaca tso'o ngu' quicha nu ntsu'u cui'i̱ ji'i̱.
Ngua'ni Jesús jo'o ji'i̱ sca nu quicha ndyatsu' cuaña'
40Ngua sca tsa̱ ndyalaa sca ngu' quicha slo Jesús, sca ngu' nu ndyatsu' cuaña' xqui'ya quicha nu ngusñi ji'i̱. Li' ndyatu̱ sti̱' yu quicha bi' slo Jesús, nchcui' lo'o:
―Si nti' nu'u̱ cha' tyaca na', jlo ti' na' cha' taca jinu'u̱ cua'ni cha' tyaca na' ―nacui̱ nu quicha ji'i̱ Jesús.
41Ngua tya'na ti' Jesús ji'i̱ nu quicha bi' li', ndyala' yu cuaña' yu quicha bi' su ngutsu'.
―Tyaja'a̱ na', cua'ni na' jo'o jinu'u̱ ―nacui̱ Jesús ji'i̱ yu quicha bi'―. Tyanu lubii cuaña' nu'u̱ juani.
42Hora ti ndyaca tso'o su ngutsu' cuaña'; ngua lubii cuaña', cha' cua ndye quicha bi' ji'i̱ tsiya' ti li'. 43Nu lo'o ngusalya' Jesús lo'o, li' lye nchcui' yu lo'o nu ngua quicha bi' ndi'ya̱:
44―Ni sca ñati̱ ná cacha' nu'u̱ ji'i̱ tilaca laca nu ngua'ni jo'o jinu'u̱ ―nacui̱ Jesús ji'i̱ nu ngua quicha bi'―. Yaa clya nu'u̱ slo sti jo'ó cha' ta nu'u̱ msta̱ ji'i̱ ycui' Ndyosi nu ngua'ni cha' ndyaca tso'o nu'u̱. Ta nu'u̱ msta̱, tsa lo msta̱ nu nacui̱ jyo'o Moisés sa'ni cha' ta na ji'i̱ ycui' Ndyosi lo'o ngua lubii cuaña' na. Jua'a̱ caca cuayá' ti' lcaa ñati̱ cha' cua ndyaca tso'o nu'u̱, nu lo'o ña'a̱ ngu' lo'o xñi sti jo'ó msta̱ nu ta nu'u̱.
45Pana ná ndyuna tso'o nu ngua quicha bi'. Ndu'u ndyaa, nchcui' lo'o lcaa ñati̱ ñi'ya̱ ngua cha' ngua tso'o, bi' cha' nga'aa ngua ji'i̱ Jesús tyu'u ta'a̱ lquichi̱; ndyanu yu ne' quixi̱' ti su ná ndi'i̱ ñati̱. Li' ndya'a̱ tsa ngu' slo yu, masi ngu' xa' quichi̱ tyijyu' la ngutu'u ngu' ndyaa ngu' slo yu.
Currently Selected:
SAN MARCOS 1: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.