SAN MATEO 28
28
Ndyu'ú Jesús chaca quiya'
1Nu lo'o cua ndye tsa̱ nu ndi'i̱ cña' ngu', cua quixee ti tsa̱ clyo ji'i̱ semana, li' ndyaa María Magdalena lo'o nu chaca María bi', cha' nti' ngu' ña'a̱ ngu' su nguatsi' jyo'o Jesús. 2Li' ngulacui̱ tsa chalyuu, cha' ngua'ya sca xca̱ ji'i̱ ycui' nu Xu'na na nu ntsu'u nde cua̱, ngua'ya lo yuu ca to' cuaá bi'. Li' nguxasu ji'i̱ quee tonu nu nscua to' cuaá, ndyaa tucua yu chu̱' quee bi'. 3Ñi'ya̱ ndubi xee tyi'yu, jua'a̱ ña'a̱ loo xca̱ bi', lo'o jua'a̱ ngati̱ tsa ste' yu ñi'ya̱ nu ngati̱ tlya'. 4Lo'o na'a̱ ngu' sendaru ji'i̱ xca̱ bi', ndyutsi̱i̱ tsa ngu' li', ña'a̱ cuayá' nu nclyú ngu' lo yuu ñi'ya̱ laca si na cua ngujuii ngu'. 5Li' nchcui' xca̱ bi' lo'o nu ngu' cuna'a̱ bi':
―Ná cutsi̱i̱ ma̱ ―nacui̱ ji'i̱ ngu' cuna'a̱ bi'―. Jlo ti' na' cha' nclyana ma̱ ji'i̱ Jesús nu ngujuii lo crusi. 6Nga'aa ntsiya yu bi' ca nde cha' cua ndyu'ú yu chaca quiya', ñi'ya̱ nu nacui̱ ycui' yu ji'i̱ ma̱ tya tsubi' la. Cua̱a̱ ma̱, ca̱a̱ ma̱ ña'a̱ ma̱ ca su ngustii jyo'o yu. 7Li' yaa clya ma̱ cacha' ma̱ ji'i̱ nu ngu' nu ndyaca tsa'a̱ ji'i̱ yu bi', cha' nga'aa ntsiya jyo'o bi' ne' cuaá re, cha' cua ndyu'ú yu chaca quiya'; cua tsaa ti ycui' yu nde Galilea nde loo la ji'i̱ cu'ma̱, ca bi' ña'a̱ ma̱ ji'i̱ yu. Tsa lo cua ti cha' ntsu'u cha' cacha̱' ji'i̱ ma̱ ―nacui̱ xca̱ ji'i̱ nu ngu' cuna'a̱ bi'.
8Hora ti ndu'u nu ngu' cuna'a̱ bi' to' cuaá bi', ndyaa ngu'. Lo'o jua'a̱ tso'o tsa ntsu'u tyiquee ngu', masi ndyutsi̱i̱ ngu' xi. Ngusna ngu' cha' ndyaa ngu' cacha' ngu' ji'i̱ ngu' nu ndyaca tsa'a̱ ji'i̱ Jesús. 9Li' ndyacua tya'a ycui' Jesús lo'o ngu' cuna'a̱ bi', nchcui' yu lo'o ngu'. Hora ti ndyatu̱ sti̱' nu ngu' cuna'a̱ bi' slo Jesús, ngusñi ngu' quiya' yu, ngua'ni tlyu ngu' ji'i̱ yu li'.
10―Ná cutsi̱i̱ ma̱ ―nacui̱ Jesús ji'i̱ ngu' bi' li'―. Yaa clya ma̱ cacha' ma̱ ji'i̱ ngu' tya'a na' cha' ntsu'u cha' tsa'a na' nde Galilea; ca bi' tyacua tya'a ngu' lo'o na', ñacui̱ ma̱ ji'i̱ ngu'.
Cha' nu nchcui' sendaru lo'o ngu'
11Laja lo'o ndyaa nu ngu' cuna'a̱ bi', ndyaa ngu' sendaru nu ndi'i̱ cua̱ to' cuaá bi'; lo'o ti ndyaa ngu' nde quichi̱, ndacha' ngu' ji'i̱ sti jo'ó nu laca loo lcaa cha' ñi'ya̱ nu ngua ca to' cuaá bi'. 12Hora ti ndyu'u ti'i̱ lcaa sti jo'ó nu laca loo lo'o lcaa ngu' cusu' ji'i̱ ngu' judío, cha' ca stu'ba cha' ji'i̱ ngu' lo'o tya'a ngu', ñi'ya̱ ña'a̱ cha' nu ta ngu' lo'o lcaa ñati̱. Li' nda ngu' nu laca loo bi' quiña'a̱ xi cñi ji'i̱ ngu' sendaru bi', cha' tacu̱' ngu' ji'i̱ cha' ñi'ya̱ nu ngua.
13―Ndi'ya̱ ñacui̱ ma̱ ji'i̱ ñati̱: “Talya laja lo'o laja' ti ya, li' ndyalaa nu ngu' nu ngua tsa'a̱ ji'i̱ jyo'o Jesús bi', nguaana ngu' bi' ji'i̱ jyo'o bi'”. Jua'a̱ cha' ta ma̱ lo'o ñati̱ ―nacui̱ ngu' nu laca loo bi' ji'i̱ ngu' sendaru―. 14Lo'o li' si cuna ycui' gobernador nu laca loo ji'na cha' re, li' chcui' ya lo'o yu cha' ná xcube' yu ji'i̱ ma̱.
Jua'a̱ cui̱i̱ nda ngu' nu laca loo bi' lo'o ngu' sendaru. 15Li' ngusñi ngu' sendaru bi' cñi bi'; ndu'u ngu' ndyaa ngu' nchcui' ngu' lo'o ñati̱ ñi'ya̱ nu ntsu'u cña ji'i̱ ngu' cha' chcui' ngu'. Bi' cha' hasta juani ña'a̱ ti jlya ti' ngu' judío cha' jua'a̱ ngua ji'i̱ jyo'o Jesús.
Nda Jesús sca cña ji'i̱ ngu' nu cua ngusubi yu ji'i̱ tya tsubi' la
16Lo'o li' ndu'u nu tii chaca tya'a ngu' nu ndyaca tsa'a̱ ji'i̱ Jesús, ndyaa ngu' ca loyuu su cuentya Galilea; ndyu'u ti'i̱ ngu' lo xlya ca'ya ca su nacui̱ Jesús cha' tyacua tya'a ngu' lo'o li'. 17Lo'o na'a̱ ngu' ji'i̱ Jesús cha' ya̱a̱ yu nde slo ngu', li' ngua'ni tlyu ngu' ji'i̱ yu, masi ntsu'u xi tya'a ngu' nu bilya jlya tso'o ti' ngu' ji'i̱. 18Li' ñaa Jesús cacua la, nchcui' lo'o ngu':
―Cua nda ycui' Ndyosi Sti na' lcaa chacuayá' 'na cha' laca na' loo ji'i̱ lcaa na, masi lcaa na nu ntsu'u ca slo ycui' Ni nde cua̱, masi lcaa na nu ntsu'u nde chalyuu ―nacui̱ Jesús ji'i̱ ngu'―. 19Yaa ma̱ lcaa quichi̱ nde chalyuu cha' ca tsa'a̱ lcaa ñati̱ cha' jna'. Li' tyucuatya ma̱ ji'i̱ ngu' chacuayá' ji'i̱ ycui' Ndyosi Sti na', jua'a̱ chacuayá' jna' nu laca̱ Sñi' ycui' Ndyosi, jua'a̱ chacuayá' ji'i̱ Xtyi'i ycui' Ndyosi. 20Culu'u ma̱ ji'i̱ ngu' bi', cha' taquiya' ngu' lcaa cña nu cua ngulu'u na' ji'i̱ ma̱. Lo'o jua'a̱ tyi'u ti' ma̱ cha' nu nchcui' na' lo'o ma̱, cha' tyi'i̱ na' lo'o ma̱ lcaa tsa̱ hasta ña'a̱ cuayá' tye chalyuu.
Tsa lo cua ti cha' nacui̱ Jesús.
Currently Selected:
SAN MATEO 28: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.