SAN MARCOS 2
2
Ngua'ni Jesús jo'o ji'i̱ sca ñati̱ nu nchcu̱' tyucuí̱ tyucui ña'a̱ yu
1Ca tiya' la xi nguxtyu̱u̱ Jesús ndyaa ca quichi̱ Capernaum bi'. Hora ti nguañi cha' tyucui ña'a̱ quichi̱ cha' cua ndyalaa yu. 2Li' quiña'a̱ tsa ñati̱ ndyu'u ti'i̱ ngu' slo yu; ná ndyu'u scua nde ni'i̱ su tyi'i̱ ngu', lo'o la cui' ti cha' to' ni'i̱ nde liya' tachaa tsa ndi'i̱ ngu'. Lo'o li' nclyu'u Jesús cha' tso'o ji'i̱ ycui' Ndyosi ji'i̱ ngu'. 3Li' ndyalaa jacua tya'a ñati̱, ndi'ya ngu' ji'i̱ sca nu quicha nu nchcu̱' tyucuí̱ tyucui ña'a̱. 4Ná ngua ji'i̱ ngu' tyalaa ngu' ca slo Jesús lo'o nu quicha bi', cha' tachaa tsa ndu̱ ñati̱; bi' cha' ndyacuí̱ ngu' hique ni'i̱ lo'o nu quicha bi'. Jlyacua que ni'i̱ bi'. Lo'o li' ngusaala ngu' que ni'i̱ su ndi'i̱ Jesús cha' tyatí̱ catya̱ su ntsiya nu quicha. Li' nda'ya ngu' ji'i̱ catya̱ ca su nga'a̱ Jesús. 5Lo'o na'a̱ Jesús cha' jlya tsa ti' ngu' ji'i̱ yu, li' nchcui' yu lo'o nu quicha bi':
―Cua ngua'ni clyu ti na' jinu'u̱ ji'i̱ qui'ya nu ntsu'u jinu'u̱, sñi' ―nacui̱ Jesús ji'i̱.
6Lo'o li' ndube tsa ti' mstru nu nclu'u cha' jo'ó ne' laa nu nga'a̱ ne' ni'i̱ bi'. 7“¿Ni cha' nchcui' yu re jua'a̱?” ngulacua ti' ngu'. “Sca ti ycui' Ndyosi caca cua'ni clyu ti' ji'i̱ ñati̱ nu ntsu'u qui'ya ji'i̱. Sca qui'ya tlyu laca lo'o nchcui' nu qui'yu re cha' cuityi̱ yu qui'ya nu ntsu'u ji'i̱ ñati̱ chalyuu, cha' ná nchca ji'i̱ ni sca ñati̱ chalyuu cuityi̱ qui'ya nu ntsu'u ji'i̱ ñati̱.” 8Pana nda Jesús cuentya ñi'ya̱ laca cha' nu nclyacua ti' ngu'. Nchcui' yu lo'o mstru bi' li':
―¿Ni cha' cuxi tsa nclyacua ti' ma̱ ndi'i̱ ma̱? ―nacui̱ Jesús ji'i̱ mstru bi'―. 9Ná ndiya ti' ma̱ cha' cua nacui̱ na' ji'i̱ nu quicha re: “Cua ngua'ni clyu ti' na' jinu'u̱ ji'i̱ qui'ya nu ntsu'u hi̱”. ¿Ha tso'o la si chcui' na' lo'o nu quicha lacua: “Tyatu̱ nu'u̱, xatu'ba nu'u̱ catya̱ jinu'u̱ cha' tyaa lo'o ji'i̱ to' tyi”? ―nacui̱ Jesús―. 10Tso'o lacua. Nti' na' cha' caca cuayá' ti' ma̱ cha' ntsu'u chacuayá' jna' cua'ni clyu ti' na' ji'i̱ ñati̱ chalyuu nu ntsu'u qui'ya ji'i̱; ntsu'u chacuayá' jna', xqui'ya cha' cua nda Ni 'na lijya̱a̱ lo yuu chalyuu cha' caca na' ñati̱. Caca cuayá' ti' ma̱ lo'o ña'a̱ ma̱ cha' tyaca tso'o nu quicha re juani ―nacui̱ Jesús.
Li' xa' nchcui' yu lo'o nu quicha bi':
11―Culo na' cña jinu'u̱ juani ―nacui̱ Jesús ji'i̱―. Tyatu̱ nu'u̱, xatu'ba nu'u̱ catya̱ jinu'u̱, cha' tsaa lo'o nu'u̱ ji'i̱ ca to' tyi.
12Hora ti ndyatu̱ nu quicha bi', ngusñi catya̱ ji'i̱, ngutu'u ndyaa li'; na'a̱ lcaa ngu' nu lo'o ndu'u nu ngua quicha bi' ndyaa lo'o catya̱ ji'i̱. Ndube tsa ti' ngu', li' ngua'ni tlyu ngu' ji'i̱ ycui' Ndyosi xqui'ya cha' bi':
―Ni sca ya bilya ña'a̱ ya sca cha' tlyu ñi'ya̱ nu ngua'ni nu'u̱ juani ―nacui̱ ngu' ji'i̱ ycui' Ndyosi li'.
Ngusi'ya Jesús ji'i̱ Leví
13Lo'o li' ndu'u Jesús ndyaa yu ca to' tayu' bi' chaca quiya'. Li' ndyu'u ti'i̱ quiña'a̱ ñati̱ ca slo yu, cha' chaca quiya' nclyu'u yu ji'i̱ ngu'. 14Laja lo'o ndya'a̱ ti Jesús, li' nteje tacui yu to' ni'i̱ su ntucua Leví sñi' Alfeo nu nxñi cñi cña loo ngu' cuentya ji'i̱ ngu' xa' tsu' nu laca loo.
―Tsaa nu'u̱ lo'o na' ―nacui̱ Jesús ji'i̱ nu Leví bi'.
Lo'o li' hora ti ndyatu̱ Leví nguxana yu ndya'a̱ yu lo'o Jesús.
15Ca tiya' la ndyacu Jesús to' tyi Leví. Stu'ba ndyacu yu lo'o tyu̱u̱ tya'a ngu' cuxi, jua'a̱ lo'o tyu̱u̱ tya'a ngu' tya'a ndyu'ni cña lo'o Leví, nu quiña'a̱ tsa cñi cña loo nxñi ji'i̱ ñati̱ cuentya ji'i̱ ngu' xa' tsu' bi'; quiña'a̱ tsa ngu' bi' nti' ngu' cuna ngu' cha' nu nchcui' Jesús. Nga'a̱ Jesús ni'i̱ bi' lo'o nu ngu' nu ndyaca tsa'a̱ ji'i̱. 16Li' nteje tacui xi ngu' fariseo lo'o mstru cha' jo'ó nu tya'a ndya'a̱ ngu'. Tacati tsa ycui' ngu', nti' ngu', pana lye tsa ndu'ni tyucuaa ti' ngu' ji'i̱ xa' ñati̱. Na'a̱ ngu' bi' ti lo'o ndyacu Jesús ne' ni'i̱ bi'. Hora ti nchcui' ngu' bi' lo'o ngu' nu ndyaca tsa'a̱ ji'i̱ Jesús:
―¿Ni cha' laca cha' ndyacu nu xu'na ma̱ lo'o ngu' cuxi jua, lo'o nu msu ji'i̱ ngu' xa' tsu' nu quiña'a̱ tsa cñi cña loo ngu' nxñi ngu' jua?
17Lo'o ndyuna Jesús cha' nu nchcui' nu ngu' tlyu bi', li' nacui̱ yu:
―Ná ntsu'u cha' caca jo'o ji'i̱ ñati̱ nu tso'o ti ti' ―nacui̱ Jesús ji'i̱ ngu'―, caca jo'o ji'i̱ ngu' quicha ―nacui̱―. Lo'o na' ni, ná lijya̱ na' cha' culu'u na' cha' tso'o ji'i̱ ycui' Ndyosi ji'i̱ ñati̱ nu nclyacua ti' cha' tso'o tsa ycui' ca ngu'; na cua lijya̱ na' ca nde cha' culu'u na' cha' tso'o bi' ji'i̱ ñati̱ nu jlo ti' cha' ntsu'u qui'ya ji'i̱ ngu' ―nacui̱ Jesús.
Ndacha' ngu' judío ji'i̱ Jesús si ná cua'ni tacati yu ji'i̱ tsa̱ nu ná ndacu ngu'
18Ngua sca tsa̱ tacati ji'i̱ ngu' nu ngua tsa'a̱ ji'i̱ Juan lo'o ji'i̱ nu ngu' fariseo, nu tacati tsa ndu'ni ngu', nti' ngu'. Ná ndacu ngu' tyaja tsa̱ tacati bi'. Lo'o li' ndya'a̱ xi ñati̱ slo Jesús, nchcui' ngu' lo'o yu:
―Ná ndacu ngu' nu ngua tsa'a̱ ji'i̱ Juan tsa̱ juani. La cui' ti jua'a̱ ngu' fariseo ni, ná ndacu ngu' juani ―nacui̱ ngu'―. Pana nu ngu' nu ndyaca tsa'a̱ jinu'u̱ ni, ndacu ngu' juani. ¿Ni cha' ná stu'ba ndyu'ni ngu' cuentya jinu'u̱ lo'o cha' nu ndyu'ni ngu' bi'? ―nacui̱ ngu' ji'i̱ Jesús.
19Li' nda Jesús sca cha' lo'o ngu' bi':
―Lo'o caja clyo'o ngu', lo'o ngu' nu ndya'a̱ lo'o cutsii ndacu ngu'; ná ndi'i̱ ngu' ntyute' ti ngu' tsa̱ bi' lo'o ndi'i̱ ngu' lo'o cutsii ―nacui̱ Jesús ji'i̱ ngu' li'―. Chaa ti' ngu' lo'o ndi'i̱ ngu' lo'o. 20Pana nu lo'o tyalaa tsa̱ nu lo'o tyaa lo'o ngu' ji'i̱ cutsii, li' ná cacu ngu' tya'a tso'o cutsii, cha' caca xñi'i̱ ti' ngu' li'. La cui' jua'a̱ chaa ti' tya'a tso'o na' juani, pana caca xñi'i̱ ti' ngu' nde loo la.
21’Chaca cha' ni, sca ngu' nu nchca ji'i̱ jyacua̱ late', nu lo'o cua'ni cho'o ste' cusu̱, ná talya sa yu'be late' cucui lo sca late' cusu̱, cha' tyatsii' late' cucui; hora ti tyati̱' jyacua̱ su ngalya bi' li'. 22La cui' ti cha', ná su'ba ngu' ji'i̱ lcui nu chca ndyu'u ti ne' tyaca' cusu'. Si su'ba ngu' ji'i̱ ne' tyaca' cusu', yala ti catsu se'i̱ tyaca' bi'; ndye ngula'a tyaca' li', tye lcui tyalú li'. Ne' tyaca' cucui tyu'u lcui nu lo'o chca ndyu'u ti.
Ngusuu ngu' si'yu trigo tsa̱ ta'a
23Ngua sca tsa̱ ta'a lo'o ndi'i̱ cña' ngu' judío, li' ndyaa Jesús su nscua xtya̱ trigo ji'i̱ ngu', ndyaa yu lo'o ngu' nu ndyaca tsa'a̱ ji'i̱ yu. Li' ngusuu nu ngu' nu ndyaca tsa'a̱ bi' xi si'yu trigo cha' cacu ngu' laja lo'o ndyaa ti ngu'. 24Lo'o li' na'a̱ ngu' fariseo ñi'ya̱ nu ngua'ni ngu' bi'. Li' nchcui' ngu' fariseo bi' lo'o Jesús:
―Tsa̱ ta'a, tsa̱ ndi'i̱ cña' na laca juani ―nacui̱ ngu' fariseo ji'i̱ Jesús―. Tsa̱ tacati laca. ¿Ni cha' laca ndyu'ni ngu' bi' cña nu ná ntsu'u chacuayá' cua'ni na tsa̱ juani? ―nacui̱ ngu'.
25Nguxacui̱ Jesús cha' ji'i̱ ngu' li':
―¿Ha bilya ña'a̱ ma̱ lo quityi ji'i̱ ycui' Ndyosi nu nscua ñi'ya̱ nu ngua'ni jyo'o David? Ngua sca tsa̱ ntyute' tsa ycui' yu, lo'o jua'a̱ ntyute' tsa tya'a ndya'a̱ yu ―nacui̱ Jesús ji'i̱ ngu'―. 26Ngua jyo'o Abiatar loo ji'i̱ lcaa sti jo'ó tyempo bi', lo'o li' ndyatí̱ jyo'o David bi' ne' ni'i̱ su cuentya ji'i̱ ycui' Ndyosi cajua, ngusñi yu xlyá nu laca msta̱ ji'i̱ ycui' Ndyosi, nu ntucua tacati lo mesa; ndyacu ngu' xlyá bi', masi sca ti sti jo'ó ntsu'u chacuayá' cacu ji'i̱ nquicha' ―nacui̱ Jesús ji'i̱ ngu' fariseo bi'.
27’Ná nti' ycui' Ndyosi xcube' ji'na lo'o nchcui' Ni cha' caca sca tsa̱ nu tyi'i̱ cña' na; tso'o la tyi'i̱ na si caja sca tsa̱ nu tyi'i̱ cña' na, ngua ti' Ni. 28Lo'o jua'a̱ ntsu'u chacuayá' jna' cha' laca na' loo, masi tsa̱ nu ndi'i̱ cña' ngu', cha' cua nda Ni 'na lijya̱a̱ cha' caca na' ñati̱.
Currently Selected:
SAN MARCOS 2: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.