Songs 52
52
God Judge Peopo An Help Peopo
Fo da main music guy, from da time Doeg da Edom guy tell King Saul, “David wen go by Ahimelek da pries guy.” Dis one David kine song fo make peopo tink plenny.
1Eh, you tough guy!
How come you talk big
Wen you do bad kine stuff?!
(But God stay tight wit me
All da time.)
2You tink bout how you goin hurt peopo.
An da tings you tell hurt peopo,
Jalike you cut um
Wit one sharp knife,
Cuz you bulai um.
3You like do bad kine stuff
Mo den good kine stuff.
You like bulai,
Mo den tell da trut.
(Time out fo da music.)
4You like tell da kine stuff dat wipe out peopo.
You get bulaia kine mout.
5But God, he goin smash you
So you stay bus up all da time.
He goin grab you
An drag you outa yoa tent,
Fo throw you
In da Mahke Peopo Place,
Jalike he pull out one plant
Wit da roots fo kill um.
(Time out fo da music.)
6Da peopo dat stay do wass right,
Dey goin see wat happen to you,
An dea jaw goin drop.
Den dey goin laugh at you.
An dey goin tell,
7“Check out dis guy!
He neva like aks God fo take kea him.
He tell, ‘Fo shua I can handle!’
Cuz he get plenny money.
He tink he strong, cuz he know
He can jam up eryting!”
8Me, wen I stay inside yoa Temple, God,
I stay grow strong
Jalike one olive tree.
I stay trus you, God,
Cuz I know you stay tight wit me
Foeva an eva.
9I goin tell erybody I yoa guy, all da time,
You da one wen do all dat.
In front da peopo dat stay tight wit you,
I goin tell wat kine god you,
Cuz you real good!
Currently Selected:
Songs 52: HPB
Highlight
Copy
Compare
Share
Want to have your highlights saved across all your devices? Sign up or sign in
©2020 Hawaii Pidgin Bible Ministries
hawaiipidginbible.org
Learn More About Hawaii Pidgin Bible
