Songs 51
51
Eh God, Gimme Chance!
Fo da main music guy, one David kine song bout da time Nathan, da guy dat talk fo God, go by David afta David fool aroun Batsheba
1Eh God! Give me chance,
Da way erytime you stay tight
Wit yoa peopo.
Cuz you stay get plenny pity fo dem,
Az why you gotta hemo da shame I get
Cuz I wen go agains you.
2Make me come all clean inside,
Cuz wat I wen do, no was right.
Make me come all clean inside
Fo me pray one mo time.
3I know fo shua I wen go agains you,
Ova an ova, I tink plenny
Bout da bad ting I wen do.
4 #
Rome 3:4
Was ony you dat I wen do da bad ting to.
Da way you see me,
Was no right, da ting I wen do.
Eh God, you stay perfeck,
An you do da right ting
Wen you tell you gotta punish me.
5Fo shua, from da time I born,
I stay do da wrong kine stuff,
Even from da time my muddah
Was hapai wit me,
Dass how I stay.
6Fo shua you feel good wen I tell da trut,
Even bout da secret kine tings
Dat nobody but me know.
So help me know fo real kine
Wat I gotta do
Bout da stuff I stay hide.
7Make me come clean inside
Fo no do bad tings no moa!
Jalike wen da pries guys make one sacrifice
An sprinkle da blood
Wit one oregano branch,
Fo me come clean inside fo pray!
Wash me good till I come
Mo clean inside,
Mo clean den da white snow!
8Make shua I know
Dat you wen hemo my shame.
Den I can dance an sing an yell
Cuz I stay good inside!
Fo now, I feel all bus up.
So make me feel good inside
One mo time!
9No look da bad tings I wen do.
Hemo da shame
Fo all da wrong kine tings I wen do.
10Eh God! Put inside me
One new kine heart
Dat ony tink good an clean kine stuff.
Give me one new kine attitude
Dat no change.
11No throw me out
Fo you no stay tight wit me no moa.
No take away from me
Yoa Good An Spesho Spirit.
12Let me stay good inside one mo time
Cuz you get me outa trouble.
Give me da kine spirit inside me
Dat make me like do
Wat you tell me fo do,
Den I goin stan strong,
13An fo shua I goin teach
Da peopo dat go agains you.
Den dey goin know
Da way you tell um fo live.
An dass how da peopo
Dat do bad kine stuff,
Goin come back to you.
14Eh God! Let me go, an hemo my shame,
Cuz I wen set up one guy fo mahke!
Eh God! You my God,
Da One dat get me outa trouble!
Az why I can make big noise
An let erybody know
Bout how you erytime
Do da right ting!
15Eh Boss! Let me tell good tings bout you
An tell peopo how awesome you stay!
16Fo make you stay good inside,
Da sacrifices I make
Not da main ting!
Jus cuz I make
One burn up kine sacrifice,
Dat no make you feel good
Bout me, you know!
17Eh God, dis da kine sacrifice you like:
You like me feel all bus up inside
Wen I do one bad kine ting.
Wen I stay bus up an sore inside
Cuz I wen do someting dass no good,
You no goin tell I good fo notting.
18Eh! You Da One In Charge!
Try make eryting
Come good fo da Zion Hill peopo!
An build da walls
Aroun Jerusalem town!
19Den you goin feel good inside
Cuz a da right kine sacrifices
Da peopo dea goin make.
Dey goin bring bulls by yoa altar
Fo make burn up kine sacrifices
Fo ony you.
Currently Selected:
Songs 51: HPB
Highlight
Copy
Compare
Share
Want to have your highlights saved across all your devices? Sign up or sign in
©2020 Hawaii Pidgin Bible Ministries
hawaiipidginbible.org
Learn More About Hawaii Pidgin Bible
