Songs 3
3
God Get His Peopo Outa Trouble
One David kine song fo no foget da time he run away from his boy Absalom
1Eh God! Get real plenny peopo dat stay agains me!
Get choke peopo dat attack me.
2Plenny peopo tell dis bout me:
“No way God goin get dat guy
Outa trouble!”
(Time out fo da music.)
3Eh! You Da One In Charge!
You, jalike one shield aroun me,
Dat no let me get hurt.
You da one dat make me come awesome
You put me back on top my throne.
4I wen yell to Da One In Charge
Fo help me.
He hear me up dea
On top da mountain
Dat stay spesho fo him,
An he help me.
(Time out fo da music.)
5I wen lay down an go sleep,
An nex morning I wake up,
Cuz Da One In Charge,
He take kea me.
6No matta get ten tousan army guys
Dat come agains me from all ova,
I no sked.
7Eh! You Da One In Charge!
You gotta do someting!
Eh, you my God! Get me outa trouble!
All da guys dat stay agains me,
Slap dea head!
Da peopo dat do bad tings,
Punch dea face!
8Eh! You Da One In Charge! You da One
Dat get me outa trouble.
I like you do good tings
Fo all yoa peopo!
(Time out fo da music.)
Currently Selected:
Songs 3: HPB
Highlight
Copy
Compare
Share
Want to have your highlights saved across all your devices? Sign up or sign in
©2020 Hawaii Pidgin Bible Ministries
hawaiipidginbible.org
Learn More About Hawaii Pidgin Bible
