Songs 115
115
Da Ony God Dat Tell Da Trut
1Eh! You Da One In Charge!
No need fo somebody
Tell good tings bout us guys.
Mo betta, peopo tell good tings
Bout wat kine god you!
Cuz you da One dat do
Awesome kine stuff!
Cuz you stay tight wit yoa peopo,
An you da kine God
Dat us guys can trus.
2How come da odda peopos tell,
“Eh! Wassup wit dat God
Dem guys pray to, aah?”
3Dis how stay wit oua God:
He live inside da sky
An he do wateva he like do.
4 #
Songs 135:15-18; JShow 9:20 Da idol kine gods
Dat da odda peopos pray to,
Dey ony statues dat peopo make
Outa silva an gold.
5Dey get mout, but dey no can talk.
Dey get eye, but dey no can see.
6Dey get ear, but dey no can hear.
Dey get nose, but dey no can smell.
7Wit dea hands, dey no can feel notting.
Wit dea feets, dey no can walk.
Dey no can even make noise
Inside dea throat.
8Da peopo dat make idol kine gods,
Dey goin come jalike dose gods.
Same ting fo all da peopo
Dat stay trus dat kine gods.
9Eh! You Israel ohana peopo!
Trus Da One In Charge!
He da One dat help you guys.
He da One dat make shua
You guys no get hurt.
10Eh! You pries guys
Dat come from Aaron!
Trus Da One In Charge!
He da One dat help you guys.
He da One dat make shua
You guys no get hurt.
11Eh! All you peopo dat feel
Jalike you sked
Wen you in front Da One In Charge!
Trus Da One In Charge!
He da One dat help you guys.
He da One dat make shua
You guys no get hurt.
12Da One In Charge, he no foget us guys.
He do good tings fo us guys.
He do good tings
Fo all da Israel ohana peopo,
Fo da pries guys dat come from Aaron,
An all da odda guys too.
13 #
JShow 11:18; 19:5 Da One In Charge do good tings
Fo da peopo dat feel sked
Wen dey come in front him,
No matta dey no stay importan,
O dey stay importan, same ting.
14I like fo Da One In Charge
Give all you guys plenny kids,
You guys, an all yoa kids too.
15Da One In Charge,
Da One dat make da sky an da world.
I like fo him give you guys da powa
Fo do eryting he wen like you fo do
Wen he make you.
16Da sky, an eryting up dea,
Dass fo Da One In Charge.
But da world,
He wen give dat to da peopo.
17Da mahke peopo, no way dey goin tell
Good tings bout Da One In Charge,
Cuz down dea, nobody make noise!
18But us guys, we stay alive!
We goin tell good tings
Bout Da One In Charge
Now an foevas!
Eh! You guys! Tell good tings
Bout Da One In Charge!
Currently Selected:
Songs 115: HPB
Highlight
Copy
Compare
Share
Want to have your highlights saved across all your devices? Sign up or sign in
©2020 Hawaii Pidgin Bible Ministries
hawaiipidginbible.org
Learn More About Hawaii Pidgin Bible
