Smart Guys 12
12
1Da peopo dat feel good inside
Wen somebody tell um dey wen do wrong,
Dey can learn all diffren kine stuff from dat too.
Da peopo dat no like
Wen somebody tell um dey wen do someting bad,
Dem ony dumb buggahs.
2Da good kine peopo,
Da One In Charge get one good heart fo dem.
Da kine peopo dat tink all da time
Bout how dey can do bad stuff to peopo,
God, he da judge, he goin punish dem.
3You no can come good
If you go do bad kine stuff.
If you do da right ting erytime,
No way somebody can move you,
Az jalike you one root stuck in da groun.
4Da good kine wahine dat stay strong inside,
She make her husban look good
Jalike he one king.
But da kine wahine dat make him come shame,
Make him lose fight, jalike cancer inside da bone.
5Wen da peopo dat do wass right make plan,
Dey make shua, az not goin hurt nobody.
Wen da bad kine peopo try tell you wass good fo you do,
Dey ony trying fo trick you.
6Wen da bad kine peopo talk,
Az ony fo dem catch odda peopo
Den bumbye dey can kill um.
Wen da good kine peopo talk,
Az fo get peopo outa trouble.
7Wen God make da bad kine peopo fall down,
Den no mo dem.
But da good kine peopo ohana
Dey still stay.
8Wen erybody know dat somebody can tink strait an akamai,
Da peopo goin talk good kine bout um.
But wen peopo head all hamajang,
Da peopo no mo respeck fo dem.
9Da kine guy dat peopo tink not importan
But still yet he get one guy dat work fo him,
Is mo betta den da kine guy
Dat make erybody tink he da main man,
But he no mo notting fo eat.
10Da good kine peopo,
Dey make shua dey take kea dea animals.
Da bad kine peopo,
Even wen dey try fo show pity,
Still yet dey make da animals suffa.
11Da kine peopo dat bus ass on dea land,
Dey get plenny fo eat.
Da kine peopo dat work hard
Ony fo do all wase time kine stuff,
Dey no can tink strait.
12Da bad kine peopo steal stuff,
An odda bad kine peopo steal um from dem.
But da good kine peopo make plenny stuff
Jalike da root dat make da plant come big.
13Wen da bad kine peopo grumble bout God,
Dey get into trouble an no can get out,
Jalike one trap catch dem.
Wen da peopo dat do wass right get into trouble,
Dey can get out.
14Wat peopo tell, an how dey tell um,
Dass how dey get plenny good stuff.
Same ting, wen dey work hard,
Dey get plenny good stuff too.
15Da stupid head kine peopo wit attitude,
Wateva dey do, dey tink az right.
But da peopo dat lissen wen peopo try help dem,
Dey da kine peopo dat know wat fo do fo real kine.
16Wen someting bodda da stupid head kine peopo,
Dey make shua erybody know right den.
But wen somebody try make
Da akamai kine peopo come shame,
Dey no say notting.
17Da kine peopo dat tell da trut erytime,
Wen dey talk erybody know wat dey tell az right.
But da guys dat bulai even wen dey in front da judge,
Az ony how dey know fo do.
18Some peopo talk, but dey no tink firs.
Az jalike dey stab you wit one knife.
But da peopo dat know wat fo do erytime,
Wen dey talk, make peopo feel mo betta.
19Wen you tell da trut,
Erybody goin know az right,
No matta how long time afta.
But wen you bulai,
Short time awready, dey know az wrong.
20Da guys dat make plan
Fo do bad kine stuff,
Dey make lidat cuz dey like bulai peopo.
But da peopo dat work hard
Fo make tings go good fo erybody,
Dey goin feel all good inside!
21Da peopo dat stay do da right ting,
Notting bad goin happen to dem.
But da bad kine peopo,
Dey get all kine trouble.
22Da peopo dat bulai erytime dey talk,
Dat kine stuff, Da One In Charge tell “Laytas” to.
Da kine peopo dat he can trus wat dey do,
Dat make him real happy.
23Da akamai kine peopo,
Dey no show off eryting dey know.
Da dumb buggahs dat tink
Dey no need learn notting,
Dey gotta yell out all dea stupid kine stuff.
24Work hard, stay in charge.
Come lazy, get one junk kine job jalike one slave.
25You worry plenny, make you lose fight.
You get good kine words, make you like dance an sing.
26Da peopo dat do da right ting erytime,
Dey check out peopo befo dey come dea fren.
But how da bad kine peopo make,
Dey no kea fo check out da peopo.
Az how come dey all jam up.
27Da lazy kine guys,
Dey too lazy fo cook da meat dey wen get.
But da peopo dat work hard,
Dey get plenny, an dey know az good.
28Da peopo dat do da right ting erytime,
You make jalike dem an you goin live fo real kine,
Az why you no goin mahke inside.
Currently Selected:
Smart Guys 12: HPB
Highlight
Copy
Compare
Share
Want to have your highlights saved across all your devices? Sign up or sign in
©2020 Hawaii Pidgin Bible Ministries
hawaiipidginbible.org
Learn More About Hawaii Pidgin Bible
