Popular Bible Verses from Smart Guys 12

Share

You worry plenny, make you lose fight. You get good kine words, make you like dance an sing.

Da peopo dat feel good inside Wen somebody tell um dey wen do wrong, Dey can learn all diffren kine stuff from dat too. Da peopo dat no like Wen somebody tell um dey wen do someting bad, Dem ony dumb buggahs.

Some peopo talk, but dey no tink firs. Az jalike dey stab you wit one knife. But da peopo dat know wat fo do erytime, Wen dey talk, make peopo feel mo betta.

Da stupid head kine peopo wit attitude, Wateva dey do, dey tink az right. But da peopo dat lissen wen peopo try help dem, Dey da kine peopo dat know wat fo do fo real kine.

Wen someting bodda da stupid head kine peopo, Dey make shua erybody know right den. But wen somebody try make Da akamai kine peopo come shame, Dey no say notting.

Da good kine wahine dat stay strong inside, She make her husban look good Jalike he one king. But da kine wahine dat make him come shame, Make him lose fight, jalike cancer inside da bone.

Da peopo dat bulai erytime dey talk, Dat kine stuff, Da One In Charge tell “Laytas” to. Da kine peopo dat he can trus wat dey do, Dat make him real happy.

Da peopo dat do da right ting erytime, Dey check out peopo befo dey come dea fren. But how da bad kine peopo make, Dey no kea fo check out da peopo. Az how come dey all jam up.

Wen you tell da trut, Erybody goin know az right, No matta how long time afta. But wen you bulai, Short time awready, dey know az wrong.