Teacha 4
4
Presha
1I look one mo time, an I see all da presha dat some peopo put on top odda peopo unda da sun.
I see peopo cry, da ones get presha on top dem.
No mo nobody fo help dem come so notting bodda dem.
Da guys dat put presha on top dem get plenny powa.
No mo nobody fo help dem come so notting bodda dem.
2An I tink dat da peopo dat stay mahke awready
Stay mo good inside den da peopo dat stay alive still yet.
3But da guy dat not born yet,
Mo betta den da two a dem.
Cuz he no see da bad kine stuff
Da peopo stay do unda da sun.
Work
4An I stay tink bout all da hard work an eryting dat peopo stay do. An how come dey do um? Fo shua, cuz one guy tink he do someting mo betta den some odda guy do um. Dat no make sense too. Dey chase afta da wind.
5Peopo tell:
Da stupid guys no work notting.
Wen dey do dat, dey ony come hamajang.
6Mo betta get ony one hand full a stuff, an can res,
Den get two hand full a stuff,
But da kine work you gotta do fo get um,
You ony stay chase da wind.
Wen No Mo Frenz
7One mo time I see someting unda da sun dat no make sense.
8Get one guy dat no mo nobody by him.
He no mo boy an no mo braddah.
He work all da time.
But he no stay good inside wit wat he get.
He start fo tink lidis: “How come I stay work dis hard?!
How come I no do notting dass good fun?!”
Dat no make sense!
Ony poho, aah?!
9Two mo betta den one.
Cuz dey work mo betta wen dey togedda.
10If one fall down,
His fren can help um up.
But Bummahs fo da guy dat fall down,
An no mo nobody fo help um up!
11An if two peopo lay down togedda, dey goin stay warm.
But how one guy goin stay warm if jus him?
12Somebody can attack anodda guy an win,
But dey no can win ova two guys.
You no can broke one rope
Dat get three strand.
Maybe One Young Guy Da Winna
13If get one young guy dat no mo notting, but he know wat fo do erytime, dat guy mo betta den one ol king dat no lissen wen somebody tell um wass da bestes ting fo him do. 14Maybe da young guy come outa prison an layta come da king. O maybe da one dat born fo come king no mo notting, but still yet he come king. 15But I see dis too: I see dat erybody dat live an do stuff unda da sun stay tight wit anodda young guy unda da sun. 16An no can count da odda peopo dat come befo o afta da young guy, dat no tink he do one good job. All dat no make sense too. Dey chase da wind.
Currently Selected:
Teacha 4: HPB
Highlight
Copy
Compare
Share
Want to have your highlights saved across all your devices? Sign up or sign in
©2020 Hawaii Pidgin Bible Ministries
hawaiipidginbible.org
Learn More About Hawaii Pidgin Bible
