Jesus Guys 24

Da Jew Guys Poin Finga Paul

1Afta five days da Main Pries Guy Ananias go down to Cesarea wit some a da older leadas. Had one guy Tertullus dat talk fo da Jew guys. Dey poin finga Paul in front Govna Felix. 2Den dey tell Paul fo come an Tertullus tell Felix, “Yoa Honor, long time you lead us an we stay good wit you. You do good stuff fo oua peopo. 3We tell you mahalo erytime all ova da place fo all da stuff you do fo us. 4But now, so dat I no bodda you no moa, try lissen us real fas kine. 5We know dat dis guy stay make trouble. He stay make da Jew guys like beef all ova da world. He da leada fo da peopo dat stay tight wit Jesus from Nazaret. 6He even try make da Temple pilau so no can pray dea. Az why us guys wen grab him. [We wen like bring him in front one judge jalike oua Rules tell us fo do. 7But da main captain Lysias, he come an grab him from us. 8He tell us dat we gotta come in front you.] You try aks him, an you goin find out all da stuff we tell agains dis guy.” 9An da Jew guys poin finga Paul too, an tell dat all da stuff Tertullus tell, stay true.

Paul Talk In Front Felix

10Da govna tell Paul fo talk. Paul tell,

“Yoa Honor, I know fo shua long time you stay one judge fo da Israel peopo. So I stay good inside fo tell you da true stuff bout me. 11You can check all dis stuff out. Twelve days befo dis, I go Jerusalem fo go down an pray to God dea. 12Da guys dat poin finga me neva spock me make argue wit nobody inside da Temple. I neva make da peopo like beef inside da Jew churches o odda place inside Jerusalem. 13Dey no can show proof da stuff dey tell agains me. 14Dass true I go down an pray in front da God fo oua ancesta guys. I stick wit da message bout Jesus. But dese guys tell, ‘Fake, wat dey teach!’ I trus all da stuff Moses wen write down inside da Jew Rules, an wat da guys dat talk fo God befo time wen write down too. 15I stay trus an wait fo God jalike dese guys. We trus dat da guys dat stay do da right tings an da guys dat no do wass right, dey all goin come back alive from mahke. 16So, I try fo do eryting God like me fo do, an fo know I stay do wass right in front God an da peopo.

17 # JGuys 21:17-28 “Long time I stay odda places, an den I come back Jerusalem fo bring money fo my peopo, fo da pooa peopo, an fo make sacrifice inside da Temple. 18I come pono fo go inside da temple, an dese guys find me ova dea inside da open lanai fo da temple fo make da sacrifice. Neva have plenny peopo dea, an I neva make trouble. 19But get some Jew guys from West Asia side ova dea. Dey neva come ova hea fo poin finga me. If dey poin finga me fo someting, let um come ova hea in front you fo tell you wat I wen do. 20An da guys dat stay ova hea, let um tell wat dey tink I wen do wrong. Dey neva tell notting, da time I stan in front da main leada guys befo time. 21#JGuys 23:6Dis da ony ting I wen do. I stan in front dem an tell, ‘Dey poin finga me today cuz I trus dat we all goin come back alive from mahke.’ I figga dass wat dey poin finga me about.”

22Felix, he know plenny stuff bout da message bout Jesus. So he tell um fo go home. He tell, “Wen Lysias, da main captain, come, I goin take kea dis stuff.” 23He tell da captain fo guard Paul, an no tie him up, an let his frenz come fo take kea him.

Paul In Front Felix An Drusilla

24Afta couple days, Govna Felix come wit his wife Drusilla. She one Jew. Felix tell da guards fo bring Paul fo Felix lissen him. Paul tell Felix bout how gotta trus Jesus Christ, da Spesho Guy God Wen Sen. 25Paul tell um gotta get um right wit God, do da right stuff, cuz us guys goin stan in front God da Judge bumbye. Den Felix come sked, an he tell, “Nuff awready! Go back inside. Wen I like lissen you moa, I goin tell you fo come one mo time.” 26He tink dat bumbye if he wait, Paul goin give um some money unda da table. Az why plenny times he tell Paul fo come an talk wit him.

27Two year layta, Porcius Festus take Felix place, but Felix like do someting fo da Jew guys, so he leave Paul inside prison.

Currently Selected:

Jesus Guys 24: HPB

Highlight

Copy