Jesus Guys 23

1Paul look strait at da main leada guys an tell, “My braddahs, fo shua I wen do all da stuff God like me fo do wit one good heart even till today.”

2Wen he tell dat, Ananias da Main Pries Guy tell da guys standing by Paul fo slap Paul mout. 3#Matt 23:27-28Den Paul tell him, “God goin wack you. You jalike one wall dey cova wit white kine paint. You sit dea fo judge me jalike da Rules From God tell, but den, you broke da Rules From God too, cuz you tell da guys fo slap me!”

4Da guys dat stan nea Paul tell, “Eh, you stay talking bad to God Main Pries Guy!”

5 # Outa 22:28 Paul tell, “Braddahs, I neva know he da Main Pries Guy. Da Bible tell, ‘No talk bad bout da leada fo yoa peopo.’ ”

6 # JGuys 26:5; Php 3:5 Den Paul figga dat some a dem was Sadducee guys an da oddas was Pharisee guys. So he yell inside dea, “My braddahs, I one Pharisee guy, an one Pharisee guy boy. Dey bring me in front da main leadas, cuz I stay shua dat us goin come back alive from mahke.”

7Wen he tell dat, da Pharisee guys an Sadducee guys ova dea start fo make argue wit each odda, an dat make um split up. 8#Matt 22:23; Mark 12:18; Luke 20:27Cuz da Sadducee guys tell dat nobody goin come back alive from mahke, an no mo angel guys, an no mo spirits. But da Pharisee guys tink all dat stuff az fo real! 9All dem make big noise, an den some a da Pharisee teacha guys dat teach da Rules From God stan up an make argue real hard. Dey tell, “We no can find notting wrong wit dis guy. Maybe one spirit o one angel guy talk to him.” 10Dey make argue even mo plenny, an da main captain figga dey goin broke up Paul. He tell his army guys fo go down, take Paul away from dem, an take him inside da army place.

11Da nex nite Da One In Charge stan by Paul an tell, “No sked! Be strong! Jalike you wen tell da peopo bout me inside Jerusalem, you goin tell um bout me inside Rome too.”

Dey Try Kill Paul

12Wen da sun come up, da Jew guys come togedda an make one plan bout Paul. Dey make one promise dat dey no goin eat o drink notting till dey kill um. 13Mo den forty guys tell dat. 14Dey go by da Main Pries guys an da older leadas an tell, “We make one strong promise dat we no goin eat notting till we kill Paul. 15So you an da main leada guys go tell da main captain fo bring him in front you, an you ack jalike you like find out mo stuff bout wat he wen do. An we stay ready fo kill him befo he come ova hea.”

16But Paul sistah boy hear bout dat, an he go da army place, an tell Paul. 17Den Paul tell one a da captains fo come an he tell him, “Take dis young guy by da main captain. He get someting fo tell him.”

18So den da captain take da young guy by da main captain, an tell, “Paul, da prisona guy, he tell me fo bring dis young guy by you cuz he like tell you someting.”

19Da main captain take da young guy by da hand, an take him by da side, an tell, “Wat you like tell me?”

20He tell, “Da Jew guys make one plan. Dey goin tell you fo bring Paul in front da main leada guys tomorra. Dey goin ack jalike dey like find out mo stuff bout him. 21No do wat dey tell, cuz mo den forty guys stay hide an stay waiting fo him. Dey wen make one strong promise dat dey no goin eat o drink notting till dey kill um. Dey stay ready now. Dey stay waiting fo you fo do wat dey tell.”

22Da main captain tell, “No tell nobody dat you wen tell me dis.” An he let him go.

Dey Sen Paul By Felix, Da Govna

23Den da main captain tell two a his captains fo come, an tell um, “Get ready two hundred army guys, an seventy guys riding horse, an two hundred guys wit spears fo go Cesarea nine clock tonite. 24Go get horses fo da guy Paul, fo dem take him by Felix da Govna, so notting goin happen to him.” 25Den he write one letta dat tell,

26“Yoa Honor, Govna Felix, dis me, Claudius Lysias, dat write you dis letta. I sen you my aloha. 27Da Jew guys grab dis guy Paul, an dey almos kill him, but I come wit my army guys fo take him outa dea. Cuz I find out dat he get da same rights jalike one Rome guy. 28An I wen like know how come dey poin finga him, so I bring him in front da main Jew leada guys. 29I find out dat he neva do notting wrong. Dey tell he do stuff agains dea Rules, but I neva find notting fo tell he gotta mahke o go jail. 30Wen I know fo shua dey make one plan fo kill him, right den an dea I sen him by you. An I tell da guys dat poin finga him fo come tell you bout um.”

31Da army guys do wat he tell um fo do. Dey take Paul wit dem dat nite, an bring him Antipatris side. 32Da nex day, dey let da guys on horses take him da res a da way, an dey go back dea place. 33Wen da guys on horses come to Cesarea, dey give da letta to da govna, an give Paul to da govna too. 34Da govna read da letta, an aks him wea he come from. Wen he hear dat Paul from Cilicia, 35he tell, “I goin lissen you wen da guys come dat poin finga you.” Den he tell da guys fo take Paul ova to Herod palace an guard him ova dea.

Currently Selected:

Jesus Guys 23: HPB

Highlight

Copy