Zacarías 8

Kuyanqan nunakunata yapë alli kawakuyänanpaq Teyta Dios äninqan

1Llapanta mandaq Teyta Diosmi kënö nimarqan: 2<<Noqa llapanta mandaq Teyta Dios karmi nï: Siónchö täraqkunata alläpam kuyä. Tsëmi chikiqninkunataqa rikëtapis munätsu.

3<<Noqa Teyta Diosmi nï: Sión jirkamanmi kutimushaq. Jerusalénchömi täräshaq. Tsë markataqa cäsukuq marka kashqantam niyanqa. Llapanta mandaq Teyta Dios akrashqan sagrädu jirka kashqantam niyanqa.#Isa. 1.26.

4<<Noqa llapanta mandaq Teyta Dios karmi nï: Jerusalén markapa pläzankunachömi awkinkunapis y chakwankunapis yapë täräyanqa. Pëkunaqa alläpa tsatsana karmi tukrunkunallawanna#8.4 Wakin nunakunaqa shukshunkunallawanna niyanmi. puriyanqa. 5Wamrakunapis purwa purwaran cällikunachö pukllayanqa.

6<<Noqa llapanta mandaq Teyta Dios karmi nï: Tsënö kananpaq kashqanta mana creyiptikipis noqapaqqa manam sasatsu kanqa.

7<<Noqa llapanta mandaq Teyta Dios karmi nï: Noqam kuyashqä nunakunata jorqamushaq mëtsë nacionman prësu apayashqanpitapis. 8Pëkunataqa Jerusalénchö täräyänanpaqmi mëtsëpitapis ëllumushaq. Pëkunam kuyashqä nunakuna kayanqa. Noqanam pëkunapa Diosninkuna kashaq.#Jer. 31.33; 32.38; Eze. 37.23, 27. Llapan änikushqäta cumplirmi pëkunata shumaq rikäshaq.

9<<Noqa llapanta mandaq Teyta Dios karmi nï: Templüpa cimientunta altsar qallëkuyashqëki junaqpita patsam profëtakuna willayäshurqëki shäritsir ushatsiyänëkipaq kashqanta. Tsënö këkaptinqa kallpata tsarïkur uryayë. 10Templuta shäritsita manaraq qallayaptikiqa manam qellë kashqatsu uryaqkunata pagayänëkipaq ni wätapa arriendunta pagayänëkipaqpis. Jukniki juknikipis chikinakuyänëkipaq jaqiriyaptiqmi nänipa purirpis mantsa mantsalla puriyarqëki. 11Tsënö kaptinpis kananpitaqa manam tsënönatsu kawayanki. Noqa llapanta mandaq Teyta Diosmi tsënö nï. 12Tsëpa rantinqa llapëkipis yamënam kawakuyanki. Üvasnikikunapis shumaqnam wayunqa. Chakrëkikunachö cosëchëkikunapis atska atskam kanqa. Tamyapis tiempunllachömi tamyamunqa. Bendicionnïta churamuptïmi alli kawakuyanki. 13Judá nunakuna y Israel nunakuna, nöpataqa jinantin nación nunakunam niyarqan maldisishqa kayashqëkita. Tsënö niyaptinpis noqam salvayarniki bendicionnïta qamkunaman churamushaq. ¡Ama mantsakuyëtsu! ¡Kallpata tsariyë!

14<<Noqa llapanta mandaq Teyta Dios karmi nï: Unë castëkikuna piñatsiyämaptinmi castiganäpaq yarparqä y tsë yarpashqänöllam pëkunata castigarqä. 15Tsënö kaptinpis qamkunamanqa bendicionnïtam churamushaq Jerusalénchö täräyaptikipis o Judáchö këkaq wakin markakunachö täräyaptikipis. Tsënö yanapayänaqpaq këkaptinqa ama mantsakuyëtsu. 16Ama ulipänakuyëtsu. Nunakuna alli kawakuyänanpaq justiciakunachöpis alli arregluta rurayë. Pïmëwanpis alli kawakuyë. 17Jukniki juknikipis mana allita rurayänëkipaq ama yarpäyëtsu. Tsënölla ama ulikuyëtsu.#Efe. 4.25. Tsënö kawayanqëkiqa manam gustamantsu. Noqa Teyta Diosmi tsënö nï>>.

18Jina llapanta mandaq Teyta Diosmi kënö nimarqan: 19<<Chusku kaq killachö, pitsqa kaq killachö, qanchis kaq killachö, chunka kaq killachö llakikur ayunayänanpa#8.19 Chunka kaq killachö ayunayarqan tsë killa Babilonia soldädukuna Jerusalénta ataquëta qallëkuyashqanta yarparmi (2Rey. 25.1). Chusku kaq killachö ayunayarqan tsë killa Jerusalénta tumariq perqata Babilonia soldädukuna uchkuyashqanta yarparmi (2Rey. 25.3-4). Pitsqa kaq killachö ayunayarqan tsë killa Babilonia soldädukuna Jerusalénta y templuta kayar ushayashqanta yarparmi (2Rey. 25.8-9). Qanchis kaq killachö ayunayarqan tsë killa Judáchö këkaq gobernador Gedalíasta wanutsiyashqanta yarparmi (2Rey. 25.25). rantin Judá nunakuna kushikurnin fiestata rurar alabayämätsun. Tsënö kananpaq këkaptinqa mana ulipänakushpa alli kawakuyätsun>>.

20Noqa llapanta mandaq Teyta Dios karmi nï: Juk lädu nacionkunapitam y juk lädu markakunapitam nunakuna Jerusalénman shayämunqa. 21Shayämunanpaqmi juk markaman juk markaman ëwëkur niyanqa: <<¡Ëwashun Teyta Diosta rowakunantsikpaq! ¡Llapanta mandaq Teyta Diosta ashishun!>>

Tsëmi wakin nunakunapis kënö niyanqa: <<¡Noqakunapis ëwayäshaq!>>

22Tsënö willanakurmi markankunapita y nacionninkunapitapis llapanta mandaq Teyta Diosta ashir mañakuyänanpaq Jerusalénman shayämunqa.

23Noqa llapanta mandaq Teyta Dios karmi nï: Tsë witsanmi jinantin nacionpita karpis y ima idiömata parlaq karpis chunka nunakunam Judá nación juk nunata ratashninpita tsarïkur rowayanqa: <<Qamwan ëwëtam munayä. Wiyayarqü Teyta Dios qamkunawan këkashqantam>> nir.

Currently Selected:

Zacarías 8: qwhB

Highlight

Copy

Compare