Zacarías 4

Qoripita candelabrutawan ishkë olïvu montita revelacionchö rikanqan

1Tsëpitanam noqawan parlaq ángel kutiramur imëka punukashqa nunata riyatsiqnö riyatsimarqan. 2Tsëpitanam tapumarqan: <<¿Imatataq rikëkanki?>> nir.

Tsëmi kënö nirqä: <<Qoripita fundipa rurashqa candelabrutam rikëkä. Tsë candelabrupa puntanchömi aceiti winaräkunan tazonpis këkan. Tsë tazonpa wirpanchömi qanchis chiwchikuna këkäyan. Cada chiwchipa mëchanman tübullapam aceiti yëkïkan. 3Candelabrupa lädunchömi ishkë olïvu montikuna këkäyan.#Apoc. 11.4. Juk kaq olïvum këkan allawka kaq lädunchö. Juk kaqnam itsuq kaq lädunchö>>.

4Tsënö nirirmi noqawan parlëkaq angelta kënö tapurqä: <<Tëtë, ¿imatataq tsëkunawan käyitsimanki?>>#4.4 Tsë tapukïpa respuestan ima kashqanta musyanëkipaq leyinki 4.10b-pita 4.14-yaqmi.

5Tsënam ángel kënö nimarqan: <<¿Manaku musyanki imapaq kashqantapis?>>

Nimaptinmi nirqä: <<Teyta, manam musyätsu>>.

6Tsënam nimarqan: <<Zorobabeltam Teyta Dios kënö nin:#Esd. 5.2. <Manam soldädukunatatsu ni kallpatatsu wananki, sinöqa Espïritütam wananki. Noqa llapanta mandaq Teyta Diosmi tsënö nï>.#Ose. 1.7.

7<<Jatun jirkanö problëmakuna alläpa jatun kaptinpis Zorobabelpaqqa manakaqnöllam kanqa. Tsëmi templuta ushananpaq ultimu kaq rumita churaptin <¡achallaw, kuyëllapaqmi këkan!> niyanqa>>.

8Tsëpitanam Teyta Dios nimarqan: 9<<Templuta Zorobabel sharkatsita qallëkurqa ushatsishqanyaqmi sharkatsinqa>>.

Tsë nishqannö templuta usharatsiptinmi musyayanki llapanta mandaq Teyta Dios qamkunaman kachamashqanta. 10Plomädawan templuta Zorobabel shärikätsiqta rikëkurmi manakaqpaq churaqkunapis kushikuyanqa.

Candelabrupa qanchis mechërunkunaqa Teyta Diospa nawinkunam këkäyan. Tsë nawinkunawanmi rikëkan jinantin patsata.#Apoc. 5.6.

11Jina kënömi tapurqä: <<¿Imaninantaq candelabrupa ishkan lädunchö këkaq olïvus montikuna?>>#Apoc. 11.4.

12Tsënöllam kënö tapurqä: <<¿Imaninantaq olïvupa ishkan rämankuna? Tsë rämankunapitam qoripita rurashqa tübupa candelabruman aceiti yëkïkan>>.

13Tsënö tapuptïmi ángel kënö nimarqan: <<¿Rasunpaku käyinkitsu?>>

Tsëmi kënö nirqä: <<Teyta, manam käyillätsu>>.

14Tsëmi kënö nimarqan: <<Tsëkunaqa këkäyan kë patsata kamaq Teyta Dios akrashqan ishkaq nunakunam.#4.14 Tsë nunakunaqa rey Davidpita miraq Zorobabel y sumo sacerdöti Josuémi. Pëkunam Teyta Diosta sirwikäyan>>.

Currently Selected:

Zacarías 4: qwhB

Highlight

Copy

Compare