Romanos 16

Pablo napakunqan

1Panintsik Febim watukayäshuqniki shamunqa. Pëqa Cencrea iglesiachö diacunïsam. 2Pëmi markäkuq mayintsikkunata shumaq yanapan. Noqatapis willakur puriptïmi yanapaman. Jesucristuman markäkuq mayintsik këkaptinqa chaskiyanki y llapan wanashqankunata qoykulläyanki.

3Priscilata y Aquilata napëkulläyanki. Pëkunam Jesucristupa willakïninta willakur puriptï yanapayämashqa.#Hech. 18.2. 4Pëkunam wanïtapis mana mantsakushpa yanapayämashqa. Tsënö yanapayämashqanpitam noqapis y llapan mana Israel wawqikuna y panikunapis payllä nikuyä. 5Wayinchö ëllukaq markäkuq mayintsikkunatapis napëkulläyanki.

Jina napëkulläyanki kuyanakuyanqä Epenetuta. Pëmi Asia provinciachö llapanpita mas puntata Jesucristuta chaskikushqa. 6Panintsik Maríatapis napëkullanki. Pëmi qamkunata alli yanapayäshurqunki. 7Jina napëkulläyanki Israel mayïkuna Andrónicuta y Juniastapis. Pëkunawanmi carcelchö llawiräyarqä. Pëkunam noqapita mas puntata Jesucristuta chaskikuyashqa. Llapan apóstol mayïkunapis pëkunataqa allim respetayan.

8Jina napëkulläyanki kuyashqä Ampliasta, 9willakuq mayï Urbanuta y kuyashqä Estaquista. 10Tsënölla napëkulläyanki Apelesta. Jesucristupa alli sirwiqnin kaptinmi pëta llapan markäkuq mayintsikkuna respetayan. Jina napëkulläyanki Aristóbulupa castankunata, 11Israel mayï Herodiónta y Narcisupa castanchö Jesucristuman markäkuqkunata. 12Tsënölla napëkulläyanki Trifenata y Trifosata. Tsë warmikunam Jesucristupa willakïninta willakuqkunata alli yanapëkäyan. Tsënölla napëkulläyanki panintsik Pérsidata. Pëpis Jesucristupa willakïninta willapäkuqkunata allim yanapëkan. 13Tsënölla napëkulläyanki kuyë wawqintsik Rufuta#Mar. 15.21. y mamänintapis. Pëqa mamänïnömi alli rikämashqa. 14Tsënölla napëkulläyanki Asíncrituta, Flegontita, Hermesta, Patrobasta, Hermasta y pëkunawan ëllukaq wawqikunata y panikunatapis. 15Tsënölla napëkulläyanki Filóloguta, Juliata, Nereuta, Nereupa paninta, Olimpasta y pëkunawan ëllukaq wawqikunata y panikunatapis.

16Jukniki juknikipis qaqllëkikunachö mutsanakur napanakïkulläyë. Purishqä kinrëchö këkaq wawqikuna y panikunapis qamkunapaq salüduskunata apëkatsiyämunmi.

17Wawqikuna y panikuna, pipis chikinakuyänëkipaq o Jesucristupa willakïninta mana cäsuyänëkipaq willapäyäshuptikiqa ama chaskiyëtsu. Tsënö willapäkuqkunaqa mana allitam yachatsiyäshunki. Pëkunapitaqa witikuyanki. 18Pëkuna manam Jesucristo alabashqa kananta munartsu yachatsikuyan, sinöqa kikinkuna alabashqa këta munarllam. Pëkunaqa alli shiminllapam mana käyikuq wawqikunata y panikunata mana allita creyitsiyan.

19Teyta Diosta cäsukuyashqëkitaqa jinantinchömi markäkuq mayintsikkuna musyayan. Tsënö kayashqëkita musyar noqapis kushikümi. Noqa munä jutsata mana rurashpa allillata rurar imëpis kawayänëkitam.#Mat. 10.16. 20Alli kawëta qomaqnintsik Teyta Dios yanapëkuyäshï Satanásta sitiunman churayänëkipaq. Señornintsik Jesucristo ankupäyäshurniki imëpis yanapëkulläyäshï.

21Yanapamaq wawqintsik Timoteupis#Hech. 16.1. napayäshunkim. Jina Israel mayïkuna Lucio, Jasón y Sosípaterpis napayäshunkim.

22(Noqa Terciupis Señornintsikpa shutinchömi napayaq. Apóstol Pablo dictamashqannöllam kë cartata qellqëkämü.)

23Jina Gayupis#Hech. 19.29; 1Cor. 1.14. napayäshunkim. Pëmi wayinta kichamushqa posadakunäpaq y markäkuq mayintsikkunawan tsëchö ëllukäyänäpaq. Tsënöllam kë markapa tesorërun Erastupis#2Tim. 4.20. y wawqintsik Cuartupis qamkunapaq salüduskunata apatsikayämun. 24[Señornintsik Jesucristo ankupäyäshurniki imëpis yanapëkulläyäshï. Tsënö katsun.]

Cartapa ushanan

25¡Teyta Diosta alabëkulläyë! Pëmi Jesucristupa willakïninta willakushqänölla yanapëkäyäshunki pëman markäkur munashqannö kawayänëkipaq. Tsë willakïtaqa nunakuna nöpata manam musyayarqantsu. 26Tsënö kaptinpis kananqa profëtakuna qellqayashqannöllam y wiñëpa kawaq Teyta Dios nishqannöllam willakïninta jinantin nacionkunachöpis willakïkäyan. Tsënö willakïkäyan pïmëpis Jesucristuman markäkur Teyta Dios munashqannö kawayänanpaqmi.

27¡Jesucristupa shutinchö Teyta Diosta imëpis alabëkulläshun! ¡Pëllam Dios këkan! ¡Manam pipis pënö yachaq kantsu! Amén.

Currently Selected:

Romanos 16: qwhB

Highlight

Copy

Compare