Romanos 15

Jesucristuta chaskikuq mayintsikwan alli kawanantsikpaq ninqan

1Markäkuq mayintsik mana käyir imallapis jutsa kashqanta yarpaptinqa tsëta ama rurashuntsu. Kikintsik munashqantsikta ruranantsikpa rantinqa 2imatapis rurashun markäkuq mayintsikkuna Teyta Dios munashqannö kawayänanpaq. 3Jesucristupis manam kikin munashqantatsu imatapis rurarqan. Teyta Diospa palabranchöpis kënömi qellqarëkan: <<Qamta manakaqpaq churayäshurnikiqa noqatapis manakaqpaqmi churëkäyäman>>.#Sal. 69.9.

4Teyta Diospa palabranqa käyitsimänantsikpaqmi këkan. Palabranta yachakurmi pëman markäkur musyantsik änikushqankunata cumplinanpaq kashqanta. 5Mana ajayëpa y mana llakikïpa markäkunantsikpaqmi Teyta Dios imëpis yanapëkämantsik. Tsëmi pëta mañakü Jesucristo kuyamashqantsiknö jukniki juknikipis kuyanakur alli kawakuyänëkipaq. 6Kuyanakur kawarmi Señornintsik Jesucristupa Papänin Teyta Diosta tsë yarpëlla alabëkäyanki.

Mana Israel nunakunapaqpis Diospa alli willakïnin kanqan

7Tsënö këkaptinqa Jesucristo kuyamashqantsiknö markäkuq mayintsikkunawan kuyanakushun. Tsënö kawashqam Teyta Diosta alabayanqa. 8Këta willayashqëki: Israel nunakunata salvananpaqmi Jesucristo shamurqan. Tsënöpam Abrahamta, Isaacta y Jacobta änishqanta Teyta Dios cumplirqan. 9Jina Jesucristo shamurqan mana Israel nunakunapis ankupäkuq kashqanpita Teyta Diosta alabayänanpaqmi. Teyta Diospa palabranchöpis kënömi qellqarëkan:

<<Më nacionchö karpis qamta adorashqëkim.

Llapan shonqüwan qotsurmi qamta alabashqëki>>.#2Sam. 22.50; Sal. 18.49.

10Jina kënöpis qellqarëkanmi:

<<Mëtsë nacionchö täraqkuna,

Teyta Dios kuyashqan nunakunawan juntu kushikuyë>>.#Deut. 32.43.

11Manam tsëpis tsëllatsu. Kënöpis qellqarëkanmi:

<<Jinantin nacionchö täraqkuna,

Teyta Diosta alabashun.

Jinantinchö tärarpis pëta adorashun>>.#Sal. 117.1.

12Profëta Isaías qellqashqanchöpis kënömi nikan:

<<Isaípa mirëninpitam juk nuna yurinqa.

Jinantin nacionchö täraq nunakunata mandananpaqmi shamunqa.

Mana Israel nunakunapis pëmanmi markäkuyanqa>>.#Isa. 11.10.

13Teyta Dios yanapëkulläyäshï pëman markäkur jukniki juknikipis alli kawayänëkipaq, Espíritu Santupa poderninchö kawayänëkipaq y nöpanman chäyänëkipaq kashqanta musyar waran waran kushishqa kawayänëkipaqpis.

Mëtsëpapis Pablo Jesúspaq willakur purinqan

14Wawqikuna y panikuna, musyämi alli shonqu kayashqëkita, Teyta Diospa willakïninta yachakuyashqëkita y wakintapis käyitsiyänëkipaq alli yachayashqëkita. 15Tsënö kayaptikipis kë cartawanmi qamkunata yarpëkätsiyaq yachakuyanqëkita mana qonqayänëkipaq. Tsënö niyaq Teyta Dios ankupämar 16Jesucristupa alli willakïninta mana Israel nunakunata willapänäpaq churamashqa kaptinmi. Tsëmi willakïkä mana Israel nunakunapis Espíritu Santu yanapaptin Teyta Diospaq alli sacrificiunö kayänanpaq.

17Willakunäpaq Jesucristo yanapamaptinmi kushikü. 18Alabakunäpa rantinmi pë yanapamashqanllata mëtsëchöpis parlashaq. Yanapamaptinmi willakïninta willakïkä y nunakuna rikäyänanpaqmi shumaq kawëkä. Tsëmi mana Israel nunakunapis Teyta Diosta cäsukïkäyan. 19Espíritu Santupa poderninwan milagrukunata rurarmi Jerusalénpita qallëkur hasta Ilírico provinciayaq Jesucristupa willakïninta willakurqü.

20Willakur purirpis wakinkuna willakuyashqan markakunamanqa manam chëta munätsu. Tsëmi pipis manaraq willakushqan markakunachö Jesucristupa willakïninta willakïkä. 21Teyta Diospa palabranchöpis kënömi qellqarëkan:

<<Pipis mana willapashqantam musyayanqa.

Imëpis mana wiyayashqantam wiyayanqa>>.#Isa. 52.15.

Romaman Pablo ëwëta yarpanqan

22Mëtsëpapis willakur purirmi qamkuna kaqman shamïta puëdirqütsu.#Rom. 1.13. 23Kananqa kë purikashqä markakunachö Jesucristupa willakïninta willakurqünam. Unëpita patsa yarpashqänöllam qamkunata watukariyarniki 24Españapa ëwëta yarpëkä. Tsëman ëwanäpaq yanapëkalläyämanki.

25Kananqa markäkuq mayintsikkunapaq ëlluyashqan ofrendata aparmi Jerusalénparaq ëwëkä. 26Macedonia y Acaya provinciakunachö markäkuq mayintsikkunam tsë ofrendata ëlluyashqa Jerusalénchö këkaq waktsa wawqikunata y panikunata yanapayänanpaq.#1Cor. 16.1-4. 27Ofrendata ëllur allitam rurayashqa. Pëkunapis Jesucristupa willakïninta Jerusalénpita qallëkur willakuyaptinmi chaskikuyashqa. Willapäyashqanpita kushikurmi ofrendata ëlluyashqa Jerusalénchö këkaq waktsa wawqikunaman y panikunaman apanäpaq.#1Cor. 9.11. 28Kë ofrendata Jerusalénchö wawqikunata y panikunata qoykurnam Españapa ëwar qamkunamanpis pasäda yëkaramushaq. 29Qamkuna kaqman chämuptïmi Jesucristo yanapamäshun kallpatsanakur kushikunantsikpaq.

30Wawqikuna y panikuna, Señornintsik Jesucristupa shutinchömi y kuyamaqnintsik Espíritu Santupa shutinchömi rowayaq llapan shonqïkikunawan Teyta Diosta noqapaq mañakuyänëkipaq. 31Tsënö mañakuyë Judea provinciaman chäriptï mana wiyakuq aksë nunakunapita Teyta Dios tsapëkamänanpaq. Jina mañakuyë apashqä ofrendata Jerusalénchö wawqikuna y panikuna kushishqa chaskiyänanpaq. 32Jerusalénchö llapanpis alli kananpaq Teyta Dios yanapamaptinqa qamkuna kaqman chämuptï kushishqam kashun.

33Llapëkitapis Teyta Dios alli kawayänëkipaq yanapëkulläyäshï. Tsënö katsun.

Currently Selected:

Romanos 15: qwhB

Highlight

Copy

Compare