1 Corintios 1

Cartapa qallanan

1Jesucristupa apostolnin kanäpaq Teyta Dios qayamashqa kaptinmi noqa Pablo wawqintsik Sósteneswan cartakayämü.

2Corinto markachö#Hech. 18.1. Teyta Dios kuyashqan markäkuqkuna: Qamkunapaqmi Teyta Dios nirqan: <<Pëkunaqa Jesucristuchö santum këkäyan>>. Tsënö kayaptikim qayayäshurqunki pë munashqannö santu kawayänëkipaq. Tsënöllam jinantinchö täraqkunatapis pëman llapan markäkuqkunata qayashqa. Tsëmi Jesucristuqa pëkunapapis y noqantsikpapis Señornintsik këkan. 3Yayantsik Teyta Dios y Señor Jesucristo ankupäyäshurniki alli kawayänëkipaq yanapëkulläyäshï.

Teyta Diosta Pablo payllä nikunqan

4Teyta Diostam qamkunapita imëpis payllä nikü. Jesucristuwan juknölla kayaptikim ankupäyäshurniki imëpis yanapëkäyäshunki. 5Llapanchöpis yanapayäshuptikim käyikäyanki y alli willakïkäyanki. 6Jesucristupa willakïninta chaskikuyänëkipaq yanapayäshushqëkinöllam kananpis yanapëkäyäshunki. 7Tsëmi Señor Jesucristupa kutimïninta shuyäkuyaptiki ima yachënikikunapis pishiyäpushunkitsu. 8Pëmi yanapëkäyäshunki kutimur pë munashqannö kawëkaqta tariyäshunëkipaq. 9Teyta Diosqa änikushqanta imëpis cumplinmi. Pëmi Tsurin Señornintsik Jesucristuwan juknölla kawayänëkipaq qayayäshurqunki.

Juk shonqulla kawayänanpaq yachatsikunqan

10Wawqikuna y panikuna, Señor Jesucristupa shutinchömi qamkunata rowayaq mana chikinakushpa juk shonqulla juk yarpëlla kawakuyänëkipaq. 11Panintsik Cloépa castankuna shamurmi willayämashqa kikikikunapura chikinakur liryakur kawëkäyashqëkita. 12Wakinnikish noqata qatiyämashqëkita nikäyanki, wakinnikish Apolusta#Hech. 18.24. qatiyashqëkita nikäyanki, wakinnikish Cefasta#1.12 Cefasqa Pedrupa juk kaq shutinmi karqan. qatiyashqëkita nikäyanki y wakinnikinash Jesucristuta qatiyashqëkita nikäyanki.

13Tsënö nirqa llutantam nikäyanki. ¿Acäsu Jesucristuqa atskaman rakikashqaku këkan? ¿Acäsu noqaku qamkuna rëkur cruzchö wanurqü? ¿Acäsu noqapa shutïchöku bautizakuyarqunki? 14Teyta Diostam payllä nikü qamkuna kaqchö kar Crisputawan#Hech. 18.8. Gayullata#Hech. 19.29; Rom. 16.23. bautizashqäpita. 15Tsëmi mëqëkipis niyankimantsu noqapa shutïchö bautizakuyashqëkita. 16Tsënöllam Estéfanaspa#1Cor. 16.15. castanllata bautizarqü. Tsëpita mastaqa manam pitapis bautizashqäta yarpätsu. 17Manam nunakunata bautizar purinäpaqtsu Jesucristo kachamashqa, sinöqa alli willakïninta willakur purinäpaqmi kachamashqa. Willakïninta willakurqa manam yachaq kashqäta nunakuna yarpäyänanpaqtsu willakü. Yachaq tukur willakurqa Jesucristo cruzchö wanushqantam manakaqpaq churäman.

Jesucristupa willakïninta chaskikuqkunata Teyta Dios salvanqan

18Jesucristo cruzchö wanushqanta willakuptïmi infiernuman jitashqa kayänanpaq kaqkunaqa niyan manakaqkunata willakushqäta. Tsënö niyaptinpis salvashqa kaqkunapaqqa tsë willakï Teyta Diospa poderninmi këkan.#Rom. 1.16. 19Teyta Diospa palabranchöpis kënömi qellqarëkan:

<<Yachëyuq nunakunapa yarpëninkunatam qonqaratsishaq.

Alli yarpëyuqkunapis manana käyikuyänanpaqmi permitishaq>>.#Isa. 29.14.

20Tsënö kaptinqa yachaqkuna yachayashqanpis ¿imapaqtaq sirwin?#Job 12.17; Isa. 19.12. Ley yachatsiqkuna yachayashqanpis ¿imapaqtaq sirwin? Kë patsachö yachaqkuna estudiayashqanpis ¿imapaqtaq sirwin? Jesucristuman mana creyikuq nunakuna yachayanqanpis Teyta Diospaqqa manakaqllam këkan.#Isa. 44.25. 21Pëmi yachëyuq kar permitirqan nunakuna yachaq këninwanqa pëta mana reqiyänanpaq. Tsëmi willakïnin manakaq kashqanta yarpäyaptinpis willakïninta chaskikuqkunataraq salvan.

22Israel nunakunaqa Jesucristuta chaskikuyänanpaq milagrukunataran rikëta munayan. Griego nunakunanam munayan yachaqkuna niyashqannö Diospa willakïnin kananta. 23Tsënö munayaptinpis noqakunaqa Jesucristo noqantsik rëkur cruzchö wanushqantam willakuyä. Tsënö willakuyaptïmi Israel nunakuna piñakuyan.#1.23 Israel nunakunam yarpäyarqan Dios kachamushqan Cristo imëyaqpis mandakuq kananpaq kashqanta. Wanushqanta niptinmi piñakuyarqan. Mana Israel nunakunanam manakaqkunata willakuyashqäta yarpäyan. 24Tsënö kaptinpis Teyta Dios qayashqan kaqkunaqa Israel nuna karpis o mana Israel nuna karpis käyikuyan Jesucristo Teyta Diospa podernin y yachënin kashqantam.#1.24 Jesucristo Teyta Diospa podernin kashqanta nirqa Jesucristuta chaskikuqkunata Teyta Dios poderninwan salvashqantam nikan. Jesucristo Teyta Diospa yachënin kashqanta nirqa Jesucristo cruzchö wanushqanpita pëta chaskikuqkunata Teyta Dios salvashqantam nikan. 25Tsëmi willakuyashqä upa nunakunallapaq kashqanta yarpäyaptinpis yachëyuq nunakunapa yarpëninpita mas alli këkan. Tsënöllam Jesucristo cruzchö wanushqanta manakaqpaq churayaptinpis pëman markäkuqkunataqa Teyta Dios poderninwan salvëkan.

26Wawqikuna y panikuna, Teyta Dios qayayäshushqëki witsan imanö kayashqëkitapis yarpäyë. Qamkunachö juk ishkëllam yachëyuq kayarqëki, juk ishkëllam mandakuq kayarqëki y juk ishkëllam rïcu kayarqëki. 27Mana yachëyuq kayashqëkita nunakuna yarpäyaptinpis qamkunatam Teyta Dios akrayäshurqunki yachëyuqkuna käyikur penqakuyänanpaq. Tsënöllam poderninnaq kayashqëkita yarpäyaptinpis Teyta Dios akrayäshurqunki puëdiq nunakuna käyikur penqakuyänanpaq.#1.27 Manam yachaq kayashqanpitatsu ni puëdiq kayashqanpitatsu nunakunata Teyta Dios salvan, sinöqa Jesucristuman markäkuyashqanpitam. Tsëta käyirmi nunakuna penqakuyanqa yachaq kayashqanman y puëdiq kayashqanman markäkuyashqanpita. 28Manakaqpaq churayashqan nunakunata salvananpaq Teyta Dios tsënö akraptinmi musyantsik pipis yachaq këninwanqa ni puëdiq këninwanqa mana salvakunanpaq kashqanta. 29Tsëmi Teyta Diospa nöpanchö pipis alabakunqatsu.

30Qamkunataqa Jesucristuchö kayänëkipaqmi Teyta Dios salvayäshurqunki. Noqantsik rëkurmi Jesucristuta Teyta Dios churarqan yachënintsik kananpaq, salvamaqnintsik kananpaq, perdonamaqnintsik kananpaq y rantimaqnintsik kananpaqpis. 31Tsënö këkaptinqa ama alabakushuntsu. Teyta Diospa palabranchöpis kënömi qellqarëkan: <<Pipis alabakunanpa rantinqa Teyta Diosta alabatsun>>.#Jer. 9.23-24.

Currently Selected:

1 Corintios 1: qwhB

Highlight

Copy

Compare