Romanos 14

Mana penqapänakunantsikpaq yachatsinqan

1Jesucristuman markäkuq mayintsikkuna mana käyikuyaptinpis ama penqapäyëtsu. Käyiyashqëkinö mana käyiyaptinpis pëkunawan ama liryakuyëtsu. 2Wakinmi yarpëkäyan ëtsata mikurpis jutsata mana rurayashqanta y wakinnam yarpëkäyan ëtsata mikurqa jutsata rurayashqanta.#14.2 Tsë tiempu wätakunata pishtayaq ïdulukunapa shutinchömi. Israel nunakuna yarpäyarqan pipis tsë ëtsata mikurqa supëkunata adorëkashqantam. Tsëmi Jesucristuta chaskikurpis tsë ëtsata mikïta munayarqantsu. Jesucristuta chaskikuq mana Israel nunakunaqa musyayarqan tsë ëtsata mikurpis supëkunata mana adorëkäyashqantam. Tsëmi pëkunaqa ïdulukunapaq pishtayashqan ëtsata mikuyarqan. 3Tsë ëtsata mikuqkunapis Teyta Diospa wamranmi këkäyan. Tsënö kaptinqa ëtsata mana mikuq kaqqa ama penqapätsuntsu ëtsata mikuq kaqta. Ni ëtsata mikuq kaqpis ama penqapätsuntsu ëtsata mana mikuq kaqta. 4Tsënö këkaptin qam ¿pitaq kanki Jesucristupa sirwiqninta juzganëkipaq? Jutsata ruraptinqa patronnin Jesucristum juzganqa. Imanö kaptinpis jutsata mana rurananpaq Jesucristum yanapëkan.

5Tsënöllam wakin markäkuq mayintsikkuna yarpäyan Teyta Diosta alabanantsikpaq reqishqa junaqlla ëllukänantsikpaq kashqanta. Wakinnam yarpäyan Diosta alabanantsikpaq llapan junaqpis alli kashqanta. Reqishqa junaq ëllukarpis o wakin junaq ëllukarpis shumaq yarpakachäyë mëqan junaq ëllukäyänëkipaq kashqantapis. 6Ëllukëkur Teyta Diosta alabayänëkipaq juk junaq mas alli kashqanta yarpaq nunapis Teyta Diosta cäsukïta munarmi tsënö yarpan. [Diosta alabayänëkipaq llapan junaq alli kashqanta yarpaq nunapis Teyta Diosta cäsukïta munarmi tsënö yarpan.] Ëtsata mikuqpis Teyta Diosta payllä nikurmi pëpa shutinchö mikun. Tsënöllam ëtsata mana mikuq kaqpis Teyta Diosta payllä nikur pëpa shutinchö mikun.#Col. 2.16.

7Manam kikintsikllapaqtsu kawantsik ni manam kikintsikllapaqtsu wanuntsik. 8Kawarpis Teyta Diospaqmi kawantsik. Wanurpis Teyta Diospaqmi wanushun. Tsëmi kawarpis o wanurpis Jesucristupa poderninchö këkantsik. 9Kawaqkunapa y wanuqkunapa Señornin kananpaqmi Jesucristo wanushqa y wanushqanpita kawarimushqa. 10Llapantsikpis pëpa poderninchö këkarqa ¿imanirtaq markäkuq mayintsikkunata juzguëkäyanki? Teyta Diospa nöpanman#14.10 Wakin griego copiakunachömi Cristupa nöpanman niyan. chärishqa llapantsiktam juzgamäshun.#2Cor. 5.10. 11Teyta Diospa palabranchöpis kënömi qellqarëkan:

<<Noqa Teyta Diosmi jurar nï:

Llapanmi nöpäman qonqurikayämunqa.

Llapanmi cäsuyämänanpaq niyämanqa>>.#Isa. 45.23.

12Tsënö kaptinmi llapantsik Teyta Diosta cuentata qoshun.

Markäkuq mayintsikta jutsata mana ruratsinantsikpaq ninqan

13Teyta Dios juzgamänantsikpaq këkaptinqa markäkuq mayintsikkunawan amana juzganakushuntsu. Markäkuq mayintsik imatapis ruranqantsikta rikar qepaman kutikunanpaqnö kaptinqa tsëta ama rurashuntsu. 14Jesucristo discïpulunkunata yachatsishqa kaptinmi#Mar. 7.19. llapan mikïpis y ëtsapis alli kashqanta musyä. Tsënö këkaptinpis wakin markäkuq mayintsikkuna mana käyirmi yarpäyan ëtsata mikur jutsata rurëkäyashqanta. Tsënö yarparqa ëtsata mikur jutsatam rurayan. 15Markäkuq mayiki llakikuyänanpaqnö kashqanta musyëkar ëtsata mikurqa manam pëkunata kuyëkäyankitsu. Pëkunatapis salvananpaq Jesucristo wanushqa këkaptinqa ëtsata ama mikuyëtsu. Mikuqta rikäyäshurnikim Jesucristuman markäkuyanqanatsu. 16Jina markäkuq mayiki contrëki rimananpaq kaptinqa ëtsata ama mikuyëtsu.

17Teyta Diospa mandakïninchö kawëqa manam munashqantsikta mikukunantsikpaqtsu ni upukunantsikpaqtsu, sinöqa allillata ruranantsikpaqmi, pïmëwanpis alli kawanantsikpaqmi y Espíritu Santu yanapamashqa kushishqa kawanantsikpaqmi. 18Jesucristuta sirwir tsënö kawarqa Teyta Dios munashqannömi kawëkantsik. Tsënö kawashqaqa manam pipis penqapämäshuntsu. 19Tsënö kaptinqa shumaq yarpakachäshun markäkuq mayintsikkunawan alli kawakunantsikpaq y kallpatsanakur Teyta Dios munashqannö kawanantsikpaq.

20Teyta Dios kamashqan llapan mikïkuna alli kaptinpis salvashqan kaqkuna qepaman kutikuyänanpaqnö kaptinqa tsë mikïta ama mikuyëtsu. Mikurqa mana allitam rurayanki. 21Markäkuq mayintsik [llakikuyänanpaqnö] o qepaman kutikuyänanpaqnö kaptinqa ëtsatapis ama mikuyëtsu ni vïnutapis ama upuyëtsu. Tsënölla imapis jutsa kashqanta yarpäyaptinqa ama rurayëtsu.

22Imatapis mikur jutsata mana rurayashqëkita yarparqa mana willakïllapa shonqïkikunallachö tsararäkuyë. Mikuyänëkipaq alli kashqanta yarparqa kushishqam kayanki. 23Ëtsapis o ima mikïkunapis mana alli kashqanta yarparqa ama mikuyëtsu. Mana alli kashqanta yarpëkar mikurqa jutsatam rurëkäyanki. Jina mana alli kashqanta yarpëkar imatapis rurarqa jutsatam rurëkäyanki.

Currently Selected:

Romanos 14: qwhB

Highlight

Copy

Compare