Apocalípsis 3
3
Sardis markachö markäkuqkunaman cartakunqan
1<<Sardis markachö këkaq iglesiapa angelninpaq kë nishqaqta qellqë: Noqam Teyta Diospa qanchis espïritunkunata tsararëkä. Noqam makïchö qanchis qoyllurkunata tsararëkä.#Apoc. 1.20.
<<Noqa rikëkämi llapan rurayashqëkikunata. Teyta Dios munashqannö kawëkäyashqëkita nunakuna yarpäyaptinpis qamkunaqa wanushqanömi këkäyanki.
2<<Shonqïkikuna manaraq chukruyashqanyaq Teyta Dios munashqannö kawayänëkipaq yarpakachäyë. Allita rurëkäyashqëkita yarparpis Teyta Diospaqqa manam allitatsu rurëkäyanki. 3Yachakuyashqëkita y wiyayashqëkita mana qonqashpa cäsukuyë. Jutsa rurëta jaqirir munashqänöna kawayë. Tsënö mana kawayaptikiqa mana mäkïllapa suwa shamuqnömi qamkunata castigayänaqpaq shamushaq.#Mat. 24.43-44; Luc. 12.39-40; Apoc. 16.15.
4<<Wallkaqllam Teyta Dios munashqannö kawëkäyanki. Tsënö kawayashqëkipitam yulaq ratashniki yakashqa nöpächö këkäyanki. 5Imanö jiparpis mana ajayashpa markäkamuqkunaqa yulaq ratashnin yakashqam këkäyanqa. Pëkunapa shutinkunataqa Libru de la Vïdapita#Éxo. 32.32-33; Sal. 69.28; Apoc. 20.12. manam borrashaqtsu. Teytäpa y angelkunapa nöpanchömi favornin parlashaq.#Mat. 10.32; Luc. 12.8.
6<<Espíritu Santum iglesiakunata tsënö nin. Rinriyuq kaqkunaqa nishqäkunata wiyakuyë.
Filadelfia markachö këkaq markäkuqkunaman cartakunqan
7<<Filadelfia markachö këkaq iglesiapa angelninpaq kë nishqaqta qellqë: Noqaqa santum kä. Nishqäkunata cumpliqmi kä. Davidpa llävintam tsararëkä. Tsëmi punkuta kichaptï pipis llawinqatsu. Ni llawiptï pipis kichanqatsu.#Isa. 22.22.
8<<Noqa rikëkämi llapan rurayashqëkikunata. Kallpannaq këkarpis mana negamashpam nishqäkunata cäsukuyarqunki. Tsëmi gloria punkuta kichamurqü. Tsë punkupa yëkuyaptiki manam pipis michäyäshunkitsu.
9<<Markëkichö wakin nunakuna <Teyta Dios kuyashqan Israel nunam kayä> nikarpis ulikïkäyanmi. Pëkunaqa Satanás munashqantam rurayan. Teyta Dios kuyashqan nunakuna kayashqanta niyaptinpis qamkunatam noqa kuyayaq. Tsëta musyayänanpaqmi#Isa. 43.4. nöpëkikunaman qonqurikuyänanpaq nishaq.#Isa. 49.23; 60.14.
10<<Nishqäta cäsukurmi imata jiparpis mana ajayashpa markäkëkäyämunki. Tsënö kayashqëkipitam jinantinchö täraq nunakuna alläpa jipayänan tiempu#Dan. 12.1; Mat. 24.21-22. chämuptinpis qamkunawan këkäshaq.
11<<Noqaqa shamunäpaqnam këkä. Tsënö këkaptinqa yachatsiyashqaqkunata mana qonqashpa wiyakuyë. Tsënöpam corönëkita pipis qochiyäshunkitsu. 12Imanö jiparpis mana ajayashpa markäkamuqkunataqa Diosnïpa templunchö columna kayänanpaqmi churashaq. Tsëmi mana yarqushpa tsëchö wiñëpa wiñënin kayanqa. Pëkunamanmi Teyta Diosnïpa shutinta y markanpa shutinta qellqashaq. Tsë markaqa ciëlupita shamuq mushuq Jerusalénmi.#Apoc. 21.2. Tsënöllam kikïpa mushuq shutïtapis pëkunaman qellqashaq.#Isa. 62.2; 65.15.
13<<Espíritu Santum iglesiakunata tsënö nikan. Rinriyuq kaqkunaqa nishqäkunata wiyakuyë.
Laodicea markachö këkaq markäkuqkunaman cartakunqan
14<<Laodicea markachö këkaq iglesiapa angelninpaq kë nishqaqta qellqë: Noqam Teyta Dios änikushqankunata cumplï. Imëpis rasun kaqllatam nï. Noqawanmi Teyta Dios llapantapis kamarqan.#Prov. 8.22-31; Juan 1.3.
15<<Noqa rikëkämi llapan rurayashqëkikunata. Musyämi alalaq ni achachaq mana kayashqëkita.#3.15 Alalaq karqa Jesucristuta manam cäsuyantsu. Achachaq karmi sï Jesucristuta llapan shonqunwan kushishqa cäsuyan. Tsëpa rantinqa alalaq karpis o achachaq karpis juk paqwë kayankiman. 16Alalaq o achachaq kayänëkipa rantinmi tibiu kayashqëkipita shimïpita toqariyashqëki.
17<<Rïcu kayashqëkiman markäkurmi niyanki: <Manam imäpis pishintsu> nir. Tsënö nirpis manam musyayankitsu ankupëpaq waktsa, wisku y qalapächu këkäyashqëkita. 18Rasunpa rïcu këta munarqa caldërachö tsullutsishqa qori püruta noqapita rantiyë. Qalapächu këta mana munarqa yulaq ratashta noqapita rantiyë. Wisku këta mana munarqa noqapita coliriu jampita rantiyë. Tsënöpam rïcu, alli ratashllashqa y nawikikunawanpis alli rikaq kayanki.
19<<Kuyashqä kaqtaqa mana allikunata ruraptin piñapar willapämi.#Prov. 3.12; Heb. 12.6. Tsënö këkaptinqa jutsa rurëta jaqirir llapan shonqïkikunawan sirwiyämë. 20¡Wiyayämë! Punkïkipitam qayakëkämü. Mëqëkipis qayakamushqäta wiyar kichapuyämaptikiqa yëkamuptïmi juntu mikushun. 21Imanö jiparpis mana ajayashpa markäkamuqkunataqa noqawan mandakuq kayänanpaqmi churashaq.#2Tim. 2.12; Apoc. 20.4, 6; 22.5. Satanásta vencishqäpitam#Juan 16.33; Apoc. 5.5. noqatapis Teytä churamashqa pëwan wiñëpa wiñënin mandakuq kanäpaq.
22<<Espíritu Santum iglesiakunata tsënö nikan. Rinriyuq kaqkunaqa nishqäkunata wiyakuyë>>.
Currently Selected:
Apocalípsis 3: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.